އައިކެއާ ސުކޫކުގެ އިންވެސްޓަރުންނަށް 3.4 މިލިއަން ބަހައިފި

އައިކެއާ އިން އެ ކުންފުނީގެ ސުކޫކް ގައި އިންވެސްޓުކުރި ފަރާތްތަކަށް ފައިދާގެ ގޮތުގައި 3.4 މިލިއަން ރުފިޔާ ޖަމާކޮށްފި އެވެ.

އެއީ ހުޅުމާލޭގެ ލޮލުގެ ފަރުވާ އަށް ހާއްސަ ހޮސްޕިޓަލެއް އައިކެއާ ސެންޓަރުގެ ނަމުގައި ހެދުމަށް ބޭނުންވާ ފައިސާ ހޯދުމުގެ ގޮތުން އެ ކުންފުނިން ވިއްކި ސުކޫކެވެ. ލޮލުގެ ފަރުވާ އަށް ހާއްސަ ކޮށްގެން ރާއްޖޭގައި ހިންގާ ހަމައެކަނި ހޮސްޕިޓަލުން ވަނީ 30 މިލިއަން ރުފިޔާގެ ސުކޫކެއް ވިއްކައިފަ އެވެ.

އެ ސުކޫކްގެ އިންވެސްޓަރުންނަށް ފައިދާ ބަހަނީ ސުކޫކްގެ މުއްދަތު ކަމަށްވާ ފަސް އަހަރުގެ ތެރޭގައި ކޮންމެ އަހަރަކު 8 ޕަސެންޓުގެ ރޭޓުންނެވެ. މިއީ އައިކެއާ އިން ސުކޫކްގެ އިންވެސްޓަރުންނަށް ފައިދާ ބަހާ ފުރަތަމަ ފަހަރެވެ.

އެ ސުކޫކްގެ ލީޑް އެރޭންޖަރަކީ ފަސްޓް ނޭޝަނަލް އެވެ. ފަސްޓް ނޭޝަނަލް ލީޑް އެރޭންޖަރެއްގެ ގޮތުގައި އަމިއްލަ ކުންފުނިތަކަށް ބޭނުންވާ ފައިސާ ހޯދުމަށް، ބޮންޑާއި ސުކޫކު އަންނަނީ ވިއްކަމުންނެވެ. ފަސްޓް ނޭޝަނަލް މެދުވެރިކޮށް އެމްޕީއެލް އާއި ޔޫރޯ މާކެޓުން ވެސް ބޮންޑެއް އިޝޫ ކޮށްފައިވެ އެވެ.