ހުޅުމާލޭގައި މީހަކު މަރުވި އެކްސިޑެންޓާ ގުޅިގެން ކާރު ދުއްވި މީހާ ޝަރީއަތް ނިމެންދެން ބަންދުކުރީ ރަނގަޅަށް: ހައި ކޯޓް

ހުޅުމާލޭގައި މިދިޔަ މަހު ސްޕޯޓްސް ކާރަކާއި ސައިކަލެއް ޖެހި ހިނގި އެކްސިޑެންޓްގައި، ސައިކަލު ދުއްވި މީހާ މަރުވި މައްސަލާގައި ހައްޔަރު ކޮށްފައިވާ މީހާ ޝަރީއަތް ނިމެންދެން ބަންދުކުރީ ރަނގަޅަށް ކަމަށް ހައި ކޯޓުން މިއަދު ހުކުމްކޮށްފި އެވެ.

ހުޅުމާލޭ ސެންޓްރަލް ޕާކް ކައިރީގައި ހިނގި އެކްސިޑެންޓްގައި ޒުވާނަކު މަރުވި މައްސަލާގައި ހައްޔަރުކުރީ ކާރު ދުއްވި ސ. ހިތަދޫ ވައިލެޓްފެހި، މުހައްމަދު ވިސާމް ސިދުގީ އެވެ. އޭނާ ޝަރީއަތް ނިމެންދެން ބަންދުކުރަން ހުޅުމާލޭ މެޖިސްޓްރޭޓް ކޯޓުން ކުރިން އޮތީ އަމުރުކޮށްފަ އެވެ.

އެ މައްސަލަ ވިސާމްގެ ފަރާތުން އިސްތިއުނާފް ކުރުމުން ހައި ކޯޓުން މިއަދު ކުރި ހުކުމުގައިވަނީ ވިސާމް ޝަރީއަތް ނިމެންދެން ބަންދުކުރަން ހުޅުމާލޭ ކޯޓުން ނިންމާފައިވަނީ އެހާތަނަށް ހުށަހެޅި ހެކިތަކުގެ މައްޗަށް ބިނާކޮށް ކަމަށެވެ. އަދި އެ ހާދިސާގައި މަރުވި މީހާ ސައިކަލު ދުއްވި ގޮތާ މެދު ވިސާމްގެ ފަރާތުން މިހާރު ފާހަގަކުރާ ކަންކަން ކަށަވަރު ނުކުރެވޭ ކަމަށާއި އަދި އެއީ ދަށު ކޯޓަށް ހުށަހެޅުނު ކަންކަމަށް ނުވާތީ އެކަންކަމާ މެދު ހައި ކޯޓަށް ގޮތެއް ނުނިންމޭނެ ކަމަށް އެ ހުކުމުގައިވެ އެވެ.

މީގެ އިތުރުން ކްރިމިނަލް ކޯޓުގެ ބައެއް ޝަރީއަތްތައް ހުޅުމާލޭގައި މިހާރު ހިންގާތީ، ހުޅުމާލޭ ކޯޓަށް ބަންދާ މެދު ގޮތެއް ނުނިންމޭނެ ކަމަށް ވިސާމްގެ ފަރާތުން ފާހަގަކުރި ނަމަވެސް އެކަމުގައި ގާނޫނީ ހުރަހެއް ނެތް ކަމަށް އެ ހުކުމުގައިވެ އެވެ. ސަބަބަކީ ހުޅުމާލޭ ކޯޓަކީ ސައްހަ ކޯޓެއް ކަމަށް ސުޕްރީމް ކޯޓުން ކުރިން ހުކުމް ކޮށްފައިވާތީ އާއި ކްރިމިނަލް ކޯޓުގެ ޝަރީއަތްތައް މާލޭ ސަރަހައްދުގެ އެހެން ތަނެއްގައި ކުރިއަށް ގެންދިއުމަކީ ހުޅުމާލޭ ކޯޓުގެ އިހްތިސާސަށް އަސަރު ކުރާނެ ކަމަކަށް ނުވާތީ ކަމަށް ދެ ފަނޑިޔާރުންގެ އަޣުލަބިއްޔަތުން ކުރެއްވި ހުކުމުގައިވެ އެވެ.

އެހެންވެ، ވިސާމް ބަންދުކުރަން ނެރުނު އަމުރަށް ބަދަލު ގެންނަންޖެހޭ ސަބަބެއް ނެތް ކަމަށް ހުކުމް ކުރެއްވީ ފަނޑިޔާރު ފާތިމަތު ފަރުހީޒާ އަދި ފަނޑިޔާރު އަބްދުލްމާނިއު ހުސައިންގެ އަޣުލަބިއްޔަތުންނެވެ.

ނަމަވެސް ރައުޔު ތަފާތުވި ފަނޑިޔާރު ހަސަން ޝަފީއުގެ ރައުޔަކީ ހުޅުމާލޭ ކޯޓުގެ އަމުރު ބާތިލް ކުރަންޖެހޭ ކަމަށެވެ.

ސަބަބެއްގެ ގޮތުގައި ފަނޑިޔާރު ޝަފީއުގެ ރައުޔުގައިވަނީ ހުޅުމާލޭ ކޯޓަށް ބަންދާ މެދު ގޮތެއް ނުނިންމޭނެ ކަމަށް ވިސާމްގެ ފަރާތުން ދަށު ކޯޓުގައި ފާހަގަ ކުރުމުން އެކަމާ މެދު އެ ކޯޓުން ނިންމި ނިންމުމަށް ވާސިލްވި ސަބަބުތަކެއް އެ އަމުރުގައި ބަޔާން ކޮށްފައި ނެތުމުންނެވެ.