ގެސްޓްހައުސް ސިމްޕޯޒިއަމްގެ ޕާޓްނަރުންނާއެކު ސޮއިކޮށްފި

މޯލްޑިވްސް އިސްލާމިކް ބޭންކުން ރާއްޖޭގެ ގެސްހައުސް ދާއިރާއަށް ބާއްވާ އެންމެ ބޮޑު ހަރަކާތް ކަމަށްވާ ގެސްޓް ހައުސް ސިމްޕޯޒިއަމްގެ މުހިންމު ޕާޓްނަރުންތަކާ އެކު މިއަދު ސޮއިކޮށްފި އެވެ.

އެ ބެންކުގެ ހެޑް އޮފީހުގައި ބޭއްވި ރަސްމިއްޔާތެއްގައި މި ސިމްޕޯޒިއަމްގެ އެސޯސިއޭޓް ޕާޓްނަރެއްގެ ގޮތުގައި ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން މޯލްޑިވްސްއިން ވަނީ ސޮއިކޮށްފަ އެވެ. އަދި އިވެންޓް ޕާޓްނަރެއްގެ ގޮތުގައި ތިންކު އެސޯސިއޭޓްސްއިން އަދި މީޑިއާ ޕާޓްނަރެއްގެ ގޮތުގައި "މިހާރު" އާއި އަދި ބްރޮޑްކާސްޓިން ޕާޓްނަރެއްގެ ގޮތުގައި "ޕީއެސްއެމް" އާ އެކު ވަނީ ސޮއިކޮށްފަ އެވެ.

މި ސިމްޕޯޒިއަމްއާ ބެހޭ ގޮތުން ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން މޯލްޑިވްސްގެ ނައިބު ރައީސް އަހުމަދު ވަހީދު ވިދާޅުވީ މިއީ ގެސްޓް ހައުސް އިންޑަސްޓްރީގައި މުހިންމު ގިނަ މައުލޫމާތުތަކެއް ހިއްސާކޮށް, ދާއިރާގައި މަސައްކަތްކުރާ ފަރާތްތަކަށް ފަހި ފުރުސަތުތަކެއް ލިބޭނެ ސިމްޕޯޒިއަމްއެއް ކަމަށެވެ.

"މި ސިމްޕޯޒިއަމްގައި ގެސްޓްހައުސް ދާއިރާގައި މަސައްކަތްކުރާ ފަރާތްތަކަށް ވިޔަފާރި ފުޅާ ކުރުމާއި ހިދުމަތްތައް އިތުރަށް ފުރިހަމަ ކުރަން ބޭނުންވާ މުހިންމު މައުލޫމާތުތަކެއް ލިބޭނެ. އަދި މި ސިމްޕޯޒިއަމްއަކީ ދާއިރާގެ ސްޓޭކްހޯލްޑަރުންނާއި ގުޅުން ބަދަހިކޮށް, ނެޓްވޯކް ކުރުމަށް ލިބޭނެ ފުރުސަތެއް." އޭނާ ވިދާޅުވި އެވެ.

މި ސިމްޕޯޒިއަމް އަކީ ހިލޭ ބައިވެރިވުމުގެ ފުރުސަތު އޮތް ސިމްޕޯޒިއަމްއަކަށް ވެފައި ދާއިރާއިން ކުރިއަށް ދިއުމަށް ލިބޭނެ ރަނގަޅު ފުރުސަތަކަށް ވާތީ މި ފުރުސަތުގެ ބޭނުން ހިފުމަށް މި ދާއިރާގެ ސްޓޭކް ހޯލްޑަރުންނަށް ގޮވާލެއްވި އެވެ.

އެމްއައިބީ ގެސްޓްހައުސް ސިމްޕޯޒިއަމްގައި ބައިވެރިވާން ބޭނުންވާ އެގްޒިބިޓަރުންނާއި ވިޔަފާރި ހިޔާލުތަކާއި އިޖާދުތައް ހުށަހަޅަން ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލައިފަ އެވެ.

ގެސްޓް ހައުސް ސިމްޕޯޒިއަމް އޮންނާ އަންނަ މަހުގެ 10 ވަނަ ދުވަހު ކްރޮސްރޯޑްސްގަ އެވެ.