ތައިލެންޑް މުބާރާތުގައި ހަތަރު ފެތުންތެރިން 16 ރެކޯޑް އާކޮށްފި

ތައިލެންޑުގެ ބޭއްވި އޭޝިއަން އޯޕަން ސްކޫލްސް އިންވިޓޭޝަނަލް ޝޯޓްކޯސް އޭޖް ގްރޫޕް މުބާރާތުގައި ރާއްޖޭގެ ހަތަރު ފެތުންތެރިއަކު، 16 ރެކޯޑެއް އާކޮށްފި އެވެ.

އޯގަސްޓް މަހު ބޭއްވި މުބާރާތުގެ ފެތުންތެރިންގެ ޓައިމިން، ވެރިފައި ކުރުމަށް ފަހު ސްވިމިން އެސޯސިއޭޝަނުން އާންމު ކުރީ އިއްޔެ އެވެ.

މުހައްމަދު ރިހާން ޝިހާމް ހަ ރެކޯޑް އާކުރިއިރު، މެރާލް އައިން ލަތީފް އާއި އަމްނާ ތަޒްކިޔާ މިރުސާދު، ކޮންމެ ފެތުންތެރިއަކު ހަތަރު ރެކޯޑް އާކުރި އެވެ. އަދި އިޒްޔާން ނާޒިމް ވަނީ ދެ ރެކޯޑް އާކޮށްފަ އެވެ.

ރިހާން އާކުރީ ބެކްސްޓްރޯކްގެ 100 މީޓަރު ރެކޯޑާއި، 50 މީޓަރުގެ ރެކޯޑާއި، ބަޓަފްލައިގެ 100 މީޓަރު ރެކޯޑާއި، 200 މީޓަރު ރެކޯޑް، އަދި 50 މީޓަރު ރެކޯޑެވެ. މީގެ އިތުރުން ފްރީސްޓައިލް 200 މީޓަރު ރެކޯޑް ވެސް އޭނާ އާކުރި އެވެ.

މީގެ ތެރެއިން އެންމެ ގިނަ ދުވަސްވީ ރެކޯޑަކަށް އޭނާ އާކުރީ 2014 ވަނަ އަހަރުގެ ވީނާ ވޯލްޑް ސްވިމިން ޗެމްޕިއަންޝިޕުގައި 27.68 ސިކުންތުން ފަތައިގެން ނިޝްވާން އިބްރާހީމް ހަދާފައިވާ 50 މީޓަރު ބަޓަފްލައި ރެކޯޑެވެ. ރިހާން ރެކޯޑް އާކުރީ 27.06 ސިކުންތުން ރޭސް ނިންމައިގެންނެވެ.

މެރާލް އާކުރީ ބަޓަފްލައި ކެޓަގަރީގެ 100 މީޓަރު، 200 މީޓަރު، 50 މީޓަރު، އަދި އިންޑިވިޖުއަލް މެޑްލޭގެ 100 މީޓަރު ރެކޯޑެވެ. މީގެ ތެރެއިން އެންމެ ދުވަސްވީ ރެކޯޑަކަށް މެރާލް އާކުރީ، 2021 ވަނަ އަހަރު ފީނާ ވޯލްޑް ޗެމްޕިއަންޝިޕުގައި 1 މިނެޓު 15.82 ސިކުންތުން ފަތައިގެން ހަމްނާ އަހުމަދު ހަދާފައިވާ 100 މީޓަރު އިންޑިވިޖުއަލް މެޑްލޭގެ ރެކޯޑެވެ. މެރާލް ރެކޯޑް އާކުރީ 1 މިނެޓު 14.07 ސިކުންތުން ރޭސް ނިންމައިގެންނެވެ.

ތަޒްކިޔާގެ ހަތަރު ރެކޯޑަކީ ފްރީސްޓައިލް ކެޓަގަރީގެ 100 މީޓަރު، 200 މީޓަރު، އަދި 50 މީޓަރާއި، އިންޑިވިޖުއަލް މެޑްލޭގެ 200 މީޓަރު ރެކޯޑެވެ. އޭނާ އާކުރި ހަތަރު ރެކޯޑުގެ ތެރެއިން ދެ ރެކޯޑަށް ވަނީ 10 އަހަރުވެފަ އެވެ. އެއް ރެކޯޑަކީ 2014 ވަނަ އަހަރުގެ ފީނާ ވޯލްޑް ޗެމްޕިއަންޝިޕުގައި 1 މިނެޓު 06.01 ސިކުންތުން ފަތައިގެން އައިމިނަތު ޝަޖަން ހަދާފައިވާ 100 މީޓަރު ފްރީސްޓައިލް އެވެ. ތަޒްކިޔާ އެ ރެކޯޑް އާކުރީ 01 މިނެޓު 03.68 ސިކުންތުން ފަތައިގެންނެވެ. އަނެއް ރެކޯޑަކީ އެ އަހަރުގެ ވޯލްޑް ޗެމްޕިއަންޝިޕުގައި ޝަޖަން 2 މިނެޓު 28.41 ސިކުންތުން ހަދާފައި އޮތް 200 މީޓަރު ފްރީސްޓައިލް ރެކޯޑެވެ. ތަޒްކިޔާ ރެކޯޑް އާކުރީ 2 މިނެޓު 20.65 ސިކުންތުން ފަތައިގެންނެވެ.

އިޒްޔާން އާކޮށްފައިވަނީ ބްރެސްޓްސްރޯކްގެ 100 މީޓަރު ރެކޯޑާއި، 200 މީޓަރު ރެކޯޑެވެ. މިއީ 2012 ވަނަ އަހަރުގެ ވޯލްޑް ޗެމްޕިއަންޝިޕުގައި ހަސަން އަޝްރަފް ހަދާފައިވާ ދެ ރެކޯޑެވެ. އޭނާ 1 މިނެޓު 12.91 ސިކުންތުން ހެދި 100 މީޓަރު ރެކޯޑް އިޒްޔާން އާކުރީ 1 މިނެޓު 12.85 ސިކުންތުން ފަތައިގެންނެވެ. އަދި އަޝްރަފް 2 މިނެޓު 40.57 ސިކުންތުން ހެދި 200 މީޓަރުގެ ރެކޯޑް އިޒްޔާން އާކުރީ 2 މިނެޓު 37.35 ސިކުންތުން ފަތައިގެންނެވެ.