ރާއްޖޭގައި މިހާތަނަށް ބާއްވާ ކުޅިވަރުގެ އެންމެ ބޮޑު ބައްދަލުވުން ފަށައިފި

ކޮމަން ވެލްތު ގޭމްސް ފެޑެރޭޝަން (ސީޖީއެފް) ގެ އޭޝިއާ އޯޝޭނިއާ ދެ ބައްރުގެ އާންމު ބައްދަލުވުން، މިއަދު ފަށައިފަ އެވެ.

ކްރޮސް ރޯޑްގައި ކުރިއަށްދާ ބައްދަލުވުން ފެށުމުގެ ރަސްމިއްޔާތުގައި އޮލިމްޕިކް ކޮމިޓީގެ ރައީސް މުހައްމަދު އަބްދުސައްތާރު ވިދާޅުވީ، މި ބައްދަލުވުމަކީ ރާއްޖޭގައި މިހާތަނަށް ބާއްވާ ކުޅިވަރުގެ އެންމެ ބޮޑު ބައްދަލުވުން ކަމަށެވެ.

އަންގާރަ ދުވަހުގެ ނިޔަލަށް ކުރިއަށްގެންދާ ބައްދަލުވުމުގައި ދެ ބައްރުގެ ގައުމުތަކުގެ ތެރެއިން ކޮމަންވެލްތަށް ނިސްބަތްވާ މެންބަރު ގައުމުތަކުގެ މަންދޫބުން ބައިވެރި ވެ އެވެ.

ސައްތާރު ވިދާޅުވީ، ކޮމަންވެލްތު ގޭމްސްގެ އޭޝިއާ އޯޝޭނިއާ ބައްދަލުވުން ބާއްވާ އޭޝިއާގެ ފުރަތަމަ ގައުމަކީ ވެސް ރާއްޖެ ކަމަށެވެ.

"އަޅުގަނޑުމެންގެ މި ސަރަހައްދަށް ވެސް ވަރަށް ތާރީހީ ކަމަކަށް މިކަން ވެދާނެ،" ސައްތާރު ވިދާޅުވި އެވެ.

މި ބައްދަލުވުން ރާއްޖޭގައި ބޭއްވުމުގެ ފުރުސަތު ދޭން ކޮމަންވެލްތު ގޭމްސް ފެޑެރޭޝަނުން ފުރުސަތު ދެއްވުމުން ސްޕޯޓްސް މިނިސްޓަރު އަބްދުﷲ ރާފިއު ވަނީ، އެ ފެޑެރޭޝަންގެ ރައީސް ކްރިސް ޖެންކިންސް އަށް ޝުކުރު އަދާކުރައްވައިފަ އެވެ.

މިނިސްޓަރު ވިދާޅުވި ގޮތުގައި މި ބައްދަލުވުން ރާއްޖޭގައި ބޭއްވުމަކީ އެކަން ތާރީހީ ފޮތްތަކުގައި ލިޔެވޭނެ ކަމެކެވެ.

"ކޮމަންވެލްތު ގޭމްސް ފެޑެރޭޝަނަކީ ކުޅިވަރުގައި ރާއްޖެ އަށް ގިނަ ފުރުސަތުތަކެއް ތަނަވަސްކޮށް ދޭ ޖަމިއްޔާއެއް. އޭގެ ސަބަބުން އަޅުގަނޑުމެންނާ ސީޖީއެފްއާ އޮންނަ ގުޅުން ވެސް ބަދަހިކޮށްދޭ. އަދި އަޅުގަނޑުމެންގެ އަވަށްޓެރި ގައުމުތަކާ ވެސް ކުޅިވަރުގެ ރޮނގުން ބަދަހި ގުޅުމެއް އުފައްދައިދޭ،" ރާފިއު ވިދާޅުވި އެވެ.

ކްރިސް ޖެންކިންސް ވިދާޅުވީ ރާއްޖޭގައި ފެށި ބައްދަލުވުން ކުރިއަށްއޮތްތަނުގައި ކޮމަންވެލްތު ގޭމްސް ފެޑެރޭޝަން ބައްޓަން ވެގެންދާނެ ގޮތާ ބެހޭގޮތުން މަޝްވަރާ ކުރެވޭނެ ކަމަށެވެ.

"ތިޔަ ހުރިހާ މަންދޫބުންގެ ހިޔާލުތައް ވެސް ވަރަށް ސަމާލުކަން ދީގެ އަޅުގަނޑުމެން އަޑުއަހާނަން،" ވޭލްސް އަށް ނިސްބަތްވާ ޖެންކިންސް ވިދާޅުވި އެވެ.