މާލެ އަށް މޫސުން ގޯސް: މިހާތަނަށް 6،835 ޓަނުގެ ފެން ބޭރުކޮށް، 58 ގެއަކަށް އެހީވި

މާލެ ސަރަހައްދަށް ރެއިން ފެށިގެން މެދުނުކެނޑި ވެހެމުންދާ ވާރެއާ ގުޅިގެން މާލޭގެ މަގުތަކުގައި ވަރަށް ބޮޑަށް ފެން ބޮޑުވެފައިވާއިރު، މިއަދުގެ ހެނދުނު ހަޔަކާ ހަމައަށް 6،835 ޓަނުގެ ފެން ބޭރުކޮށްފައިވާ ކަމަށާއި ގިނަ ގެތަކަކަށް އެހީތެރިކަން ވެސް ފޯރުކޮށްދޭން ޖެހިފައިވާ ކަމަށް އެމްއެންޑީއެފުން ބުންޏެވެ،

ސިފައިން ބުނީ، މާލެ އިން ފެން ހިންދުމަށްޓަކައި 8 ސަރަހައްދެއްގައި 19 ޕަންޕު ޖަހައިގެން އަންނަނީ ހަރަކާތްތެރިވަމުންނެވެ.

އެއީ ވެސްޓްޕާކް ސަރަހައްދުގައި ހަތަރު ޕަމްޕާއި އައިޖީއެމްއެޗު ސަރަހައްދުގައި ތިން ޕަމްޕާއި މާފަންނު ފެރީ ޓާމިނަލް ކައިރީގައި ތިން ޕަމްޕާއި ސަލްމާން މިސްކިތް ހިމެނޭ ސަރަހައްދުގައި އެއް ޕަމްޕާއި ބޮޑުވަޅު ހިމެނޭ ސަރަހައްދުގައި އެއް ޕަމްޕާއި ކުޑަކުދިންގެ ބަގީޗާ ކައިރީގައި އެއް ޕަމްޕާއި ބިހުގެ ހިމެނޭ ސަރަހައްދުގައި އެއް ޕަމްޕް އަދި އެމްޕީއެލް ސަރަހައްދުގައި އެއް ޕަމްޕެވެ.

ސިފައިން ބުނިގޮތުގައި، މިހާތަނަށް 58 ގެއަކަށް ވެސް ވަނީ އެކި ކަހަލަ އެހީތެރިކަން ފޯރުކޮށްދީފަ އެވެ.

މޫސުމާ ބެހޭ އިދާރާއިން ވަނީ ރޭ ފަތިހު 4:45 އިން މިއަދުގެ ހެނދުނު 8:45 އާ ހަމައަށް އއ. އާއި އދ. އަތޮޅަށް އޮރެންޖު އެލާޓެއް ނެރެފަ އެވެ. އެހެންވެ، އެ ސަރަހައްދަށް ގުގުރައި، ބޯކޮށް ވާރޭ ވެހި ފެންބޮޑުވާނެ ކަމަށް މެޓުން ލަފާކުރެ އެވެ.

މި މަހުގެ ތިން ވަނަ ދުވަހު ވެސް މާލެ ސަރަހައްދަށް ވަރަށް ބޯކޮށް ވާރެ ވެހި، ހުރިހާ މަގުތަކެއްގައި ކަހަލަ ގޮތަކަށް ފެން ބޮޑުވެ، ގޭގެ އަށް ވަރަށް ބޮޑެތި ގެއްލުންތަކެއް ވަނީ ވެފަ އެވެ. ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފައި ވަނީ އެ ފަަހަރު ލިބުނު ގެއްލުން 2.2 މިލިއަން ރުފިޔާއަށް އަރާ ކަމަށާއި އެއީ މިހާތަނަށް ވިއްސާރާގައި މާލެ އަށް އެންމެ ގެއްލުން ބޮޑު ފަހަރު ކަމަށެވެ.

ފެން ބޮޑުވުމާ ގުޅިގެން ލިބުނު ގެއްލުންތަކުގެ އެސެސްމަންޓް ހެދުމަށް ފަހު، އެންޑީއެމްއޭ އިން ބުނީ މާލެ އިން 145 ގެއަކަށް އެ ވިއްސާރާގައި ގެއްލުންވި ކަމަށެވެ. އޭގެ ތެރެއިން 115 ގެއެއްގެ އެސެސްމަންޓް ވަނީ ހަދައިފަ އެވެ. އެކަމަކު 13 ގެއަކުން އެސެސްމަންޓް ހަދަން ބޭނުން ނުވާތީ އެ ގެތަކުގެ އެސެސްމަންޓެއް ނުހަދަ އެވެ.