ޑައިވިން އަށް ގޮސް އުޅެނިކޮށް ގެއްލުނު ސައީދުގެ އަގު ވަޒަންކޮށް، އެވޯޑެއް!

ފުވައްމުލަކުގެ ޑައިވިން ޕޮއިންޓަށް ފައިބައިގެން އުޅެނިކޮށް ގެއްލުނު އެ ރަށުގެ މަޝްހޫރު ޑައިވަރު މުހައްމަދު ސައީދު ޓޫރިޒަމް ދާއިރާ އަށް ކޮށްދިން މަސައްކަތުގެ އަގު މިރޭ ވަޒަންކޮށްފި އެވެ.

ފުވައްމުލަކު ސިޓީ ކައުންސިލުން އިންތިޒާމުކޮށްގެން މިރޭ އެ ރަށުގައި ބޭއްވި "ފުވައްމުލައް ޓޫޒިޒަމް އެވޯޑް 2024" ވަނީ ގެސްޓް ހައުސްގެ ވިޔަފާރިކުރާ ފަރާތްތަކާއި ފުވައްމުލަކުގައި ޑައިވް ސެންޓަރުތައް ހިންގާ ފަރާތްތަކާއި ޓޫރިޒަމް ދާއިރާއަށް އެކި ގޮތްގޮތުން އެހީތެރިކަން ފޯރުކޮށްދިން ފަރާތްތަކުގެ އަގުވަޒަންކޮށް އެވޯޑު ދީފަ އެވެ.

އެ ރަސްމިއްޔާތުގައި ވަނީ ޑައިވިން އަށް ގޮސް އުޅެނިކޮށް މޭ 2022 ގައި ގެއްލުނު ސައީދު ޓޫރިޒަމް ދާއިރާ އަށް ކޮށްދިން މަސައްކަތްތަކުގެ އަގުވަޒަން ކުރުމުގެ ގޮތުން އެވޯޑެއް ދީފަ އެވެ. އެ އެވޯޑާ ހަވާލުވީ އޭނާގެ އަންހެން ދަރިފުޅެވެ.

ތިން ކުދިންގެ ބައްޕަ، ސައީދު ގެއްލިގެން އެމްއެންޑީއެފުން ވަނީ ކަނޑާއި ވައިގެ މަގުން، ހަފުތާއެއް ވަންދެން ބޮޑު ސަރަހައްދެއް ބަލައިފަ އެވެ. ސައީދު މަސް ހިފަން ގެންގުޅުނު އާލާތެއް 59 މީޓަރު އަޑިން ފެނުނު ނަމަވެސް އޭނާ ނުފެނުނެވެ.

މި އެވޯޑަކީ ފުވައްމުލަކުގެ ޓޫރިޒަމަށް 10 އަހަރު ފުރުމުގެ މުނާސަބަތުގައި ކައުންސިލުން އިންތިޒާމުކުރި ހަރަކާތެކެވެ.

ފުވައްމުލަކުގައި ލޯކަލް ޓޫރިޒަމް ފެށުނު ދުވަސްވަރުން ފެށިގެން އެ ރަށުގައި ޓޫރިޒަމް ދާއިރާއަށް އެކި ގޮތްގޮތުން އެހީތެރިކަން ފޯރުކޮށްދިން މީހުންނަށް އެވޯޑު ދިނެވެ. އަދި އެ ރަށުގައި ކުރިއަށް ގެންދިޔަ އަންޑަވޯޓާ ފޮޓޯގްރަފީ މުބާރާތުން އެކި ވަނަތަކަށް ދިޔަ މީހުންނަށް ވެސް ލިޔުމާއި އިނާމު ވަނީ ދީފަ އެވެ.

"ފުވައްމުލައް ޓޫރިޒަމް އެވޯޑު 2024" ގެ ރަސްމިއްޔާތުގައި ޓޫރިޒަމް މިނިސްޓަރު އިބްރާހިމް ފައިސަލާއި އައްޑޫގެ މޭޔަރު އަލީ ނިޒާރާއި މާލޭގެ މޭޔަރު އާދަމް އާޒިމް ވެސް ބައިވެރިވެވަޑައިގަތެވެ. އަދި ހުވަދޫ ކައުންސިލުގެ މެމްބަރުން ވެސް ބައިވެރިވެވަޑައިގަތެވެ.