ފުޅާ ދާއިރާއެއްގައި ހަށިވިއްކަމުންދިޔަ ބަޔަކު ހައްޔަރުކޮށްފި

ރާއްޖޭގައި ފުޅާ ދާއިރާއެއްގައި ހަށި ވިއްކުމުގެ ވިޔަފާރިކުރި ބިދޭސީންތަކެއް އިމިގްރޭޝަނުން އަތުލައިގެންފި އެވެ.

އެ މީހުން އަތުލައިގެންފައި ވަނީ ހަށިވިއްކުމުގެ ވިޔަފާރިކުރާ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން މިދިޔަ މަހާއި އޮގަސްޓް މަހު ހިންގި އޮޕަރޭޝަނުންނެވެ.

އެ އޮޕަރޭޝަންގައި ފަސް އަންހެނަކާއި ފިރިހެނަކު ހައްޔަރުކޮށްފައިވާ ކަމަށް އިމިގްރޭޝަނުން ބުންޏެވެ.

އެއީ ކޮން ގައުމަކަށް ނިސްބަތްވާ މީހުން ކަމެއް ހާމަ ނުކުރި ނަމަވެސް އެ މައްސަލަ ތަހުގީގު ކުރުމަށްފަހު އޭގެ ތެރެއިން ތިން ބިދޭސީން ޑީޕޯޓުކޮށްފައިވާ ކަމަށާއި ބާކީ ތިން ބިދޭސީން ޑީޕޯޓް ކުރުމުގެ މަސައްކަތް ކުރަމުންދާ ކަމަށް އިމިގްރޭޝަނުން ބުންޏެވެ.

މާލޭގައި ޕްރޮފެޝަނަލް މަސާޖުކުރާ ކަމަށް ބުނެ ގިނަ އަދަދަކަށް މަސާޖު ޕާލާތައް ހިންގި ނަމަވެސް އެއީ ފުޅާ ދާއިރާއެއްގައި ހަށިވިއްކާ ތަންތަން ކަމުގެ ތުހުމަތު އެތައް ބަޔަކު ކުރެ އެވެ. އަދި އެކަންކުރާ ބިދޭސީ މީހުން ދަނީ އެ މީހުންގެ ފޮޓޯ އާއި ނަމްބަރު ވެސް ޖަހައިގެން ސޯޝަލް މީޑިއާގައި އިޝްތިހާރު ކުރަމުންނެވެ.

އެ ގޮތަށް ހިންގާ ސްޕާތައް ހުއްޓުވުމަށް ދޭތެރެ ދޭތެރެއިން އޮޕަރޭޝަންތައް ހިންގަ އެވެ. ނަމަވެސް ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފަށާފައިވާ މަސައްކަތުގައި، ބިދޭސީން ދިރިއުޅޭ ތަންތަން ފާސް ކުރުމާއި ގަވާއިދާ ހިލާފަށް އުޅޭ ބިދޭސީން ހޯދުމުގެ ހާއްސަ އޮޕަރޭޝަނެއް މިހާރު ދަނީ ކުރިއަށެވެ.

ގަވާއިދާ ހިލާފަށް އުޅޭ ބިދޭސީން ހޯދައި، އެ މީހުން ރާއްޖެއިން ފޮނުވާލަން ކުރިއަށް ގެންދާ އޮޕަރޭޝަނުގައި މިހާތަނަށް 3،000 އަށް ވުރެ ގިނަ ބިދޭސީން ޑީޕޯޓްކޮށްފައިވެ އެވެ. މިހާރު ވެސް އެ އޮޕަރޭޝަން ކުރިއަށް ގެންދާއިރު، ބައެއް ބިދޭސީން ވަނީ ފިލަން ބައެއް ރަށްރަށަށް ވެސް ގޮސްފަ އެވެ.

ބިދޭސީން ހޯދައި ޑީޕޯޓްކުރަން ފެށުމުން، ބިދޭސީ ފިރިހެނުން ދިވެހި އަންހެނުންނާ ކައިވެނި ކުރަން ފެމިލީ ކޯޓަށް ހުށަހަޅާ މިންވަރު ކުއްލިއަކަށް އިތުރުވެފައިވާ ކަމަށް ވެސް ކޯޓުން ވަނީ ބުނެފަ އެވެ. ދިވެއްސަކާ ކައިވެނިކުރުމުން ރާއްޖޭގައި ހުރުމަށް ވިސާ ލިބެ އެވެ.