ގައުމުގެ ތާރީހު އަލުން ލިޔާނަން: ލަންކާގެ އާ ރައީސް

ބަނގުރޫޓު ވެފައިވާ ސްރީ ލަންކާގެ ތާރީހު އަލުން ލިޔަން ބޭނުންވާ ކަމަށާއި އެކަމުގައި ރައްޔިތުންގެ އެހީތެރިކަން ބޭނުންވާ ކަމަށް އެ ގައުމުގެ އާ ރައީސް އަނޫރާ ކުމާރަ ޑިސަނަޔަކަ ވިދާޅުވެއްޖެ އެވެ.

ލަންކާ މާލީ އަނދަވަޅަށް ވެއްޓުނު ފަހުން ބޭއްވި ފުރަތަމަ އިންތިހާބު، މާކްސިސްޓް ސިޔާސަތުގެ އަނޫރާ، 55، ކާމިޔާބުކުރެއްވީ އެންމެ ގާތުން ވާދަކުރެއްވި ކެންޑިޑޭޓާ ވެސް 1.3 މިލިއަން ވޯޓުގެ ބޮޑު ފަރަގަކުންނެވެ.

މީގެ ހަތަރު އަހަރު ކުރިން ބޭއްވި ގާނޫނު ހަދާ މަޖިލީހުގެ އިންތިހާބުގައި ހަތަރު ޕަސެންޓަށްވުރެ މަދުން ވޯޓު ލިބުނު ޕާޓީގެ ލީޑަރަށް މިފަހަރު ތާއީދު އިތުރުވެގެން ދިޔައީ އިގްތިސާދީ ހީނަރުކަމުގެ ސަބަބުން ސްރީ ލަންކާގެ ރައްޔިތުންނަށް އުފުލަން ޖެހިފައިވާ ތަކުލީފާ ގުޅޭ ގޮތުން ކުރިއަށް ނެރުއްވި ސިޔާސަތާ އެކުގަ އެވެ.

"ޒަމާނުއްސުރެ އަޅުގަނޑުމެން ދެކެމުން އައި ހުވަފެން މިހާރު މި ފެންނަނީ ހަގީގަތަކަށް ވަމުންދާތަން،" ކާމިޔާބީ ކަށަވަރުވުމާ އެކު ނެރުއްވި ބަޔާނުގައި އަނޫރާ ވިދާޅުވި އެވެ.

"މިއީ އެންމެންނަށް ނިސްބަތްވާ ކާމިޔާބީއެއް،" އޭނާ ވިދާޅުވި އެވެ.

"އުއްމީދުން ފުރިފައިވާ އެތައް މިލިއަން ލޮލަކުން އަޅުގަނޑުމެން ކުރިއަށް ގެންގޮސް، އެންމެން އެކުގައި މި ތިބީ ސްރީ ލަންކާގެ ތާރީހް އަލުން ލިޔަން ތައްޔާރުވެގެން."

އަނޫރާ ނިސްބަތްވާ މާކްސިސްޓް ޕާޓީ އަކީ އެއް ދުވަސްވަރެއްގައި ބާކީވެފައި އޮތް ޕާޓީއެކެވެ. އެ ޕާޓީން އިސްނަގައިގެން 1970 އާއި 1980 ގެ އަހަރުތަކުގައި ނާކާމިޔާބު ދެ ކުރިމަތިލުމެއް ހިންގުމުގެ ސަބަބުން 80،000 އަށް ވުރެ ގިނަ މީހުން މަރުވި އެވެ.

ލަންކާއަށް 2022 ވަނަ އަހަރު ކުރިމަތިވި އިގްތިސާދީ ބޮޑު ތަދުގައި، އައިއެމްއެފްގެ ބެއިލްއައުޓްގެ ޝަރުތުތަކާ އެއްގޮތްވާ ގޮތުގެ މަތިން ހަރުކަށި ސިޔާސަތުތަކެއް ގެންގުޅުއްވި މިހާރުގެ ރައީސް ރަނިލް ވިކްރަމަސިންހަ އަށް އިންތިހާބުގައި އެންމެ 17 ޕަސެންޓް ވޯޓާ އެކު ލިިބިވަޑައިގަތީ ތިން ވަނަ އެވެ.

"ތާރީހުން އަޅުގަނޑުގެ މަސައްކަތަށް އިންސާފު ކުރާނެ. އެކަމަކު އަޅުގަނޑަށް ޔަގީންކަމާ އެކު ދަންނަވާލެވޭނެ، ގައުމަށް ކުރިމަތިވި އެންމެ އަނދިރި އެއް ދުވަސްވަރު ގައުމު ހަމައަކަށް އެޅުވުމަށް ކުރެވެން ހުރި ހުރިހާ މަސައްކަތެއް ކުރި ކަމަށް،" ރަނިލް ނެރުއްވި ބަޔާނުގައި ވިދާޅުވި އެވެ.

އިންތިހާބު ކާމިޔާބުކުރެއްވި އަނޫރާ އަކީ ލަންކާއަށް އެހީވުމަށް އައިއެމްއެފުން ކުރިމަތިކޮށްފައިވާ ޝަރުތުތަކާ ދެކޮޅަށް ކެމްޕެއިންގައި ވާހަކަ ދެއްކެވި ބޭފުޅަކަށް ވިޔަސް އޭނާގެ ޕާޓީން ބުނެފައިވަނީ އެ ޕާޓީގެ ވެރިކަމުގައި އައިއެމްއެފްގެ އެއްބަސްވުން ބޮލާލައި ނުޖަހާނެ ކަމަށެވެ. އެކަމަކު މަސައްކަތްކުރާނީ މިހާރު އެއްބަސްވެފައިވާ ކަންކަމާ އަލުން މަޝްވަރާކޮށް ރައްޔިތުންނަށް އެންމެ ލުއިވާނެ ގޮތް ހޯދައިދޭން ކަމަށް ބުންޏެވެ.

ސްރީ ލަންކާގައި ހޮނިހިރު ދުވަހު ބޭއްވި އިންތިހާބުގައި ވޯޓުލުމުގެ ހައްގު ލިބިފައިވާ 17.1 މިލިއަން މީހުންގެ ތެރެއިން ގާތްގަނޑަކަށް 76 ޕަސެންޓް މީހުން ވަނީ ވޯޓު ލައިފަ އެވެ. -- އޭއެފްޕީ