ޔުނައިޓެޑާއި ޗެލްސީ ޕޮއިންޓަކުން ފުއްދާލިއިރު ޓޮޓެންހަމް ބަލިވެއްޖެ

ލަންޑަން (ސެޕްޓެމްބަރު 6) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑާއި ޗެލްސީ ވެސް ޕޮއިންޓަކުން ފުއްދާލި އިރު، ބްރައިޓަން އިން އަމިއްލަ ދަނޑުގައި ފަހު ހާފުގައި ޖެހި ގޯލުތަކާ އެކު 3-2 އިން ޓޮޓެންހަމް ބަލިކޮށްފި އެވެ.

ޗެލްސީން 10 ކުޅުންތެރިންނާ އެކު ނިންމާލި ނޮޓިންހަމް ފޮރެސަޓާ ދެކޮޅަށް ކުޅުނު މެޗު 1-1 އިން އެއްވަރު ވެގެން ނިމުނު އިރު، މެންޗެސްޓާ ޔުނައިޓެޑް ރަށުން ބޭރުގައި އެސްޓަން ވިލާއާ ދެކޮޅަށް ކުޅުނު މެޗު އެއްވަރުވީ 0-0 އިންނެވެ.

މި ނަތީޖާއާއެކު ޗެލްސީ އާއި އެސްޓަން ވިލާ އާއި ޗެލްސީ އަށް ވަނީ 17 ޕޮއިންޓް ހޯދާފައިވާ މެންޗެސްޓާ ސިޓީ އާއި އާސެނަލްއާ ޕޮއިންޓަކަށް ގާތަށް ޖެހިލަން ލިބުނު ފުރުސަތު ނަގާލައިފަ އެވެ. ހަތަރުވަނައިގައި އޮތް ޗެލްސީ އާއި ފަސްވަނައިގައި އޮތް ވިލާއަށް ވެސް ވަނީ ހަތް މެޗުން 14 ޕޮއިންޓް ލިބިފަ އެވެ.

ހަވަނައިގައި އޮތީ ޓޮޓެންހަމް ބަލިކޮށް 12 ޕޮއިންޓް ހަމަކުރި ބްރައިޓަން އެވެ. ދިހަ ޕޮއިންޓާ އެކު ޓޮޓެންހަމް އޮތީ ނުވަވަނައިގަ އެވެ. އަދި މެންޗެސްޓާ ޔުނައިޓެޑް އޮތީ އަށް ޕޮއިންޓާ އެކު 14 ވަނައިގަ އެވެ.

ޓޮޓެންހަމުން ވަނީ ފުރަތަމަ ހާފުގައި ބްރޭނަން ޖޯންސަން އާއި ޖޭމްސް މެޑިސަންގެ ގޯލުތަކުން ދެ ގޯލުގެ ލީޑެއް ނަގައިފަ އެވެ. ނަމަވެސް ބްރައިޓަންގެ ޔަންކުބާ މިންޓޭ ވަނީ ފަހު ހާފު ފެށިގެން ތިންވަނަ މިނިޓުގައި ފުރަތަމަ ގޯލު ޖަހައި ފަރަގު ކުޑަ ކޮށްފަ އެވެ. އޭގެ 10 މިނިޓު ފަހުން ބްރައިޓަން އަށް ނަތީޖާ އެއްވަރު ކޮށްދިނީ ޖޯޖީނިއޯ ރަޓާ އެވެ.

ނަތީޖާ އެއްވަރުކުރިތާ އަށް މިނިޓު ފަހުން ބްރައިޓަން އަށް ލީޑު ނަގައިދިން ގޯލު ޖެހީ ޑެނީ ވެލްބެކް އެވެ.

ޓޮޓެންހަމުން ވަނީ މި މެޗުގެ ކުރިން މިދިޔަ ހަފްތާ ލީގުގައި ޔުނައިޓެޑްގެ ދަނޑުގައި ތަފާތު ބޮޑު ނަތީޖާއަކުން މޮޅުވެފަ އެވެ. އެ މެޗުގައި ޔުނައިޓެޑްގެ ކެޕްޓަން ބްރޫނޯ ފެނާންޑޭޒް އަށް ރަތް ކާޑު ދެއްކުމުން ތިން މެޗަށް ސަސްޕެންޑް ވާނެ ކަމަށް ހީކުރެވުނަސް، ޔުނައިޓެޑުން ވަނީ މައްސަލަ އެޕީލް ކޮށް ކާމިޔާބު ހޯދައިފަ އެވެ.

މިރޭގެ މެޗުގައި ހިލޭޖެހުމަކުން ފެނާންޑޭޒް ފޮނުވާލި ބޯޅައެއް ގޯލުގެ ދަނޑިއާ އަމާޒު ވެފައި ވާއިރު މާކަސް ރަޝްފޯޑާއި އެންޓޮނީ ފޮނުވާލި ހަމަލާތަކެއް ވިލާގެ ކީޕަރު އެމީ މާޓިނޭޒް ވަނީ ދިފާއު ކޮށްފަ އެވެ.

މި މެޗުގައި ޔުނައިޓެޑްގެ ދެ ޑިފެންޑަރުން ކަމަށްވާ ހެރީ މެގުއާ އާއި ނުސެއިރު މަޒްރާއީ އަށް ވަނީ އަނިޔާވެގެން ބަދަލުކޮށްފަ އެވެ.

ފޮރެސްޓާ ދެކޮޅަށް ޗެލްސީ އަށް މެޗުގެ ފުރަތަމަ ހާފުގައި ލިބުނު ފުރުސަތުތައް ބޭނުން ނުކުރެވުނު އިރު ދެވަނަ ހާފު ފެށިގެން މާ ގިނައިރުތަކެއް ނުވެ ފޮރެސްޓްގެ ކްރިސް ވުޑް ވަނީ ޗެލްސީގެ ދަނޑުގައި އެޓީމަށް ލީޑު ނަގައިދީފަ އެވެ. ޗެލްސީން އެއްވަރުކުރީ ނޮނީ މަޑުއެކޭ ޖަހައިދިން ގޯލުންނެވެ.

މެޗުގެ ފުރިހަމަ ވަގުތު ހަމަވާން 12 މިނިޓަށް ވެފައި ވަނިކޮށް ޖޭމްސް ވާޑް ޕްރައުސް އަށް ރަތް ކާޑު ދެއްކުމާ ގުޅިގެން، އެކަކު މަދުކޮށް ކުޅެމުން ދިޔަ ފޮރެސްޓްގެ ގޯލްކީޕަރު މެޓްޒް ސެލްސް ވަނީ، ފަހު ވަގުތު ޗެލްސީން ގޯލާ އަމާޒުކޮށް ފޮނުވާލި ގިނަ ހަމަލާތަކެއް ހުށިޔާރުކަމާ އެކު ދިފާއު ކޮށްފަ އެވެ.