ހިތުގެ ބައްޔަށް މަގުފަހިވާ ރިސްކުތަކަށް ހުށަހެޅިފައިވާ ވަރު އިތުރުވެއްޖެ: އެޗްޕީއޭ

ހިތުގެ ބަލި ޖެހުމަށް މަގުފަހިވެފައިވާ ރިސްކުތަކަށް ހުށަހެޅިފައިވާ ވަރު އިތުރު ވެފައިވާ ކަމަށް ހެލްތު ޕްރޮޓެކްޝަން ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.

ދުނިޔޭގެ ހިތުގެ ދުވަހާ ގުޅިގެން އެ އެޖެންސީން ނެރުނު ރިޕޯޓެއްގައި ބުނީ ގައިންގަޔަށް ނާރާ ބަލިތަކުގެ ރިސްކުތައް ދެނެގަންނަން ރާއްޖޭގައި 2020-2022 އަށް ހެދި ސްޓެޕް ސާވޭ ދައްކާ ގޮތުން ރާއްޖޭގައި 15-65 އަހަރާ ދެމެދުގެ 4.7 ޕަސެންޓް މީހުންނަކީ ހިތުގެ ބައްޔާއި ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުންނެވެ.

އޭގެ ތެރެއިން 27.7 ޕަސެންޓް މީހުންނަކީ އެ ބަލިތަކަށް ދިގު މުއްދަތަށް ބޭސް ބޭނުންކުރާ މީހުންނެވެ.

އެ ދިރާސާގެ ބައިވެރިންގެ މެދުގައި ހިތުގެ ބަލި ޖެހުމަށް ހުށަހެޅޭ ވަރު ދެނެގަތުމަށް ހެދި އެސެސްމެންޓުު ދައްކާ ގޮތުން އުމުރުން 40-69 އަހަރާ ދެމެދުގެ 2.3 ޕަސެންޓް މީހުންނަކީ 10 އަހަރުގެ ތެރޭގައި ހިތުގެ ބަލި ޖެހުމުގެ ފުރުސަތު އޮތް މީހުންނެވެ. އަދި 7.7 ޕަސެންޓް މީހުންނަށް ހިތުގެ ބަލި ޖެހުމުގެ ފުރުސަތު 10-20 ޕަސެންޓަށް އޮންނަ ކަމަށް ދިރާސާގައި ވެ އެވެ.

އެޗްޕީއޭއިން ބުނީ ހިތުގެ ބަލި ޖެހުމަށް މެދުވެރިވާ ރިސްކުތަކަށް މީހުން ހުށަހެޅިފައިވާ ވަރު އިތުރުވަމުންދާ ކަމަށެވެ. އެހެންވެ. ރައްކާތެރިކަމުގެ ފިޔަވަޅުތަކަށް ސަމާލުކަން ދެވިއްޖެ ނަމަ ހިތުގެ ބައްޔަށް ހުރި ނުރައްކާތައް ފާހަގަކޮށް، ދުރާލައި ފިޔަވަޅުތައް ދެނެގަނެ، ދުޅަހެޔޮ ސިއްހަތެއް ބައްޓަން ކުރުމަށްޓަކައި މަސައްކަތްކުރަންވީ ގޮތްތަކެއް އެކަށައެޅުމަށް ފަސޭހަ ވާނެ ކަމަށް ބުންޏެވެ.

ހިތުގެބަލީގެ ނުރައްކަލުން ސަލާމަތްވުމަށް ސަމާލުކަންދޭންވީ ކަންތައްތައް

- ކޮލެސްޓްރޯލް، ލޭގެ ޕްރެޝަރު އަދި ހަކުރު ހުންނަންވާ ވަރަށް ސަމާލުކަން ދިނުން

- ލޭގެ ޕްރެޝަރު ދެނެގަތުން. [ލޭގެ ޕްރެޝަރު މައްޗަށް ދިއުމަކީ ހިތުގެ ބައްޔަށް ހުރި އެންމެ ބޮޑު ނުރައްކާ. އެއީ ކުއްލި މަރު މެދުވެރިވާ އެންމެ ބޮޑު އެއް ސަބަބަށް ވެގެންދޭ. ގަވައިދުން ލޭގެ ޕްރެޝަރު ނުބަލާ ނަމަ އޭގެ އެއްވެސް އަލާމާތެއް ނުފެނި ހުއްޓާ ފުރާނައަށް ނުރައްކާވުމުގެ ފުރުސަތު ބޮޑުވެގެން ދޭ]

- ގަވައިދުން ޑޮކްޓަރަށް ދައްކައި ލޭގައި ކޮލެސްޓްރޯލް ހުރި ވަރު ދެނެގަތުން

- ބަރުދަން ހުންނަ ވަރު ގަވާއިދުން ބަލައި، އިސްކޮޅާ އެކަށީގެންވާ ވަރަށް ބަރުދަން ހުރިތޯ ބެލުން

- ކެއުމުގައި ތަރުކާރީ އާއި މޭވާ އަދި ޕްރޮޓީންސް ހިމެނުމާއި ސަރުބީ އާއި ކޮލެސްޓްރޯލް ހިމެނޭ ކާނާ މަދުކުރުން

- ކަސްރަތު ކުރުމާއި ހެލިފެލިވެ އުޅުން

- ކޮންމެ ހަފުތާއަކު މަދުވެގެން 150 މިނިޓް ވަންދެން ހިނގުން، ފެތުން ނުވަތަ ބައިސްކަލް ދުއްވުން ފަދަ އެރޮބިކް ކަސްރަތުތައް ކުރުން

- ދުންފަތާ ދުރުހެލިވުން

އެޗްޕީއޭއިން ބުނީ ހިތުގެ ބަލީގެ ސަބަބުން ބަލި ޖެހޭ މީހާ އަދި އެ އާއިލާތަކަށް ނަފްސާނީގޮތުންނާއި މާލީ ގޮތުން ގިނަ ގޮންޖެހުންތައް ކުރިމަތިވާ ކަމަށެވެ.

ވޯލްޑް ހާޓް ފެޑެރޭޝަންގެ ދިރާސާތަކާ ހަވާލާދީ އެޗްޕީއޭއިން ބުނީ ދިރިއުޅުމުގެ ވައްޓަފާޅި ރަނގަޅަށް ބައްޓަން ކުރުމުން ހިތުގެ ބަލީގައި މަރުވާ އަދި ނުކުޅެދުންތެރިކަން ދިމާވާ މީހުންގެ ޕަސެންޓް މަދުވާނެ އެވެ.