ރާއްޖޭގެ ޑިމޮކްރަސީ ފަހަތަށް ސޮއްސާލުމުގެ ބިރު އެބައޮތް: ފައްޔާޒު

ރާއްޖޭގެ ޑިމޮކްރަސީ މިހާރު އޮތް ވަރަށް ވުރެ ފަހަތަށް ސޮއްސާލުމުގެ ބިރު އެބައޮތް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް މިއަދު ވިދާޅުވެއްޖެ އެވެ.

މިއަދު ފާހަގަކުރަމުން އަންނަ ޑިމޮކްރަސީ ދުވަހާ ގުޅުވައި ފައްޔާޒް "އެކްސް" ގައި ވިދާޅުވީ މިފަދަ ދުވަހެއް ފާހަގަކުރާއިރު، މިހާރު މި އޮތް ހާލަތަށް އައުމަށް ކުރި ދަތުރު ހަނދާންކޮށް، ޑީމޮކްރަސީގެ ހަމަތައް ނަގަހައްޓަން އިތުރު ބާރެއް ލާން ޖެހޭ ކަމަށެވެ.

ފައްޔާޒް ވިދާޅުވީ އެތައް އަހަރެއްގެ އުނދަގޫ ދަތުރަކަށް ފަހު، މި ހިސާބަށް އާދެވުނު ނަމަވެސް، ޑިމޮކްރަސީ ފައްކާކުރުމަށް ކުރަމުން އަންނަ މަސައްކަތް ހުއްޓާލައިގެން ނުވާނެ ކަމަށެވެ.

އޭނާ ވިދާޅުވީ ރާއްޖޭގެ ޑިމޮކްރެސީ ކުރިން އޮތް ހާލަތަށް ދިއުމުގެ ބިރު އެބައޮތް ކަމަށާއި މިނިވަންކަން ދަމަހައްޓަން އިތުރަށް މަސައްކަތްތައް ކުރަންޖެހޭ ކަމަށެވެ. އެހެން ނޫން ނަމަ ހުދުމުހުތާރު ވެރިންގެ ސަބަބުން މިނިވަންކަން ގެއްލި ހިނގައިދާނެ ކަމަށް ފައްޔާޒު ވިދާޅުވި އެވެ.

އޭނާ ވިދާޅުވިގޮތުގައި، ދިވެހިން ތިބީ މި ޑިމޮކްރެސީ ދެމެހެއްޓުމަށް ސާބިތުވެ އެވެ. އެހެންވެ، ހިތްވަރު ގެއްލުވާން ޖެހޭ ސަބަބެއް ނެތް ކަމަށް ވިދާޅުވި އެވެ.