ޖަލަށް މަނާ ތަކެތި ވެއްދި މައްސަލާގައި އޮފިސަރަކު ބަންދުކުރީ ގޯސްކޮށް: ހައި ކޯޓް

މާފުށީ ޖަލަށް ވަގަށް މަސްތުވާތަކެއްޗާއި ފޯނު ވައްދައިގެން ގިނަ އަދަދެއްގެ ފައިސާ ހޯދި ކަމަށް ތުހުމަތު ކުރެވޭ މައްސަލާގައި ހައްޔަރުކުރި ކަރެކްޝަނަލް ސާވިސްގެ އޮފިސަރުންގެ ތެރެއިން އެކަކު ޝަރީއަތް ނިމެންދެން ބަންދުކުރީ ގޯސްކޮށް ކަމަށް ހައި ކޯޓުން އިއްޔެ ހުކުމްކޮށްފި އެވެ.

މިދިޔަ ޖޫން މަހު ކ. މާފުށީ ޖަލުގައި ފުލުހުން ހިންގި އޮޕަރޭޝަނެއްގައި ކަރެކްޝަންސްގެ 18 މީހަކު ހައްޔަރުކުރި އެވެ. އޭގެ ތެރެއިން މާފުށިން ހައްޔަރުކުރި މީހަކު ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ނެރުނު އަމުރު ހައި ކޯޓުން ބާތިލްކުރީ އެ މައްސަލަ އޭނާގެ ފަރާތުން އިސްތިއުނާފް ކުރުމުންނެވެ.

ނަމަވެސް އެ މައްސަލާގައި ހެކި ނެތުމުގެ ސަބަބުން އެ މީހާގެ މައްޗަށް ދައުވާއެއް ނުކުރެ އެވެ.

ހައި ކޯޓުން އިއްޔެ ކުރި ހުކުމުގައިވަނީ އެ މީހާ ހައްޔަރުކުރީ މާފުށިން ކަމަށް ވާތީ ޖިނާއީ އިޖްރައާތުގެ ގަވާއިދު އޮންނަ ގޮތުން، އޭނާގެ ބަންދާ މެދު ގޮތެއް ނިންމަން ހާޒިރުކުރަން ޖެހޭނީ އެރަށު ކޯޓަށް ކަމަށެވެ. އަދި އޭނާގެ ބަންދާ މެދު ގޮތެއް ނިންމަން ކްރިމިނަލް ކޯޓަށް ގެންދިޔައީ މާފުށީ ޕޮލިސް ސްޓޭޝަންގައި ވަސީލަތްތައް ނެތުމުން އޭނާ މާލެ ގެނެސްފައިވާތީ ކަމަށް ދައުލަތުން ބުންޏަސް، ކްރިމިނަލް ކޯޓަށް އޭނާގެ ބަންދާ މެދު ގޮތެއް ނުނިންމޭނެ ކަމަށް ހައި ކޯޓުގެ ހުކުމުގައިވެ އެވެ.

އެހެންވެ ހައި ކޯޓުން ކުރި ހުކުމުގައިވަނީ އެ މީހާ ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ނެރުނު އަމުރު ބާތިލް ކަމަށެވެ.

އެ އޮޕަރޭޝަނަށްފަހު ފުލުހުން ބުނެފައިވަނީ ޖަލަށް ވަގަށް ތަކެތި ވެއްދުމުގައި ޖަލު އޮފިސަރުންގެ 18 މީހަކު ބައިވެރިވި ކަމަށެވެ. އެ މީހުންގެ އެކައުންޓުތަކަށް އަހަރެއްހާ ދުވަހުގެ ތެރޭގައި 73.6 މިލިއަން ރުފިޔާ ޖަމާވި ކަމަށް ފުލުހުން ބުނެ އެވެ. ނަމަވެސް އެ މައްސަލާގައި ދައުލަތުން ދައުވާކުރަނީ ފަސް މީހެއްގެ މައްޗަށެވެ.

އެ މައްސަލާގައި ދައުލަތުން ދައުވާކުރާ ފަސް މީހުންގެ ތެރެއިން ތިން މީހަކާ އެކު އިއުތިރާފްގެ އެއްބަސްވުމެއް ދައުލަތުން ވަނީ ހަދައިފަ އެވެ.