މި ހަފުތާގައި ރާއްޖޭގެ ބޮޑު ސަރަހައްދަކަށް މޫސުން ގޯސް

މި ހަފުތާގައި ރާއްޖޭގެ ބޮޑު ސަރަހައްދަކަށް މޫސުން ގޯސްވާނެ ކަމަށް މެޓް އޮފީހުން މިއަދު ލަފާކޮށްފި އެވެ.

މެޓް އޮފީހުގެ އޮފިޝަލަކު ވިދާޅުވީ މޫސުން އެންމެ ގޯސްވާނެ ކަމަށް ލަފާ ކުރެވެނީ ރާއްޖޭގެ އުތުރާއި މެދު ރާއްޖެ ތެރޭގެ އަތޮޅުތަކަށް ކަމަށެވެ. އެ އަތޮޅުތަކުގެ ރަށްތަކަށް ބޯކޮށް ވާރޭވެހި، ވައި ގަދަވުން އެކަށީގެންވާ ކަމަށާއި އަދި އެ ސަރަހައްދުގެ ކަނޑުތައް ވެސް ގަދަވާނެ ކަމަށް ލަފާކުރެވޭ ކަމަށް ވިދާޅުވި އެވެ.

"ލ. އަތޮޅުން ފެށިގެން ރާއްޖޭގެ އުތުރަށް މި އޮންނަ އަތޮޅުތަކަށް މޫސުން އެންމެ ގޯސްވާނެ ކަމަށް ބެލެވެނީ. އަދި ދެކުނުގެ އަތޮޅުތަކަށް ވެސް ވިއްސާރަ ކުރާނެ،" އޭނާ ވިދާޅުވި އެވެ

"މިހާރު ބެލެވޭ ގޮތުގައި، މި އަންނަ ހޮނިހިރު ދުވަހާ ހަމައަށް ވައިގަދަވެ، ކަނޑުތައް ވެސް ގަދަވާނެ."

އުތުރާއި މެދު ރާއްޖެ ތެރޭގެ އަތޮޅުތަކަށް އާންމު ގޮތެއްގައި ވައި ޖެހޭނީ 15 މޭލާއި 25 މޭލާ ދެމެދުގެ ބާރުމިނުގަ އެވެ. އަދި ދެކުނުގެ އަތޮޅުތަކަށް ވައި ޖެހޭނީ 13 މޭލާއި 23 މޭލާ ދެމެދުގެ ބާރުމިނުގަ އެވެ. އެކަމަކު، ވިލާގަނޑުގައި 45 މޭލާއި 55 މޭލާ ދެމެދުގެ ބާރުމިނުގައި ވައި ޖެހުން އެކަށީގެންވެ އެވެ.

ގަދަ ވަޔާ އެކު ކަނޑުތައް ގަދަވެ އަދި ބޯކޮށް ވާރޭ ވެހޭނެތީ މޫސުމަށް ހާއްސަ ސަމާލުކަމެއް ދިނުމަށް މެޓް އޮފީހުން ވަނީ އާންމުންނަށް އިލްތިމާސްކޮށްފަ އެވެ.

މި ހަފުތާގައި އެންމެ ވިއްސާރަ ކުރާނެ ދުވަހެއް ކަމަށް ބެލެވެނީ އަންނަ ބުދަ ދުވަހެވެ.

މިހާރު ރާއްޖެއަށް މި ކުރަނީ ހުޅަނގު މޫސުމުގެ ވިއްސާރަ އެވެ. ސެޕްޓެމްބަރު މަހުގެ ފަހުކޮޅާއި އޮކްޓޯބަރު މަހުގެ ކުރީކޮޅަކީ އާންމު ގޮތެއްގައި ވެސް ރާއްޖެއަށް މޫސުން ގޯސް ދުވަސްވަރެކެވެ.

މެޓް އޮފީހުން މިދިޔަ ބުރާސްފަތި ދުވަހު ނެރުނު ނޫސްބަޔާނެއްގައި ބުނީ މި ހިނގާ އޮކްޓޯބަރު މަހާއި އަންނަ މަހާއި އަދި ޑިސެމްބަރު މަހު ރާއްޖޭގެ ގިނަ ސަރަހައްދުތަކަށް ވާރޭ ވެހޭނެ ކަމަށް ލަފާ ކުރެވެނީ އާންމުކޮށް މި ދުވަސްވަރު ވެހޭ މިންވަރަށް ވުރެ މަދުން ކަމަށެވެ. ނަމަވެސް، އުތުރުގެ ބައެއް އަތޮޅުތަކަށް އާންމުކޮށް މި ދުވަސްވަރު ވެހޭ ވަރަށް ނުވަތަ އެއަށް ވުރެ އިތުރަށް ވާރޭ ވެހުމަކީ އެކަށީގެންވާ ކަމެއް ކަމަށް ވެސް އެ އޮފީހުން ބުންޏެވެ.

"ރާއްޖޭގެ ހުރިހާ ސަރަހައްދެއްގައި ވެސް ފިނިހޫނުމިން އެންމެ މަތިވެގެން ދާނެ ވަރާއި އެންމެ ދަށްވެގެން ދާނެ ވަރު އާންމުކޮށް މި ދުވަސްވަރު ހުންނަ ވަރަށް ވުރެ މަތިވާނެ ކަމަށް ލަފާކުރެވެ އެވެ،" މެޓް އޮފީހުން ބުންޏެވެ.

ހުޅަނގު މޫސުން ނިމި، ރާއްޖެއަށް އިރުވައި މޫސުން ފެށޭނީ އަންނަ ޑިސެމްބަރު މަހު އެވެ.