އާ ރައީސް ލަންކާގެ ގާނޫނު ހަދާ މަޖިލިސް އުވާލައިފި

ސްރީ ލަންކާގެ ރައީސްކަމުގެ މަގާމަށް އަލަށް އިންތިހާބުކުރި އަނޫރަ ކުމާރަ ޑިސެނަޔަކަ އެ ގައުމުގެ ގާނޫނު ހަދާ މަޖިލިސް މާއުވާލަން ނިންމަވައި އެކަން ރަސްމީކޮށް އިއުލާނުކުރައްވައިފި އެވެ.

ލަންކާގެ ރައީސް އޮފީހުގެ މީޑިއާ ޔުނިޓުން ބުނި ގޮތުގައި ބުދަ ދުވަސް (އަންގާރަ ދުވަހުގެ ރޭ މެންދަމު 12 އިން ފެށިގެން) މަޖިލިސް އުވޭ ގޮތަށް ކަނޑައަޅުއްވައި އެކަމުގެ ލިޔުމުގައި ރައީސް މިހާރު ވަނީ ސޮއިކުރައްވައިފަ އެވެ.

ޕީޕަލްސް ލިބަރޭޝަން ފްރަންޓް (ޖޭވީޕީ) އާއި ނޭޝަނަލް ޕީޕަލްސް ޕަވަ (އެންޕީޕީ) ކޯލިޝަންގެ ލީޑަރު އަނޫރާ ޑިސަނަޔަކަ 38 ކެނޑިޑޭޓުން ބަލިކޮށް، 5.6 މިލިއަން ނުވަތަ 42.3 ޕަސެންޓް ވޯޓާ އެކު އިންތިހާބުވީ މަޖިލިސް އުވާލުމުގެ ވައުދާ ވެސް އެކުގަ އެވެ.

އިންތިޚާބުގެ ކެމްޕޭނުގައި އޭނާ ވަނީ ކާމިޔާބު ލިބިވަޑައިގެންފި ނަމަ މަޖިލިސް އުވާލައި އަވަސް އިންތިހާބެއް ބާއްވަން ވައުދުވެ ވަޑައިގެންފަ އެވެ.

އާ އިންތިހާބު ބާއްވަން ނިންމާފައިވަނީ ނޮވެމްބަރު 14 ގަ އެވެ. މަޖިލީހަށް ކުރިމަތިލާން އަންނަ މަހުގެ ފުރަތަމަ ހަފްތާގައި އިއުލާންކުރާނެ އެވެ.

އުވާލި މަޖިލީހުގެ ފަސް އަހަރުގެ ދައުރު ހަމަވާނީ އަންނަ އަހަރުގެ އޮގަސްޓް މަހުގެ ތެރޭގަ އެވެ.

ސްރީލަންކާގެ 225 މެމްބަރުންގެ މަޖިލީހުގައި ރައީސްގެ ޕާޓީން ތިއްބެވީ އެންމެ ތިން މެމްބަރުންނެވެ.

އަނޫރާ މިއަދު ވަނީ އާ ބޮޑުވަޒީރަކަށް ތައޫލީމީ ދާއިރާގެ ބޭފުޅެއް ކަމަށްވާ އަދި މުޅިން އަލަށް މަޖިލީހަށް އިންތިހާބުވެ ވަޑައިގެންފައިވާ ހަރީނީ އަމަރަސޫރިޔާ އައްޔަން ކުރައްވައިފަ އެވެ. އޭނާ ވެފައި ވަނީ އެ މަގާމަށް އައްޔަން ކުރެއްވި ތިން ވަނަ އަންހެން ބޭފުޅާއަށެވެ.

ހަމަ އެ ދުވަހު ވަނީ އިންތިހާބު ބޭއްވެންދެން ކަންކަން ބަލަހައްޓާނެ ވަގުތީ ސަރުކާރެއްގެ ގޮތުގައި ތިން މެމްބަރުންގެ ކެބިނެޓެއް އައްޔަން ކުރައްވައިފަ އެވެ.