އަލިފާނުގައި ހާލުގައި ޖެހުނު މީހުންނަށް ދެ ލައްކައެއްހާ ރުފިޔާ

ސޯސަން މަގުގައި ހުންނަ ގާމަގު ކެފޭގައި އިއްޔެ ހިނގި އަލިފާނުގެ ހާދިސާގައި ހާލުގައި ޖެހުނު މީހުންނަށް އެހީވުމުގެ ގޮތުން ސަރުކާރުން ދެ ލައްކައެއްހާ ރުފިޔާ ދީފައިވާ ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.

ހ. ދޫހިމިރިގޭގައި ހުންނަ ގާމަގު ކެފޭގައި ހިނގި އަލިފާނުގެ ހާދިސާގެ ސަބަބުން 57 މީހަކު ހާލުގައި ޖެހުނެވެ. އެއީ 37 ދިވެހިންނާއި 20 ބިދޭސީންނެވެ.

އެންޑީއެމްއޭގެ ޑެޕިއުޓީ ޗީފް އެގްޒެކްޓިވް މެނޭޖަރު އުމަރު ފިކްރީ، "މިހާރު" އަށް ވިދާޅުވި ގޮތުގައި ރޯވި ގެއާ ޖެހިގެން ހުރި ރީފްވިއު އާއި ސައުތު އެންޑް ގެއަށް ވެސް އަލިފާނުގެ އަސަރު ކުރި އެވެ.

"އަލިފާނުގެ އަސަރު ކޮންމެވެސް ވަރަކަށް ރީފްވިއު އަށް ކޮށްފައި ހުރީ. އަނެއް ގެއަށް ދުމުގެ އަސަރުކޮށްފައި ހުރީ،" އޭނާ ވިދާޅުވި އެވެ.

އުމަރު ވިދާޅުވި ގޮތުގައި ހާލުގައި ޖެހުނު ދިވެހިންގެ ތެރޭގައި ގިނައީ ކުއްޔަށް އުޅޭ މީހުންނެވެ.

އެހެންވެ، އެންމެންނަށް ބޯހިޔާވަހިކަން ހަމަޖެއްސުމާއި ކެއުންބުއިމުގެ ހަރަދުތަކަށް ދެ ލައްކައެއްހާ ރުފިޔާ ވަނީ ދޫކޮށްފަ އެވެ.

ގާމަގު ކެފޭ ހުންނަ އިމާރާތުގައި ތިން ފްލޯ ހުރެ އެވެ. އެ އިމާާރާތުގެ މަތީ ދެ ފްލޯ ހަދާފައި ހުރީ ޑެގު އަޅައި ވަށައިގެން ޓިނު ޖަހައިގެންނެވެ. ރޯވި އަލިފާންގަނޑުގައި އެތަން ވަނީ ބޭނުން ނުކުރެވޭ ވަރަށް އަނދައިފަ އެވެ. އެތަނަކީ ބިދޭސީންގެ އެކޮމޮޑޭޝަން ބްލޮކެއްގެ ގޮތުގައި ބޭނުންކުރަމުންދިޔަ ތަނެކެވެ.

އިއްޔެ ހަވީރު 3:00 ހާއިރު ރޯވި އަލިފާންގަނޑު ކޮންޓްރޯލް ކުރެވުނީ އެމްއެންޑީއެފްގެ ފަޔާ އެންޑް ރެސްކިއު އިން ކުރި މަސައްކަތުން ގަޑިއެއްހާއިރު ފަހުންނެވެ.

އެ ހާދިސާގައި އެއްވެސް މީހަކަށް މާބޮޑު އަނިޔާއެއް ނުވެ އެވެ. އެކަމަކު ދުމުގެ އަސަރުކޮށްގެން ދެ ބިދޭސީއަކު ހޮސްޕިޓަލަށް ގެންދިޔަ އެވެ.