ބިދޭސީންގެ ޖޫރިމަނާ ފައިސާ ނުދައްކާ 7،500 ފަރާތެއްް އެކްސްޕެޓް ސިސްޓަމުން ސަސްޕެންޑްކޮށްފި

ބިދޭސީންނަށް ދޫކުރާ ހުއްދަތަކުގެ ފީތަކާއި ޖޫރިމަނާ ނުދައްކާ ފަރާތްތަކުގެ ތެރެއިން މިހާތަނަށް 7،500 ފަރާތެއް އެކްސްޕެޓް ސިސްޓަމް ބޭނުން ނުކުރެވޭ ގޮތަށް ހޯމް މިނިސްޓްރީން ސަސްޕެންޑް ކޮށްފި އެވެ.

ރާއްޖެ އަށް ބިދޭސީން ގެނައުމަށްޓަކައި ހުރިހާ ފީތައް ދެއްކޭނީ އެކްސްޕެޓް ސިސްޓަމްގެ ތެރެއިންނެވެ. އޭގެ ތެރޭގައި ބިދޭސީން ގެނައުމުގެ ހުއްދަ ދިނުމާއި ވޯކްޕާމިޓް ފީ އާއި ވިސާ ފީ ދެއްކުން ވެސް ހިމެނެ އެވެ.

ހޯމް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހިމް މިއަދު "މިހާރު" އަށް ވިދާޅުވީ، ބިދޭސީންނާ ގުޅޭ އެއްވެސް ޖޫރިމަނާއެއް މިހާތަނަށް ނުދައްކާ 7،500 ފަރާތަށް އެކްސްޕެޓް ސިސްޓަމަށް ނުވަދެވޭ ގޮތަށް ބްލޮކް ކުރީ އެ ފީތައް ނުދައްކާތީ ކަމަށެވެ. ޕޭމަންޓްތައް ކްލިއާ ކުރުމުން އެ ފަރާތްތަކަށް އަލުން އެ ސިސްޓަމް ބޭނުން ކުރެވޭނެ ކަމަށް އޭނާ ވިދާޅުވި އެވެ.

ހޯމް މިނިސްޓްރީން ވަނީ ޝެޑިއުލެއްގެ ތެރެއިން ދައްކަން ޖެހޭ ފައިސާ ބަހާލައިގެން ދައްކަން ބޭނުންވާ ފަރާތްތަކަށް ވެސް އެ ފުރުސަތު ކުރިން ދީފަ އެވެ. އެއް އަހަރު ދުވަހަށް ބަހާލައިގެން ފައިސާ ދައްކަން ބޭނުންވާ ފަރާތްތަކުގެ ގޮތުގައި މިހާތަނަށް 3،692 ފަރާތަކުން ރިކުއެސްޓްކޮށްފައިވާ ކަމަށް މަޖީދު ވިދާޅުވި އެވެ.

އޭނާ ވިދާޅުވީ، އޭގެ ތެރެއިން އެންމެ ބޮޑު އަދަދެއް ދައްކަން ޖެހޭ ފަރާތުން 23.2 މިލިއަން ރުފިޔާ ދައްކަން ޖެހޭ ކަަމަށެވެ. އެ އަދަދަށް ފައިސާ ދެއްކުމަށް ވަނީ އެއް އަހަރު ދުވަހުގެ މުއްދަތެއް ދީފަ އެވެ.

ހޯމް މިނިސްޓްރީން މި މަހުގެ ކުރީ ކޮޅު ކުރި އިއުލާނުގައިވާ ގޮތުން ފީތަކާއި ޖޫރިމަނާތަކުގެ އަދަދު 100،000ރ. އަށް ވުރެ މަދުން ދައްކަން ޖެހޭ ފަރާތްތަކުން މި މަހުގެ 16 އިގެ ކުރިން ފައިސާ ދައްކައި ހަލާސްކުރަން ޖެހޭނެ އެވެ. އެ މުއްދަތުގައި ފައިސާ ނުދައްކާ ފަރާތްތަކުގެ ލިސްޓު އާންމުކޮށް، އިއުލާނުކޮށް އެކްސްޕެޓް ސިސްޓަމް މެދުވެރިކޮށް އެ ފަރާތްތައް ސަސްޕެންޑް ކުރާނެ ކަމަށް ބުނެފައި ވެ އެވެ.

ރާއްޖޭގައި 139،000 މަސައްކަތު މީހުންނަށް ހުއްދަ ދޫކޮށްފައި ވިޔަސް ބަރާބަރަށް ފައިސާ ދައްކަނީ އެންމެ 36 ޕަސެންޓް މީހުން ކަމަށް ހޯމް ލޭންޑް ސެކިއުރިޓީ މިނިސްޓަރު އަލީ އިހުސާން މީގެ ކުރިން ވަނީ ވިދާޅުވެފަ އެވެ.

ހޯމް މިނިސްޓްރީން ވަނީ މީގެ ކުރިން ބިދޭސީންގެ ވޯކްޕާމިޓް ފީ އާއި ޖޫރިމަނާ ނުދައްކާ ކުންފުނިތަކުގެ ލިސްޓެއް ވެސް އާންމުކޮށްފަ އެވެ. އޭގެ ތެރޭގައި ރާއްޖޭގެ މަޝްހޫރު ބައެއް ވިޔަފާރިވެރިންގެ ކުންފުނިތައް ވެސް ހިމެނެ އެވެ.