ޕަންޕު ބޭނުންކޮށްގެން މާލޭގައި ފެން ހިންދުން މިހާރު ފަސޭހަވާނެ: މުއްތަލިބު

މާލެ އަށް ވާރޭ ވެހޭ ކޮންމެ ފަހަރަކު އެންމެ ބޮޑަށް ފެންބޮޑުވާ އައިޖީއެމްއެޗު ސަރަހައްދުގައި ފެންބޮޑުވުމުގެ މައްސަލަ އަށް މިވަގުތަށް ކޮންމެވެސް ވަރެއްގެ ހައްލެއް ލިބުނީ ރައީސް ޑރ. މުހައްމަދު މުއިއްޒުގެ އެންގުމަށް މި ސަރުކާރުން ކުރި މަސައްކަތުން ކަމަށް އިންފްރާންސްޓްރަކްޗާ މިނިސްޓަރު އަބްދުﷲ މުއްތަލިބު މިރޭ ވިދާޅުވެއްޖެ އެވެ.

މާލެއަށް ވާރެވެހިއްޖެ ނަމަ އަބަދުވެސް އައިޖީއެމްއެޗު ކައިރީގައި ފެންބޮޑުވެ އެވެ. އެ ސަރަހައްދުން އެތައް ދުވަހެއް ވަންދެން ފެން ނުހިނދޭ ކަމުގެ ޝަކުވާ ކުރާތާ އެތައް ދުވަހެއް ވެއްޖެ އެވެ.

އެކަމަކު މިއަދު މާލެއަށް ވެހުނު ވާރޭގައި އެ ސަރަހައްދުގައި ފެންބޮޑުނުވީ އިންފްރާންސްޓްރަކްޗާ މިނިސްޓްރީން ބެހެއްޓި ޑްރެއިން ސިސްޓަމް ބޭނުންކުރަން ފެށުމުންނެވެ.

އައިޖީއެމްއެޗު ސަރަަހައްދުގައި މިހާރު ފެންބޮޑުވާ މައްސަލަ އަށް ހައްލެއް ލިބިފައިވާ ކަމަށް "މިހާރު" ގައި މިއަދު ޖެހި ޚަބަރާ އެކު، އެކްސްގައި ކުރެއްވި ޕޯސްޓެއްގައި މިނިސްޓަރު މުއްތަލިބު ވިދާޅުވީ، ފެން ހިންދަން ގާއިމްކުރި ސިސްޓަމް ބޭނުންކުރަން ފަށާފައި ވަނީ މާލޭގެ ހުޅަނގު ސަރަަހައްދުގައި ވަކިން ހާއްސަކޮށް ވެސްޓް ޕާކާއި އައިޖީއެމްއެޗު ހިމެނޭ ސަރަހައްދުގައި ފެންބޮޑުވެ، އާންމު ދިރިއުޅުމަށް ދަތިވެ، ބައެއް ގެތަކަށް ގެއްލުން ލިބޭތީ މާލޭގެ މަގުތައް ރަނގަޅު ފެންވަރަކަށް ހެދެންދެން ވެސް ވަގުތީ ގޮތުން ހައްލެއް ގެންނަން ރައީސް މުއިއްޒު އެންގެވުމަށް ކުރިއަށް ގެންދާ މަޝްރޫއެއްގެ ދަށުން ކަމަށެވެ.

މުއްތަލިބު ވިދާޅުވި ގޮތުގައި އެއީ ޑިފެންސް މިނިސްޓްރީން އިސްވެ އިންފްރާންސްޓްރަކްޗާ މިނިސްޓްރީގެ ބައިވެރިވުމާ އެެކު މިދިޔަ މޭ 10 ގައި އާރުޑީސީއާ ހަވާލުކޮށްގެން ކުރިއަށް ގެންދާ މަޝްރޫއެކެވެ.

މިނިސްޓަރު ވިދާޅުވީ އެ މަޝްރޫއުގެ ދަށުން މިހާތަނަށް ނިމިފައި ވަނީ އެއްބައި ކަމަށެވެ.

އޭނާ ވިދާޅުވީ މިހާރު ކުރަމުން އަންނަ މަސައްކަތުން، ފެންބޮޑުވާ މައްސަލަ އަށް އެއްކޮށް ހައްލެއް ނުލިބުނަސް މާލޭގެ މަގުތައް ރަނގަޅު ފެންވަރަކަށް ހެދެންދެން ރައްޔިތުންނަށް ފޯރާ ދަތިތައް ކުޑަކޮށް، ޕަމްޕު ބޭނުންކޮށްގެން ފެން ހިންދުމަށް ފަސޭހަވާނެ ކަމަށެވެ.

މާލޭގެ އެކި ސަރަހައްދުތަކުގައި ބަހައްޓާފައިވާ ސްޓޯމްވޯޓާ މެނޭޖްމަންޓް ސިސްޓަމް މެއިންޓެއިންކޮށް، ބަލަހައްޓަނީ އިންފްރާސްޓްރަކްޗަރު މިނިސްޓްރީން ކަމަށް ވެސް މުއްތަލިބު ވިދާޅުވި އެވެ.

އެ ސިސްޓަމް މިއަދު ބޭނުން ކުރަން ފަށާފައިވާއިރު، އެމްއެންޑީއެފުން ވަނީ ޕަމްޕު ބޭނުންކޮށްގެން ފެން ހިންދުމުގެ މަސައްކަތް މާލޭގެ އެކި ސަރަހައްދުތަކުގައި ކޮށްފަ އެވެ.

ހުޅަނގު މޫސުމުގެ ބާރުގަދަވެ، މިހާރު ކުރަމުންދާ ވިއްސާރައާ ގުޅިގެން މެޓުން މިވަގުތު ވެސް އޮތީ ށ. އަތޮޅުން ފ. އަތޮޅާ ހަމައަށް ޔެލޯ އެލާޓް ނެރެފަ އެވެ. އެ ސަރަހައްދަށް ވިލާގަނޑުގައި 50 މޭލަށް ވައިގަދަވެ ކަނޑުތައް ގަދަވާނެ ކަމަށް މެޓުން ލަފާކުރެ އެވެ.