ޖަލު އޮފިސަރުންގެ މައްސަލަ: އެންމެން ބަންދުން ދޫކޮށްލަން ދައުލަތުން އެއްބަސްވެއްޖެ

ކ. މާފުށީ ޖަލަށް ވަގަށް ފޯނާއި މަސްތުވާތަކެތި ވައްދައިގެން ގިނަ އަދަދެއްގެ ފައިސާ ހޯދި ކަމުގެ ތުހުމަތުގައި ޝަރީއަތް ނިމެންދެން ބަންދު ކޮށްފައިވާ ހަތަރު މީހަކު ބަންދުން ދޫކޮށްލަން ދައުލަތުން ކްރިމިނަލް ކޯޓުގައި މިއަދު އެއްބަސްވެއްޖެ އެވެ.

މިދިޔަ ޖޫން މަހު ފުލުހުން ހިންގި އޮޕަރޭޝަނެއްގައި، ޖަލަށް މަސްތުވާތަކެއްޗާއި ފޯނު ވައްދައިގެން 73 މިލިއަނަށް ވުރެ ގިނަ ރުފިިޔާ އެކި ފަހަރު މަތިން ހޯދި މައްސަލާގައި ކަރެކްޝަންސްގެ 18 އަށް ވުރެ ގިނަ އޮފިސަރުން ހައްޔަރުކުރި ނަމަވެސް އެ މައްސަލާގައި ދައުލަތުން ދައުވާކުރަނީ ފަސް މީހެއްގެ މައްޗަށެވެ.

އެއީ ރ. އުނގޫފާރު އައިވަރީހައުސް ޖިނާހް އަބްދުއްރަހީމާއި މ. ލަންދޫ ކާމިނީގޭ އަލީ އަސްފާގާއި ކ. މާފުށީ ބީޗްހައުސް އަލީ ޝަހީމާއި ގއ. ވިލިނގިލީ ކުއްޅަވައްގޭ މުހައްމަދު ފަތޫހު ފަތުހުﷲ އާއި ހދ. ނޭކުރެންދޫ ތަރާނާގޭ އަލީ ނާޒިމްގެ މައްޗަށެވެ.

އޭގެ ތެރެއިން ފަތޫހު ފިޔަވައި ދެން ތިބި އެންމެން އަދިވެސް ތިބީ ބަންދުގަ އެވެ.

ބާކީ ތިބި ހަތަރު މީހުން ބަންދުން ދޫކުރަން އެދި އެ މީހުންގެ ފަރާތުން ހުށަހެޅުމުން ކްރިމިނަލް ކޯޓުން މިއަދު ބޭއްވި އަޑުއެހުމުގައި އެ މީހުންގެ ދިފާއީ ވަކީލުން ބުނީ، އެ މައްސަލާގައި ހައްޔަރުކުރި އެހެން މީހަކު ކްރިމިނަލް ކޯޓުން ބަންދުކުރީ އިހްތިސާސެއް ނެތި، ގާނޫނާ ހިލާފަށް ކަމަށް ހައި ކޯޓުން ނިންމާފައިވާ ކަމަށެވެ. އެ ހަތަރު މީހުން ވެސް ބަންދު ކޮށްފައިވަނީ އެ އުސޫލުން ކަމަށް ވާތީ ހައި ކޯޓުގެ ހުކުމަށް ރިއާޔަތްކޮށް، އެ މީހުން ވެސް ބަންދުން ދޫކުރަން ވަކީލުން އެދުނެވެ.

ދައުލަތުން ވެސް ބުނީ ހައި ކޯޓުގެ ހުކުމަށް ރިއާޔަތް ކުރާއިރު އެ މީހުން މިހާރު ބަންދުން ދޫކޮށްލަން ޖެހޭ ކަމަށެވެ. ނަމަވެސް މައްސަލާގެ ބާވަތަށް ބަލައި، އެ މީހުންގެ ޕާސްޕޯޓް ހިފެހެއްޓުމަށާއި އިތުރު ޝަރުތުތަކެއް ކުރަން ދައުލަތުން އެދުނެވެ.

އެ މީހުން ދޫކޮށްލަން ދައުލަތުން އެއްބަސްވުމުން، އެ މައްސަލަ ބައްލަވާ ގާޒީ އިސްމާއިލް ޝަފީއު ދައުލަތާ ސުވާލުތަކެއް ކުރިމަތި ކުރެއްވި އެވެ. ގާޒީ ވިދާޅުވީ އެ މީހުން ބަންދުކުރީ މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެތީ ކަމަށް ބުނެ ދައުލަތުން އެދިގެން ކަމަށާއި އެހެންވެ، މިހާރު އެ މީހުން ދޫކޮށްލަން އެއްބަސްވަނީ އެ މީހުންގެ ފަރާތުން ނުރައްކަލެއް ނެތް ކަމަށް ގަބޫލު ކުރެވިގެންތޯ ވިދާޅުވެ، ގާޒީ ސުވާލު ކުރެއްވި އެވެ.

އެ މައްސަލާގައި އިއުތިރާފްގެ އެއްބަސްވުމެއް ހަދާފައިވާއިރު، އެ އެއްބަސްވުމުގެ ދަށުން ވެސް ޖަލު ހުކުމްތައް އައުމުގެ ފުރުސަތު އޮތްއިރު، އެ މީހުން ބަންދުން ދޫކޮށްލަން ދައުލަތުން ބޭނުންވަނީ ކީއްވެގެންތޯ ގާޒީ ސުވާލު ކުރެއްވި އެވެ.

ޖަވާބުގައި ދައުލަތުން ބުނީ އޭރު ތަހުގީގު މަރުހަލާގައި ބަންދުކުރީ މުޖުތަމައުގެ ސަލާމަތަށް ނުރައްކާތަކެއް އޮވެގެން ކަމަށާއި ނަމަވެސް މިހާރު އެ ނުރައްކާތައް ކޮންމެވެސް ވަރަކަށް ކުޑަވެފައިވާ ކަމަށް ބެލެވޭ ކަމަށެވެ. ފައިސާ ހިމެނޭ މައްސަލަތަކުގައި މިހާރު އަމަލުކުރަނީ އެގޮތަށް ކަމަށް ދައުލަތުން ބުންޏެވެ.

ދެ ފަރާތުގެ ވާހަކަތަކަށް ފަހު ގާޒީ ޝަފީއު ވިދާޅުވީ އެ މައްސަލާގައި ބަންދާ މެދު ނިންމާ ނިންމެވުން ފަހުން އިއުލާން ކުރައްވާނެ ކަމަށެވެ.

އެ މައްސަލާގައި އެ މީހުންގެ މައްޗަށް ގިނަ ދައުވާތަކެއް ދައުލަތުން ކުރެ އެވެ. އޭގެ ތެރޭގައި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އާއި މަނީ ލޯންޑްރިންގެ ދައުވާ އާއި ނުހައްގު މުއްސަނދިކަން ހޯދުމުގެ ދައުވާ ވެސް ހިމެނެ އެވެ.