ކުޅިވަރުގެ ޕްރޮޖެކްޓަކަށް ކޮމަންވެލްތު ގޭމްސްގެ ފެޑެރޭޝަނުން އެހީ ދޭނެކަމުގެ އިޝާރާތެއް

ރާއްޖޭގެ ކުޅިވަރުގެ ޕްރޮޖެކްޓަކަށް، ކޮމަންވެލްތު ގޭމްސް ފެޑެރޭޝަން (ސީޖީއެފް) ގެ އެހީ ފޯރުކޮށްދޭނެ ކަމުގެ އިޝާރާތް، އެ ފެޑްރޭޝަންގެ ރައީސް ކްރިސް ޖެންކިންސް ދެއްވާފައިވާ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެ އެވެ.

ރާއްޖޭގައި މިއަދު ފެށި، ސީޖީއެފް އޭޝިއާ އޯޝޭނިއާ ދެ ބައްރުގެ ގައުމުތަކުގެ ސަރައްހައްދީ ބައްދަލުވުން ފެށުމުގެ ހަވާސާގައި، ރާފިއު ވަނީ ޖެންކިންސްއާ ބައްދަލު ކުރައްވައިފަ އެވެ.

އެ ބައްދަލުވުމުގައި ރާއްޖޭގެ ކުޅިވަރުގެ ޕްރޮޖެކްޓަކަށް ސީޖީއެފްގެ އެހީ ދޭނެ ކަމުގެ އިޝާރާތެއް ވޭލްސް އަށް ނިސްބަތްވާ ޖެންކިންސް ދެއްވި ކަމަށް ރާފިއު ވިދާޅުވި އެވެ.

ސީޖީއެފްގެ ސަރަހައްދީ ބައްދަލުވުން ފެށުމުގެ ގޮތުން ވާހަކަފުޅު ދައްކަވަމުން ރާފިއު ވަނީ ސްޕޯޓްސް މިނިސްޓްރީން ފ. އަތޮޅުގައި ފަށައިފައިވާ "ޕްލޭއިން ވިތު ކޮރަލްސް" ޕްރޮޖެކްޓާ ބެހޭގޮތުން ވާހަކަ ދައްކައިފަ އެވެ. ޕްރެޒެންޓޭޝަނެއް ހުށަހަޅައިގެން އެ ޕްރޮޖެކްޓާ ބެހޭގޮތުން ތަފުސީލީ ވާހަކަތަކެއް، އޭނާގެ ތަގުރީރުގައި ފާހަގަ ކުރި އެވެ.

އޭނާގެ ވާހަކައިގެ ބޮޑު ބައެއް ހޭދަ ކުރެއްވީ ވެސް އެ ޕްރޮޖެކްޓާ ބެހޭގޮތުން މައުލޫމާތު ހިއްސާ ކުރުމަށެވެ.

ސޛީއެފްގެ ބައްދަލުވުން ފެށުމުގެ ރަސްމިއްޔާތުގައި އެ ޕްރޮޖެކްޓާ ބެހޭގޮތުން އެހާ ތަފްސީލުކޮށް ވާހަކަ ދެއްކެވި ސަބަބަކީ، ރާފިއު ވިދާޅުވި ގޮތުގައި އެފަދަ އެހެން ޕްރޮޖެކްޓްތައް ރާއްޖޭގެ އެހެން ސަރަހައްދުތަކުގައި ވެސް ހިންގަން މަގުފަހި ކުރުމެވެ.

"އޭގެ ބޭނުމަކީ މިފަދަ ޕްރޮޖެކްޓްތައް ރާއްޖޭގެ އެހެން ސަރަހައްދުތަކުގައި ކުރިއަށް ގެންދިއުން،" ރާފިއު ވިދާޅުވި އެވެ.

ރާފިއު ވިދާޅުވީ ކުޅިވަރުގެ ތެރެއިން އެހެން ހުނަރުތައް ވެސް ދަސްކޮށް ދީގެން ކުރިއަށް ގެންދިއުމަށްޓަކައި ކުރެވިދާނެ ގިނަ ކަންތައްތަކެއް އެބަހުރި ކަމަށެވެ.

ޖެންކިންސް އާ އެކު ބޭއްވި ބައްދަލުވުމުގައި، އެފަދަ އެހެން ޕްރޮޖެކްޓަކަށް އެހީ ހޯދުމާ ބެހޭގޮތުން ވާހަކަ ދެކެވުނު ކަމަށް އޭނާ ވިދާޅުވި އެވެ.

"ދެކެވުނު ވާހަކަތަކުގެ ތެރެއިން އަޅުގަނޑުމެން މިސާލު ނެގީ ކުޅީގެގޮތުގައި އަޅުގަނޑުމެންގެ ރާއްޖޭގައި އެބަހުރި ކާބަން ސީކިން އޭރިއާތައް. އެ ކުޅިތައް ދަމަހައްޓައި ރައްކާތެރި ކުރުމަށްޓަކައި (ކުޅިވަރުގެ ޕްރޮޖެކްޓެއްގެ ތެރެއިން) ކުރަން ޖެހޭ މަސައްކަތާ ބެހޭގޮތުން،" ރާފިއު ވިދާޅުވި އެވެ.

އޭނާ ވިދާޅުވީ ވަކި ހިސާބަކުން ކުޅިވަރު ދޫކޮށްލިޔަސް، ކުޅިވަރުގެ އެ ޕްރޮޖެކްޓްގައި ތަމްރީނުވާ ކުދިންނަކީ މުޖުތަމައުއަށް ބޭނުންތެރި ކުދިންނަށް ހެދޭނެ ކަމަށެވެ.

"މިކަހަލަ ޕްރޮގްރާމްތަކަކީ އަޅުގަނޑުމެންނަށް އޮފާ ކުރެވެން ހުރި ޕްރޮގްރާމްތަކެއްގެ ވާހަކަ އަޅުގަނޑު ސީޖީއެފްގެ ރައީސަށް ދެންނެވީ. ވަރަށް ޕޮޒިޓިވްކޮށް ވަރަށް އުއްމީދީ ޖަވާބުތަކެއް ދެއްވި،" ރާފިއު ވިދާޅުވި އެވެ.

ބައިނަލްއަގްވާމީ މުބާރާތްތަކުގެ އިތުރުން، ކުޅިވަރިގެ ބައިނަލްއަގްވާމީ ބައްދަލުވުންތައް ވެސް ރާއްޖޭގައި ބޭއްވުމުގެ ވާހަކަތައް މީގެ ކުރިން ރާފިއު ދެއްކެވި އެވެ. އޭނާ ވިދާޅުވީ މިއަދަކީ އެކަން ހާސިލުވި ދުވަސް ކަމަށެވެ. އޭނާ ވިދާޅުވީ ސީޖީއެފްގެ ބައްދަލުވުން ރާއްޖޭގައި ބޭއްވޭތީ ރާއްޖޭގެ ކުޅިވަރަށް ގިނަ ކަންތައްތަކެއް ފަހިވެގެންދާނެ ކަމަށެވެ.

"މީގެ ސަބަބުން އިރާދަކުރެއްވިއްޔާ ރާއްޖޭގެ ކުޅިވަރު ކުރިއަރުވުމުގެ ތެރެއިން ކުރަން ހުރި ކަންތައްތަކަށް ވަރަށް ގިނަ ކަންކަން ފަހިވެގެންދާނެ،" ރާފިއު ވިދާޅުވި އެވެ.

އޭޝިއާ އަދި އޯޝޭނިއާ ދެ ބައްރުގެ ކޮމަންވެލްތުގެ މެންބަރު ގައުމުތަކުގެ ކުޅިވަރުގެ މަންދޫބުން ބައިވެރިވެ ވަޑައިގަންނަވާ، މި ބއްދަލުވުމަކީ މީހާތަނަށް ރާއްޖޭގ ބާއްވާ ކުޅިވަރުގެ އެންމެ ބޮޑު ބައްދަލުވުމެވެ. އަދި މިއީ އޭޝިއާގައި ވެސް މި ބައްދަލުވުން ބާއްވާ ފުރަތަމަ ފަހަރެވެ. އަންގާރަ ދުވަހުގެ ނިޔަލަށް މި ބައްދަލުވުން ކުރިއަށްދާނެ އެވެ.