ފުވައްމުލަކަށް އިއްޔެ 120 މިލިމީޓަރުގެ ވާރޭ ވެހުނު

ފުވައްމުލަކަށް އިއްޔެ 120 މިލިމީޓަރުގެ ވާރޭ ވެހިއްޖެ އެވެ.

މެޓް އޮފީހުން މިއަދު އާންމުކުރި ރާއްޖެއަށް މިދިޔަ 24 ގަޑިއިރު ވެހުނު ވާރޭގެ ރެކޯޑުތަކުގައިވާ ގޮތުން އިއްޔެ ހެނދުނު 8:00 އިން މިއަދު ހެނދުނު 8:00 އަށް އެންމެ ގިނައިން ވާރޭ ވެހުނީ ފުވައްމުލަކަށެވެ. އެއީ 120 މިލިމީޓަރުގެ ވާރޭ އެވެ.

ދެވަނައަށް އެންމެ ގިނައިން ވާރޭ ވެހުނު ސ. ގަމަށް ވަނީ 70 މިލިމީޓަރުގެ ވާރޭ ވެހިފަ އެވެ. އަދި ލ. ކައްދުއަށް 60 މިލިމީޓަރުގެ ވާރޭ ވެހިފައިވެ އެވެ.

އިއްޔެ އެންމެ ވިއްސާރަކުރީ ދެކުނުގެ އަތޮޅުތަކަށެވެ.

ހުޅަނގު މޫސުމުގެ ބާރު ގަދަވެ، މި ހަފުތާގައި ރާއްޖޭގެ ބޮޑު ސަރަހައްދަކަށް މޫސުން ގޯހެވެ.

ގަދަ ވަޔާ އެކު ކަނޑުތައް ގަދަވެ އަދި ބޯކޮށް ވާރޭ ވެހޭނެތީ މޫސުމަށް ހާއްސަ ސަމާލުކަމެއް ދިނުމަށް މެޓް އޮފީހުން ވަނީ އާންމުންނަށް އިލްތިމާސްކޮށްފަ އެވެ.

މިހާރު ރާއްޖެއަށް މި ކުރަނީ ހުޅަނގު މޫސުމުގެ ވިއްސާރަ އެވެ. ސެޕްޓެމްބަރު މަހުގެ ފަހުކޮޅާއި އޮކްޓޯބަރު މަހުގެ ކުރީކޮޅަކީ އާންމު ގޮތެއްގައި ވެސް ރާއްޖެއަށް މޫސުން ގޯސް ދުވަސްވަރެކެވެ.

މެޓް އޮފީހުން މިދިޔަ ބުރާސްފަތި ދުވަހު ނެރުނު ނޫސްބަޔާނެއްގައި ބުނީ މި މަހާއި ކުރިއަށް އޮތް ދެ މަހު ރާއްޖޭގެ ގިނަ ސަރަހައްދުތަކަށް ވާރޭ ވެހޭނެ ކަމަށް ލަފާ ކުރެވެނީ އާންމުކޮށް މި ދުވަސްވަރު ވެހޭ މިންވަރަށް ވުރެ މަދުން ކަމަށެވެ. ނަމަވެސް، އުތުރުގެ ބައެއް އަތޮޅުތަކަށް އާންމުކޮށް މި ދުވަސްވަރު ވެހޭ ވަރަށް ނުވަތަ އެއަށް ވުރެ އިތުރަށް ވާރޭ ވެހުމަކީ އެކަށީގެންވާ ކަމެއް ކަމަށް ވެސް އެ އޮފީހުން ބުންޏެވެ.

ހުޅަނގު މޫސުން ނިމި، ރާއްޖެއަށް އިރުވައި މޫސުން ފެށޭނީ އަންނަ ޑިސެމްބަރު މަހު އެވެ.