ނުރައްކާތެރި ކެމިކަލް ގުދަންކުރާ 31 ތަނަކާއި ކެމިކަލް ވިއްކާ 24 ފިހާރަ މާލޭގައި!

ނުރައްކާތެރި ކެމިކަލް ގެންގުޅޭ 55 ތަނެއް މާލޭގައި އެބަހުރި ކަމަށް ޑިފެންސް މިނިސްޓްރީން ބުނެފި އެވެ.

ކެމިކަލާ ބެހޭ ގަވާއިދުގައި ބަޔާންކޮށްފައިވާ މިންގަނޑަށް ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހުރިތޯ ބެލުމާއި އެ މިންގަނޑަށް ހޭލުންތެރިކުރުމަށް "އޮޕަރޭޝަން ހިރާސް ފާސް" ނަމުގައި އެ މިނިސްޓްރީން އޮޕަރޭޝަނެއް ފެށީ މިދިޔަ އަންގާރަ ދުވަހު އެވެ.

ސޯޝަލް މީޑިއާގައި ކުރި ޕޯސްޓެއްގައި ޑިފެންސް މިނިސްޓްރީން ބުނީ އެ އޮޕަރޭޝަންގެ ދަށުން ފުރަތަމަ ތިން ދުވަހުގެ އިންސްޕެކްޝަންގައި މީހުން ދިރިއުޅޭ 347 އިމާރާތެއް ބަލާފައިވާ ކަމަށެވެ. އަދި ނުރައްކާތެރި ކެމިކަލް ގުދަންކުރާ 31 ގުދަނަކާއި ކެމިކަލް ވިއްކާ 24 ފިހާރައެއް ބަލައި މައުލޫމާތު އެއްކޮށްފައިވާ ކަމަށް ބުންޏެވެ.

މި މަހުގެ 15 ގެ ނިޔަލަށް ކުރިއަށް ގެންދާ އެ އޮޕަރޭޝަނުގައި، ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބަލާނެ އެވެ. މާލޭ ސަރަަހައްދުގައި ފަސޭހައިން އަލިފާން ރޯވާ ފަދަ ތަންތަނާއި އެ ތަންތަނުގައި ހުރި ދަތިތައް ވެސް މި އޮޕަރޭޝަނުގެ ތެރެއިން ދެނެގަންނާނެ ކަމަށް ޑިފެންސް މިނިސްޓްރީން ބުންޏެވެ.

ޑިފެންސް މިނިސްޓްރީން އެފަދަ އޮޕަރޭޝަނެއް ފަށާފައި މިވަނީ ކެމިކަލް ގެންގުޅުމާއި ގުދަންކުރުމުގައި ބައެއް މީހުން ގަވާއިދާ ހިލާފުވާ ކަމުގެ ޝަކުވާ ވެސް އެ މިނިސްޓްރީ އަށް ލިބެމުންދަނިކޮށެވެ.

އެއްވެސް ބާވަތެއްގެ ކެމިކަލެއް މާލޭގެ އެއްވެސް ތަނެއްގައި ގުދަން ކުރުމަކީ މިހާރު މަނާ ކަމެކެވެ. އެކަމަށް ސަރުކާރުން ވަނީ ހުޅުމާލެއިން ބިން ހަމަޖައްސައިފަ އެވެ.

މާލޭގައި ކެމިކަލް ގުދަންކުރުން ސަރުކާރުން މަނާކުރީ ސެޕްޓެމްބަރު 20، 2019 ގައި ހ. ތިލަފުށިގޭގައި ހުރި ކެމިކަލް ގުދަނުގައި ރޯވެ ހިނގި އަލިފާނުގެ ނުރައްކާތެރި ހާދިސާ އަށް ފަހު އެވެ. އެކަކު މަރުވެ، ހަތަރު ސަތޭކައެއްހާ މީހުން ވަގުތީ ބޯހިޔާވަހި ކަމަށް ބަދަލުކުރަން ޖެހުނު އެ ހާދިސާގައި ކެމިކަލް ރައްކާކުރާ ހަތަރު ގުދަނަކާއި ހަ ގެއެއް އަނދައި ހުލިވި އެވެ.