ނުރައްކާތެރިކޮށް ލޯންޗު ދުއްވި މީހުންގެ ލައިސަންސް ހިފަހައްޓައި، ޖޫރިމަނާކޮށްފި

ނުރައްކާތެރި ގޮތަކަށް ލޯންޗުތަކެއް ދުއްވި މައްސަަލާގައި، ލޯންޗް ދުއްވި މީހުންގެ ލައިސަންސް ވަގުތީ ގޮތުން ހިފަހައްޓައި، އެ މީހުން ޖޫރިމަނާކޮށްފި އެވެ.

ނުރައްކާތެރިކޮށް ލޯންޗުތަކެއް ދުއްވި މައްސަލަ ސޯޝަލް މީޑިއާއިން ފުލުހުންގެ ސަމާލުކަމަށް އައުމާ ގުޅިގެން ފުލުހުން އެ މައްސަލަ ބަލަން ފެށީ މިދިޔަ ހޮނިހިރު ދުވަހު އެވެ.

ފުލުހުން މިއަދު ބުނީ އެ މައްސަލައާ ގުޅިގެން ލޯންޗު ދުއްވި ތިން މީހުންގެ ލައިސަންސް ވެސް ހަމަ އެ ދުވަހު ވަގުތީ ގޮތުން ހިފަހައްޓާފައިވާ ކަމަށެވެ.

މި މައްސަލައާ ގުޅޭ ލިޔެކިޔުންތައް ޓްރާންސްޕޯޓް މިނިސްޓްރީއަށް ފޮނުވުމުގެ މަސައްކަތް ކުރަމުން އަންނަ ކަމަށާއި މައްސަލާގައި ދާއިމީ ފިޔަވަޅެއް އަޅާނީ މިނިސްޓްރީން ކަމަށް ފުލުހުން ބުންޏެވެ.

ޓްރާންސްޕޯޓް މިނިސްޓްރީން ބުނީ އެ މީހުން 750ރ. އިން ޖޫރިމަނާކޮށް، އެ ފަދަ ކުށެއް ކުރި މީހެއްކަން އެނގޭނެ ގޮތަށް ލައިސެންސްގައި އެންޑޯޒްމަންޓް ދީފައިވާ ކަމަށެވެ.

މިހާތަނަށް ބެލިބެލުމުން އެއީ އއ. އަތޮޅަށް ދަތުރުކުރި ލޯންޗުތަކެއް ކަން އެނގިފައިވާ ކަމަށް ފުލުހުން މީގެ ކުރިން ބުނެފައިވެ އެވެ.

ސޯޝަލް މީޑިއާގައި ދައުރުވާ ވީޑިއޯއިން ފެންނަނީ، ދެ ލޯންޗެއް ރޭސް ޖަހާ ގޮތަށް ބާރު ސްޕީޑްގައި ދުއްވާފައި އައިސް ބަނދަރަށް ވަންނަ މަންޒަރެވެ.

ވީޑިއޯއިން ފެންނަ ގޮތުން، އޭގެ ތެރެއިން "ނަސްރު" ނަމަކަށް ކިޔާ ލޯންޗު ވަކި ހިސާބަކުން ދުވެލި ބާރުކޮށް، "ރިލެކްސް ގޯލްޑް" ނަމަކަށް ކިޔާ ލޯންޗަށް ވުރެ ކުރި އަރައިގެން ގޮސް ބަނދަރަށް ވަދެ އެވެ. ލޯންޗުގެ ސްޕީޑް މަޑުކުރީ ވެސް ނެރު ކައިރިންނެވެ.

އެ ލޯންޗުތަކުގެ ފަހަތުން "ރަމްޒު ކުއީން" ލޯންޗް ވެސް ވަންނަތަން ވީޑިއޯއިން ފެނެ އެވެ.

އެ ތިން ލޯންޗު ރޭސް ޖަހާ އިތުރު ވީޑިއޯ ވެސް ޓިކްޓޮކްގައި އެބަހުއްޓެވެ.