ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރި ދެ މީހަކު ޑީޕޯޓްކޮށްފި

ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރި ދެ ބިދޭސީއަކު ރާއްޖެއިން ޑީޕޯޓުކޮށްފި އެވެ.

އިމިގްރޭޝަނުން ސޯޝަލް މީޑިއާގައި މިއަދު ކުރި ޕޯސްޓުގައި ބުނީ ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރާ ކަމަށް ތުހުމަތުވާ ބިދޭސީން ހޯދަން ފުލުހުންނާ ގުޅިގެން ހިންގި ހާއްސަ އޮޕަރޭޝަންތަކަކުން ހަތަރު އަންހެނަކާއި ތިން ފިރިހެނަކު އެ އިދާރާގެ ބެލުމުގެ ދަށަށް ގެންގޮސްފައިވާ ކަމަށެވެ.

އެ މައްސަލަތައް އިތުރަށް ތަހުގީގު ކުރުމަށްފަހު، ރާއްޖެ އަނބުރާ ނާދެވޭ ގޮތަށް ދެ އަންހެނަކު ވަނީ ޑީޕޯޓުކޮށްފަ އެވެ. އެއީ ޔުގެންޑާއަށް ނިސްބަތްވާ 38 އަހަރުގެ މީހަކާއި ރަޝިޔާގެ 25 އަހަރު މީހެކެވެ. އޭގެ އިތުރުން އިތުރު ފަސް ބިދޭސީއަކު ރާއްޖެއިން ފޮނުވާލުމުގެ މަސައްކަތް ކުރަމުން އަންނަ ކަމަށް ބުންޏެވެ.

އިމިގްރޭޝަނުން މީގެ ކުރިން ވެސް ވަނީ ރާއްޖޭގައި ހަށިވިއްކުމުގައި އުޅުނު ގިނަ އަދަދެއްގެ ބިދޭސީން ހިފަހައްޓައި، ޑީޕޯޓްކޮށްފަ އެވެ.

ގަވާއިދާ ހިލާފަށް ރާއްޖޭގައި އުޅޭ ބިދޭސީން ހުއްޓުވުމަށް އިމިގްރޭޝަނުން ހިންގާ އޮޕަރޭޝަންތަކުގައި މިހާތަނަށް ވަނީ 5،000 އަށް ވުރެ ގިނަ މީހުން ޑީޕޯޓްކޮށްފަ އެވެ.