އެފްއޭއެމް ސަލާމަތް ނުވާ ހިސާބަށް؛ ދަރަނި 150 މިލިއަން ރުފިޔާ އަށް އަރައިފި!

އެފްއޭއެމްގެ ދަރަނި ގާތްގަނޑަކަށް 150 މިލިއަން ރުފިޔާ އަށް އަރައިފި އެވެ.

ކުރިން 85 މިލިއަން ރުފިޔާގައި ހުރި ދަރަނި، އިތުރަށް ބޮޑުވެގެން ދިޔައީ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ދައުރުގައި އެ އެސޯސިއޭޝަނުން އެއްބަސްވުމެއް ހެދި ދެކުނު ކޮރެއާގެ ކުންފުންޏަކަށް 50 މިލިއަން ރުފިޔާ ދައްކަން ކޯޓުން ހުކުމް ކުރުމުންނެވެ.

ހުޅުމާލެ އާއި ވިލިމާލޭގައި ދެ ދަނޑު އެޅުމަށް ދެކުނު ކޮރެއާގެ ޓީކުއިން ކޮންސްޓްރަކްޝަން ކޯ ލިމިޓެޑާ އެކު އެފްއޭއެމުން 2021 ގައި ހެދި އެއްބަސްވުމުގެ ދަށުން ފައިސާ ދައްކާފައި ނުވުމުން އެ ކުންފުންޏަށް ލިބުނު ގެއްލުމުގެ ގޮތުގައި 3.2 މިލިއަން ޑޮލަރު (52.1 މިލިއަން ރުފިޔާ) ދެއްކުމަށް ސިވިލް ކޯޓުން ހުކުމް ކުރީ މިދިޔަ ހަފުތާގަ އެވެ.

މޯލްޑިވިއަން އިން ވެސް ވަނީ އެފްއޭއެމުން 2016 އަދި 2017 ގައި ކޮށްފައިވާ ދަތުރުތަކަށް ފައިސާ ދައްކާފައި ނުވާތީ 7.4 މިލިއަން ރުފިޔާ ހޯދަން އިންވޮއިސް އާއި ސިޓީ ފޮނުވައިފަ އެވެ. ނަމަވެސް އެ ދަތުރުތައް ކުރިކަމުގެ އެއްވެސް ލިޔެކިޔުމެއް ވެސް އެފްއޭއެމްގައި ފެންނަން ނެތް ކަމަށް ނޯމަލައިޒޭޝަން ކޮމިޓީން ބުނެ އެވެ.

ކޯޓުތަކުގެ ހުކުމްތަކާ އެއްގޮތަށް އެފްއޭއެމުން ފައިސާ ދައްކާފައިނުވުމުން، ބައެއް ހުކުމްތަކުގައި މިހާރު ވަނީ ތަންފީޒީ މަރުހަލާ ފަށައިފަ އެވެ.

ކޮރެއާގެ ކުންފުންޏަށް ފައިސާ ދެއްކުމަށް އެފްއޭއެމްގެ މައްޗަށް ކުރި ހުކުމް އިސްތިއުނާފު ކުރުމަށް ނޯމަލައިޒޭޝަން ކޮމިޓީން ވަނީ ނިންމައިފަ އެވެ.

ދަރަނީގެ ސަބަބުން އެފްއޭއެމް ބޭންކްރަޕްޓް ވެދާނެތޯ، ނޯމަލައިޒޭޝަން ކޮމިޓީގެ ޗެއާޕާސަން އަހުމަދު ޒުހޫރުއާ "މިހާރު" އިން ސުވާލު ދެންނެވުމުން އޭނާ ވިދާޅުވީ ކޮމިޓީން މަސައްކަތް ކުރަނީ އެ ހާލަތަށް ރާއްޖޭގެ ޒުވާނުންނާ ގުޅިފައި އޮތް އެ އެސޯސިއޭޝަން ދިޔަ ނުދީ އެ ސަލާމަތް ކުރެވޭތޯ ކަމަށެވެ.

އެ ކޮމިޓީން މިދިޔަ މަހު ބޭއްވި ޕްރެސް ކޮންފަރެންސްގައި ކޮމިޓީގެ މެންބަރު އިސްމާއީލް ސިމަން ވިދާޅުވީ އިސްތިއުނާފު ކުރުމުގެ މުއްދަތު އޮތް މައްސަލަތައް އިސްތިއުނާފު ކުރާނެ ކަމަށެވެ. އިސްތިއުނާފު ކުރެވެން ނެތް ހުކުމްތަކުގައި އެ ކުންފުނިތަކާ ވާހަކަ ދައްކައިގެން ދަރަނި އަދާކުރުމުގައި ލުއިގޮތްތަކެއް ހޯދަން މަސައްކަތް ކުރާނެ ކަމަށް އޭނާ ވިދާޅުވި އެވެ.