އެންމެންނަށް ފްލެޓް ގަނެވޭ ގޮތަށް ހައްޖު ކޯޕަރޭޝަނުން ހައުސިން މަޝްރޫއެއް ހިންގަނީ

މޯލްޑިވްސް ހައްޖު ކޯޕަރޭޝަނުން ހުޅުމާލޭގައި ހައުސިން މަޝްރޫއެއް ހިންގަން ނިންމައި، އެ އިމާރާތުގެ ޑިޒައިންގެ މަސައްކަތް ފަހިދިރިއުޅުން ކޯޕަރޭޝަން (އެފްޑީސީ) އާ އިއްޔެ ހަވާލުކޮށްފި އެވެ.

އެފްޑީސީން މިއަދު ބުނީ ހައްޖު ކޯޕަރޭޝަނުން ހިންގާ "ނިއަމް ރެސިޑެންސް" މަޝްރޫއުގެ ޑިޒައިން ހިދުމަތްތައް ފޯރުކޮށްދިނުމަށް އެ ކުންފުންޏާ އެކު އެފްޑީސީން އެއްބަސްވުމެއްގައި ސޮއިކޮށްފައިވާ ކަމަށެވެ.

އެ އެއްބަސްވުމުގައި އެފްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ހަމްދާން ޝަކީލެވެ. ހައްޖު ކޯޕަރޭޝަނުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ޝަކީލެވެ.

އެފްޑީސީން ބުނި ގޮތުގައި، އެ އެއްބަސްވުމުގެ މަގުސަދަކީ ހައްޖު ކޯޕަރޭޝަންގެ "ނިއަމް ރެސިޑެންސް" މަޝްރޫއަށް ބޭނުންވާ އާކިޓެކްޗަރަލް އާއި އިންޖިނިއަރިން އަދި ކުރެހުންތައް ފޯރުކޮށްދިނުމާއި ކޮންސަލްޓެންސީގެ ހިދުމަތް ދިނުމެވެ.

ހައްޖު ކޯޕަރޭޝަންގެ އެމްޑީ ޝަކީލް މިއަދު "މިހާރު" އަށް ވިދާޅުވި ގޮތުގައި، މި ހައުސިން މަޝްރޫއުގެ ދަށުން ހަދާ އެޕާޓްމަންޓްތައް ގަތުމުގެ ފުރުސަތު އާންމުކޮށް ހުޅުވާލާނެ އެވެ. ނަމަވެސް، މި މަސައްކަތް ހަވާލުކުރާ ބަޔަކާއި ހަދަނީ ކިތައް އެޕާޓްމަންޓުކަމާއި މަޝްރޫއާ ގުޅޭ އިތުރު އެއްވެސް ތަފުސީލެއް އޭނާ އަދި ނުދެއްވަ އެވެ.

އެފްޑީސީން މީގެ ކުރިން ވަނީ އިސްލާމިކް މިނިސްޓްރީ އާއި މޯލްޑިވް ގޭސްއާ އެކު ވެސް މި ކަހަލަ އެއްބަސްވުމެއްގައި ސޮއިކޮށްފަ އެވެ. އެއީ އެ ދެ އިދާރާ އިން އިމާރާތްކުރާ އެކި ތަންތަން ޑިޒައިން ކޮށްދިނުމުގެ ހިދުމަތް ދިނުމަށް ހެދި އެއްބަސްވުމެކެވެ.

އެފްޑީސީ އަށް ފަސް އަހަރު ފުރުމުގެ މުނާސަބަތާ ގުޅިގެން އެ ކޯޕަރޭޝަންގެ މެންޑޭޓަށް އައި ބަދަލާ އެކު، ކުންފުންޏަށް އާމްދަނީ އިތުރުކުރުމުގެ ގިނަ މަސައްކަތްތަކެއް ކުރަމުން އަންނަ ކަމަށް ބުންޏެވެ.

"މި މަޝްރޫއުތައް ކާމިޔާބުކަމާ އެކު ތަންފީޒުކުރުމަކީ، މި ދާއިރާއިން އިތުރު ފުރުސަތުތައް ހުޅުވި، މި ކުންފުންޏަކީ ފައިދާ ލިބޭ ކުންފުންޏަކަށް މަގުފަހިވެގެންދާނެ ކަމެކެވެ،" އެފްޑީސީން ބުންޏެވެ.

ހައްޖު ކޯޕަރޭޝަނުން މިދިޔަ މެއި މަހު ވަނީ ހުޅުމާލެއިން ދެ ބިމެއް ގަނެފަ އެވެ. އޭގެ ތެރެއިން އެއް ބިމުގައި ނުވަ ފްލޯގެ އޮފީސް އިމާރާތެއް އެޅުމުގެ މަސައްކަތް މި މަހު ވަނީ ފަށައިފަ އެވެ. އެއީ 5،000 އަކަފޫޓުގެ ބިމެއްގަ އެވެ.

އޮފީސް އިމާރާތުގެ މަސައްކަތް ހަވާލު ކޮށްފައިވަނީ ކޮންޓްރެކްޓާ ފައިނޭންސް އުސޫލުން 79.1 މިލިއަން ރުފިޔާއަށް މެޑްޓެކް މޯލްޑިވްސް ޕްރައިވެޓް ލިމިޓެޑާ އެވެ. އެ މަސައްކަތް ހަވާލުކުރީ ދޮޅު އަހަރު ދުވަސް ތެރޭގައި މަސައްކަތް ނިންމަން ޖެހޭ ގޮތަށެވެ.