ބިދޭސީން ގެއްލިގެން ހުށަހަޅާ ރިޕޯޓް އަނބުރާ ގެންދާ ނަމަ 10،000ރ. ނަގަނީ

ބިދޭސީން ފިލައިގެން ނުވަތަ ގެއްލިގެން ހޯދަން ހުށަހަޅާ "މިސިން ރިޕޯޓް" އަނބުރާ ގެންދާ ނަމަ، 10،000ރ. ގެ ފީއެއް ނަގަން ސަރުކާރުން ނިންމައިފި އެވެ.

ހޯމްލޭންޑް މިނިސްޓްރީން މިއަދު ނެރުނު އިއުލާނެއްގައި ވަނީ ރާއްޖޭގައި ބިދޭސީން ވަޒީފާ އަދާކުރުމާ ބެހޭ ގާވާއިދުގެ ދަށުން އެކުލަވާލާފައިވާ އުސޫލުތައް އަންނަ އާދިއްތަ ދުވަހުން ފެށިގެން ތަންފީޒުކުރަން ފަށާނެ ކަން ހާމަކޮށްފަ އެވެ. އެއީ މިދިޔަ އަހަރުގެ މެއި މަހު އަމަލުކުރަން ފެށި ގަވާއިދެކެވެ.

އެ އިއުލާނުގައި ބުނި ގޮތުގައި، ވަޒީފާ އަދާކުރާ ބިދޭސީ ފަރާތެއް ފިލައިފި ނަމަ ނުވަތަ ގެއްލިއްޖެ ނަމަ އަމަލުކުރާނެ ގޮތުގެ އުސޫލުގެ ދަށުން ކަނޑައެޅިފައިވާ ވަކި ގޮތްތަކެއް މަތިން އަންނަ އާދިއްތަ ދުވަހުން ފެށިގެން ފީއެއް ނަގާނެ އެވެ. އެއީ؛

• މިސިން ރިޕޯޓުކުރާ ކޮންމެ ރިކުއެސްޓަކަށް، މިސިން ރިޕޯޓިން ފީގެ ގޮތުގައި 1,000ރ. ގެ ސާވިސް ފީއެއް.

• ވަޒީފާ ދޭ ފަރާތުގެ އިހުމާލުން ވާކް ޕާމިޓް ހުއްދައިގެ ދަށުން ރާއްޖޭގައި ވަޒީފާ އަދާކުރާ ބިދޭސީއަކު ފިލައިފި ނަމަ ނުވަތަ ގެއްލިއްޖެ ނަމަ 2،000ރ. ގެ ޖޫރިމަނާއެއް.

• ބިދޭސީން ފިލައިގެން ނުވަތަ ގެއްލިގެން ހޯދަން ހުށަހަޅާ "މިސިން ރިޕޯޓް" އަނބުރާ ގެންދާ ނަމަ، 10،000ރ. ގެ ފީއެއް.

ރާއްޖޭގައި ވަޒީފާ އަދާކުރާ ބިދޭސީއަކު ފިލައިގެން ނުވަތަ ގެއްލިގެން "މިސިން ރިޕޯޓް" ކޮށްފައިވާ ރިކުއެސްޓް އެކްސްޕެޓް ސިސްޓަމް މެދުވެރިކޮށް އަނބުރާ ގެންދިއުމުގެ ފުރުސަތު އަންނަ އާދިއްތަ ދުވަހު ހުޅުވާލާނެ ކަމަށް މިނިސްޓްރީގެ އިއުލާނުގައި ބުންޏެވެ.

އެ އިއުލާނުގައި ބުނި ގޮތުގައި، މިހާރު ވެސް ހުށަހަޅާފައި ހުރި މިސިން ރިޕޯޓުތައް 10،000ރ. ގެ އެ ފީއާ ނުލައި އަނބުރާ ގެންދަން ބޭނުންވާ ނަމަ، އަންނަ އާދިއްތަ ދުވަހުން ފެށިގެން 30 ދުވަހުގެ މުއްދަތެއް ދޭން ވަނީ ނިންމައިފަ އެވެ. ނަމަވެސް، އެ މުއްދަތުގެ ފަހުން ރިޕޯޓް އަނބުރާ ގެންދާ ނަމަ، އެ ފީ ނަގާނެ އެވެ.

އެކަމަކު، އަންނަ އާދިއްތަ ދުވަހުން ފެށިގެން ހުށަހަޅާ ބިދޭސީންގެ މިސިން ރިޕޯޓްތައް އެއްވެސް ފީއަކާ ނުލައި އަނބުރާ ގެންދިއުމަށް ދޭނީ ހަތް ދުވަހުގެ މުއްދަތެކެވެ. އެ މުއްދަތު ހަމަވުމަށް ފަހު ރިޕޯޓް އަނބުރާ ގެންދާ ނަމަ، 10،000ރ. ގެ ފީ ނަގާނެ އެވެ.

ހޯމްލޭންޑް މިނިސްޓްރީން ބުނީ ބިދޭސީން ހޯދަން ރިޕޯޓް ހުށަހެޅުމާ ގުޅޭ މައުލޫމާތު އަންނަ އާދިއްތަ ދުވަހުން ފެށިގެން އެކްސްޕެޓް ސިސްޓަމުން ލިބޭނެ ކަމަށާއި އިތުރު މައުލޫމާތު ހޯދަން ބޭނުންވާ ނަމަ 1500 އަށް ގުޅުމަށް އެދޭ ކަމަށެވެ.

ރާއްޖޭގައި ބޮޑުވެފައިވާ ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށްޓަކައި، ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ސަރުކާރުން އަންނަނީ މުހިންމު ފިޔަވަޅުތަކެއް އަޅަމުންނެވެ. ގަވާއިދާ ހިލާފަށް އުޅޭ ބިދޭސީން ހޯދުމަށް މޯލްޑިވްސް އިމިގްރޭޝަން އާއި ކަމާ ގުޅުންހުރި އެހެން އިދާރާތައް ގުޅިގެން މާލެ ސަރަހައްދުގައި އަންނަނީ ހާއްސަ އޮޕަރޭޝަންތައް ހިންގަމުންނެވެ.

ރާއްޖޭގައި އުޅޭ ހުރިހާ ބިދޭސީންގެ ފޮޓޯ އާއި އިނގިލީގެ ނިޝާން ނަގަން ފަށައި، ގަވައިދާ ހިލާފަށް އުޅޭ ބިދޭސީން ގަވާއިދަށް ފެއްތުމަށް "ކުރަނގި"ގެ ނަމުގައި ހާއްސަ އޮޕަރޭޝަން ހޯމްލޭންޑް މިނިސްޓްރީން ވެސް އަންނަނީ ހިންގަމުންނެވެ.