ގާނޫނަށް ގެންނަ ބަދަލާއެކު، ޑޮލަރުން ލިބޭ އާމްދަނީއަށް 120 މިލިއަން އިތުރުވާނެ: ޒަރީރު

ޑޮލަރުން އާމްދަނީ ލިބޭ ކުންފުނިތަކުން، ޑޮލަރުން ޓެކްސް ދައްކަން ޖެހޭ ގޮތަށް ހަދައިފިނަމަ، ދައުލަތަށް ޓެކްސްގެ ގޮތުގައި ޑޮލަރުން ލިބޭ އާމްދަނީއަށް 120 މިލިއަން ޑޮލަރު (1.8 ބިލިއަން ރުފިޔާ) އިތުރު ކުރެވޭނެ ކަމަށް ކޮމިޝަނާ ޖެނެރަލް އޮފް ޓެކްސޭޝަން ހަސަން ޒަރީރު ވިދާޅުވެއްޖެ އެވެ.

އެ އިދާރާ އިން މިދިޔަ ސެޕްޓެމްބަރު މަހު ވަނީ ބޭރު ފައިސާ އިން އާމްދަނީ ލިބޭ ފަރާތްތަކުން އިންކަމް ޓެކްސް ގާނޫނު ދަށުން ހުށަހަޅާ ޓެކްސް ބަޔާންތައް ޑޮލަރުން ތައްޔާރު ކުރުމަށާއި އެ ގާނޫނުގެ ދަށުން ދައްކަންޖެހޭ ޓެކްސްތައް ޑޮލަރުން ދައްކާ ގޮތަށް އާމްދަނީން ޓެކްސް ނެގުމުގެ ގަވާއިދު އިސްލާހު ކޮށްފަ އެވެ.

"މިހާރު" އަށް ދެއްވި ހާއްސަ އިންޓަވިއުއެއްގައި ޒަރީރު ވިދާޅުވީ އެ ބަދަލާ އެކު، އިންކަމް ޓެކްސްގެ ގޮތުގައި ލިބޭ އަދަދު އަހަރަކު 80 މިލިއަން ޑޮލަރަށް އިތުރުވާނެ ކަމަށެވެ. އަދި ކުރިން ކޯޕަރޭޓް އިންކަމް ޓެކްސްއަށް ޑޮލަރުން ލިބޭ އާމްދަނީއާ އެކު ޖުމްލަ ލިބޭ އަދަދު 120 މިލިއަން ޑޮލަރަށް އިތުރުވާނެ ކަމަށް އޭނާ ވިދާޅުވި އެވެ.

"މިހާރު ވެސް އަހަރަކު 950 މިލިއަން ޑޮލަރު އެބަ ލިބޭ. މިއަހަރު އަޅުގަނޑުމެން ފޯކާސްޓް ކުރަނީ އެއް ބިލިއަނަށް އަރާނެ ކަމަށް،" އޭނާ ވިދާޅުވި އެވެ.

މިދިޔަ އަހަރު މީރާ އަށް 21 ބިލިއަން ރުފިޔާ ޓެކްސްގެ އާމްދަނީން ލިބުނެވެ. އޭގެ ތެރެއިން ޑޮލަރުން 950 މިލިއަން ބަލައިގަނެފައިވެ އެވެ. އެއީ ޖުމްލަ ޓެކްސް އާމްދަނީގެ 59 ޕަސެންޓެވެ. މިދިޔަ އަހަރު ޑޮލަރުން ލިބުނު ޓެކްސް އާމްދަނީ ހަ ޕަސެންޓަށް އިތުރުވީ، ޓީޖީއެސްޓީ އާއި އެއާޕޯޓު ޑިވަލޮޕްމެންޓް ފީ އިތުރުވުމުންނެވެ. ޓީޖީއެސްޓީ ބޮޑުވީ ޓޫރިޒަމް ދާއިރާގެ ޖީއެސްޓީ 16 ޕަސެންޓަށް އިތުރު ކުރުމުންނެވެ.

މިއަހަރުގެ އޮގަސްޓް މަހުގެ ނިޔަލަށް ޓެކުހުން ލިބުނު އާމްދަނީ ވަނީ 17 ބިލިއަން ރުފިޔާއަށް އަރާފަ އެވެ. އޭގެ ތެރެއިން އަށް ބިލިއަނަށް ވުރެ ގިނަ ރުފިޔާ ލިބުނީ ޑޮލަރުންނެވެ. އެއީ 574 މިލިއަން ޑޮލަރެވެ.