ޝާދިޔާ ބަންދުކުރި މައްސަލާގައި ބަދަލު ނަގައިދޭން ހައި ކޯޓުގައި އެދެފި

އެމްބަސީތައް ކައިރީގައި އިޒްރޭލާ ދެކޮޅަށް އަޑުއުފުލި މައްސަލާގައި ދީނީ އިލްމުވެރިޔާ ޑރ. މުހައްމަދު އިޔާޒްގެ އަނބިކަނބަލުން އައިޝަތު ޝާދިޔާ ހައްޔަރުކޮށް، ބަންދުކުރި މައްސަލާގައި ގެއްލުމުގެ ބަދަލު ނަގައިދޭން އޭނާގެ ފަރާތުން ހައި ކޯޓުގައި މިއަދު އެދެފި އެވެ.

ރާއްޖޭގައި ހުންނަ ބޭރުގެ އެމްބަސީތައް ކައިރީގައި އިޒްރޭލާ ދެކޮޅަށް އަޑުއުފުލި މައްސަލާގައި މިދިޔަ މަހު ޝާދިޔާގެ އިތުރު ޑރ. ޝަޒްރާ އިބްރާހިމް ހައްޔަރުކޮށް، ދެ ފަހަރެއްގެ މަތިން ބަންދުގެ މުއްދަތު އިތުރުކުރި އެވެ. އެ މީހުން މިހާރު ތިބީ ޝަރުތުތަކާ އެކު ބަންދުން ދޫކޮށްލައިފަ އެވެ.

ޝާދިޔާ ބަންދުކުރި މައްސަލަ އޭނާގެ ފަރާތުން އިސްތިއުނާފް ކުރުމުން ހައި ކޯޓުގައި މިއަދު ބޭއްވި އަޑުއެހުމުގައި ޝާދިޔާގެ ވަކީލް ނޫރުއްސަލާމް އަބޫބަކުރު ވިދާޅުވީ، ގާނޫނާ ހިލާފަށް މީހަކު ބަންދުކޮށްފިނަމަ އެކަމުގެ ބަދަލު ދޭންޖެހޭނެ ކަމަށް ގާނޫނު އަސާސީގައި ބުނާއިރު، އެ މައްސަލާގައި ޝާދިޔާ ބަންދުކުރީ ގާނޫނާ ހިލާފަށް ކަމަށްވާތީ އެކަމުގެ ބަދަލު ދޭންޖެހޭނެ ކަމަށެވެ. އެހެންވެ، އެ މައްސަލަ ހައި ކޯޓުން ނިންމާއިރު ބަދަލު ދޭން ދައުލަތުގެ މައްޗަށް އަމުރުކޮށްދޭން ވަކީލް އެދިވަޑައިގަތެވެ.

ވަކީލް ވިދާޅުވީ ކުރީގެ ރައީސް އަބްދުﷲ ޔާމީން ގާނޫނާ ހިލާފަށް ބަންދުކުރި މައްސަލާގައި ސިވިލް ކޯޓުން ކުރިން ބަދަލު ނަގައިދިން ކަމަށާއި ހަމަ އެ އުސޫލުން މި މައްސަލާގައި ވެސް ބަދަލު ނަގައިދެވޭނެ ކަމަށެވެ. އަދި ޝާދިޔާ ބަންދު ކުރުމުގެ ސަބަބުން ވެސް އޭނާގެ އެތައް ހައްގަކަށް އަސަރު ކޮށްފައިވާ ކަމަށް އޭނާ ވިދާޅުވި އެވެ. އަދި ބަދަލުގެ މިންވަރު ނަގައި ދިނުމުގައި އެކި ގައުމުތަކުގައި އަމަލުކުރާ އުސޫލުތަކަށް ރިއާޔަތް ކުރެވިދާނެ ކަމަށް އޭނާ ވިދާޅުވި އެވެ.

އެ މައްސަލާގެ ތެރެއިން، ބަދަލު ނަގައިދެވޭނީ ކިހިނެތްތޯ ބެންޗުން ސުވާލު ކުރެއްވުމުން ވަކީލް ވިދާޅުވީ ހައި ކޯޓުން މައްސަލަ ބަލާއިރު ކޮންމެހެން ނެރެންޖެހޭ އަމުރުތަކާއި ފިޔަވަޅުތައް އެޅުމުގެ ބާރު އެ ކޯޓަށް އޮންނާނެ ކަމަށް ކޯޓުތަކާބެހޭ ގާނޫނުގައި ބުނާ ކަމަށެވެ. އަދި ޝާދިޔާ ބަންދުކުރީ ގާނޫނާ ހިލާފަށް ހައި ކޯޓުން ނިންމުމަށްފަހު ބަދަލު ނަގައި ނުދީފިނަމަ އަނެއްކާވެސް ދަށު ކޯޓަށް އެ މައްސަލަ ހުށަހަޅަން ޖެހުމުން އިތުރަށް މައްސަލަ ލަސްވެ އަދި ގެއްލުމުގެ ބަދަލުގެ މިންވަރު ބޮޑުވެދާނެ ކަމަށް ވެސް އޭނާ ވިދާޅުވި އެވެ.

ނަމަވެސް ދައުލަތުން ބުނީ ޝާދިޔާ ހައްޔަރުކުރީ ކޯޓު އަމުރެއްގެ ދަށުން ކަމަށާއި އަދި އޭނާ ބަންދުކުރީ ވެސް ކޯޓުގެ ނިންމުމެއްގެ ދަށުން ކަމަށެވެ. އަދި ގާނޫނު އަސާސީ އޮންނަ ގޮތުން، އެފަދަ ކަންކަމުގައި ބަދަލު ނަގައިދޭން ޖެހޭނީ ކޯޓު އަމުރެއް ނެތި މީހަކު ގާނޫނާ ހިލާފަށް ބަންދުކުރާ ހާލަތުގައި އެކަނި ކަމަށް ދައުލަތުން ބުންޏެވެ. އެހެންވެ، އެ މައްސަލާގައި ބަދަލު ނަގައިދޭން ނުޖެހޭނެ ކަމަށް ދައުލަތުން ބުންޏެވެ.

ދައުލަތުން ބުނީ ރާއްޖެއަކީ ދުނިޔޭގެ އެހެން ގައުމުތަކާ ގުޅުން ކަނޑާލައިގެން އުޅެވޭނެ ގައުމެއް ނޫން ކަމަށާއި އަދި ވިއެނާ ކޮންވެންޝަންގެ ދަށުން، އެމްބަސީތަކާއި ސަފީރުންނަށް ދޭންޖެހޭ ހިމާޔަތް ދިނުމަކީ ރާއްޖެއިން ކުރަންޖެހޭ ކަމެއް ކަމަށް ދައުލަތުން ބުންޏެވެ. އަދި އެ މައްސަލާގައި އަޑު އުފުލާފައިވަނީ ވަކި އެމްބަސީއަކަށް އަމާޒުކޮށްގެން އެ އެމްބަސީތަކާ ދެކޮޅަށް ކަމަށް ވެސް ދައުލަތުން ބުންޏެވެ. އަދި މާލެ ސަރަހައްދުގައި ކާނިވާ ސަރަހައްދު ނޫން ތަނެއްގައި އެއްވާ ނަމަ ފުލުހުންގެ ހުއްދަ ދުރާލާ ހޯދަން ޖެހޭނެ ކަން ދައުލަތުން ފާހަގަކުރި އެވެ.

އެކަންކަން ފާހަގަކޮށް، ދައުލަތުން އެދުނީ ޝާދިޔާ ބަންދުކުރީ ގާނޫނާ އެއްގޮތަށް ކަމަށް ކަނޑައެޅުމަށާއި އަދި ބަދަލު ދޭން ނުޖެހޭނެ ކަމަށް ނިންމައި ދިނުމަށެވެ.

އެ މައްސަލާގެ އަޑުއެހުންތައް ހައި ކޯޓުން މިއަދު ވަނީ ނިންމާލައިފަ އެވެ. އެހެންވެ، އިތުރު ކަމެއް ސާފުކުރަން ނުޖެހޭނަމަ ދެން އޮންނާނީ ހުކުމް އިއްވުން ކަމަށް ބެންޗުން އިއުލާން ކުރެއްވި އެވެ.

އެ މައްސަލަ ހައި ކޯޓުން ބައްލަވަނީ ފަނޑިޔާރު މުހައްމަދު ސަލީމާއި ފަނޑިޔާރު ހުޒައިފާ މުހައްމަދާއި ފަނޑިޔާރު އަބްދުލްމާނިއު ހުސައިނެވެ. ބެންޗުގެ ރިޔާސަތު ބަލަހައްޓަވަނީ ފަނޑިޔާރު ސަލީމެވެ.