ޔުނައިޓެޑް ބަލިވުމުން ޓެން ހާގަށް ގޯސްވީ ފެނާންޑޭޒް އަށް ދެއްކި ރަތް ކާޑު

މެންޗެސްޓާ (ސެޕްޓެމްބަރު 29) - ޕްރިމިއާ ލީގުގައި ރޭ މެންޗެސްޓާ ޔުނައިޓެޑް އަމިއްލަ ދަނޑުގައި 3-0 އިން ޓޮޓެންހަމް އަތުން ބަލިވާން ދިމާވި މައިގަނޑު ސަބަބަކީ، ކެޕްޓަން ބްރޫނޯ ފެނާންޑޭޒް އަށް ރަތް ކާޑު ދެއްކުން ކަމަށް ކޯޗު އެރިކް ޓެން ހާގް ބުނެފި އެވެ.

"އަހަރެމެންނަށް މެޗުގެ ތެރެއަށް އަލުން އާދެވުނީސް އެހެން ނޫން ނަމަ. އަހަރެންނަށް ހީވަނީ މެޗު އެނބުރުނީ ރަތް ކާޑާ އެކު ހެން. އަހަރެންނަކަށް ހިއެއް ނުވޭ އެއީ ރަތް ކާޑެއް ހެނެއް،" މެޗަށް ފަހު ޓެން ހާގް ބުންޏެވެ.

"އަހަރެމެން ކުޅުންތެރިންގެ އިތުބާރު ވެސް ދަށްވި. ރަނގަޅަށް ބޯޅަ ވެސް ނުގެންގުޅެވޭ. އެއަށް ވުރެ ރަނގަޅަށް އެމީހުނަށް ކުޅެވޭނެކަން ހުރިހާ ކުޅުންތެރިންނަށް ވެސް އެނގޭނެ."

މެޗުގެ ތިންވަނަ މިނިޓުގައި ބްރޭނަން ޖޯންސަން ޓޮޓެންހަމަށް ލީޑު ނަގައިދީފައި ވަނިކޮށް، ފެނާންޑޭޒް އަށް ރަތް ކާޑު ދެއްކީ ފުރަތަމަ ހާފު ނިމެނިކޮށް، މެޗުގެ 42 ވަނަ މިނިޓުގައި ޓޮޓެންހަމްގެ ޖޭމްސް މެޑިސަން ހުއްޓުވަން އުޅުމުގެ ތެރޭގައި ކުރި ފައުލަކަށެވެ.

އެކަކު މަދުކޮށް މެޗު ފުރިހަމަ ކުރަން ޖެހުނު ޔުނައިޓެޑް ކޮޅަށް ޓޮޓެންހަމްގެ ދެ ވަނަ ލަނޑު ދެވަނަ ހާފު ފެށީގެން ދެ ވަނަ މިނިޓުގައި ޖަހައިދިނީ ޑިޔާން ކުލުސެވްސްކީ އެވެ. އަދި 77 ވަނަ މިނިޓުގައި ތިން ވަނަ ލަނޑު ޖަހައިދިނީ ޑޮމިނިކް ސޮލަންކޭ އެވެ.

ޓެން ހާގް ބުނީ ޔުނައިޓެޑުން ހެދޭ ގޯސްތަކުން ފިލާވަޅު ދަސްކުރަން ޖެހޭ ކަމަށާއި ނަމަވެސް އެކަން ނުފެންނާތީ ހިތާމަކުރާ ކަމަށެވެ.

"މިކަހަލަ ބައްޔަކަށް ފަހު އަހަރެން ބޭނުމެއް ނޫން ކުރިއެރުމުގެ ވާހަކަ ދައްކާކަށް. އެކަން ގަބޫލުކުރަން ޖެހޭނެ،" ޓެން ހާގް ބުންޏެވެ.

މިއީ ލީގުގައި މިހާތަނަށް ކުޅުނު ހަ މެޗުން ޔުނައިޓެޑް ބަލިވި ތިންވަނަ މެޗެވެ. އެޓީމު މޮޅުވެފައި ވަނީ ދެ މެޗުންނެވެ. އަދި މިހާތަނަށް ލިބުނު ހަތް ޕޮއިންޓާ އެކު ޔުނައިޓެޑް އަދި އޮތީ 12 ވަނައިގަ އެވެ.

ޓޮޓެންހަމް ވަނީ ލީގުގައި މިހާތަނަށް ހޯދި ތިންވަނަ މޮޅާ އެކު 10 ޕޮއިންޓް ހަމަކޮށް، އަށް ވަނައަށް ޖެހިލައިފަ އެވެ

އެސްޓަން ވިލާ ވަނީ ރޭ ރަށުން ބޭރުގައި އިޕްސްވިޗް ޓައުންއާ ވާދަކޮށް 2-2 އިން އެއްވަރުވެގެން، އެއް ވަނައިގައި އޮތް ލިވަޕޫލާ ޕޮއިންޓްގެ ގޮތުން އެއްވަރުކުރަން ލިބުނު ފުރުސަތު ނަގާލައިފަ އެވެ. ރޭ ހޯދި ޕޮއިންޓާ އެކު ޖުމްލަ 13 ޕޮއިންޓް ހޯދައިގެން ވިލާ އޮތީ ފަސް ވަނައިގަ އެވެ.

އަލަށް ޕްރިމިއާ ލީގަށް ޕްރޮމޯޓްވި އިޕްސްވިޗް ވަނީ ލީގުގައި އެންމެ ފަހުން ކުޅުނު ހަތަރު މެޗު ވެސް އެއްވަރު ކޮށްފަ އެވެ.