އެފްއޭއެމުން ދިން ފައިސާއަށް ކްލަބްތަކުގެ ވެރިން ހިޔާނާތްތެރިވި ކަމަށް ތުހުމަތު ކުރެވޭ މައްސަލަ ވެސް ތަހުގީގު ކުރަނީ!

ރާއްޖޭގެ ފުޓުބޯޅައާ ބެހޭ މައި އިދާރާ އެފްއޭއެމުން ކްލަބްތަކަށް ސަބްސިޑީގެ ގޮތުގައި ދިން ފައިސާ އަށް އެ ކްލަބްތަކުގެ ވެރިން ހިޔާނާތްތެރިވާ ކަމަށް ތުހުމަތު ކުރެވޭތީ އެ މައްސަލަ ތަހުގީގު ކުރަމުން އަންނަ ކަމަށް ފުލުހުން މިއަދު ބުނެފި އެވެ.

އެފްއޭއެމަށް ބޭރުގެ އިދާރާތަކުން ދޭ ފައިސާ އަށް ހިޔާނާތްތެރިވި ކަމުގެ ތުހުމަތުގައި އެ އެސޯސިއޭޝަނުގެ ކުރީގެ ރައީސް ބައްސާމް އަދީލް ޖަލީލް ނަމަހަ ގޮތުގައި ބޭނުންކޮށް، މަނީލޯންޑަރިންގެ އަމަލު ހިންގި ކަމަށް ތުހުމަތު ކުރެވޭ މައްސަލަ ތަހުގީގު ކުރިއަށް ގެންދާކަން ހާމަކޮށް ފުލުހުން ފޮނުވި މީޑިއާއާ ހިއްސާކުރި މެސެޖްގައި ބުނީ ކްލަބްތަކުގެ ވެރިންގެ މައްސަލަ ވެސް ތަހުގީގު ކުރާ ކަމަށެވެ.

ފުލުހުން ބުނިގޮތުގައި، ކްލަބްތަކުގެ ވެރިން އަމިއްލަ އެކައުންޓުތަކަށާއި އެ މީހުންގެ ހިއްސާ އޮންނަ ކުންފުނިތަކަށް ޖަމާކޮށް، ހިޔާނާތްތެރިވެފައިވާކަން ތުހުމަތު ކުރެވޭ ކަމަށެވެ.

"އެފްއޭއެމުން ކްލަބްތަކަށް ދެމުންދާ ސަބްސިޑީ، އެ ކްލަބްތަކުގެ އިސްވެރިންގެ އަމިއްލަ އެކައުންޓުތަކަށާއި އެ ފަރާތްތައް ހިއްސާވާ ކުންފުނިތަކަށް ޖަމާކޮށް، އެ ފައިސާ އަށް ހިޔާނާތްތެރި ވެފައިވާކަން ފާހަގަކުރެވި، އެ މައްސަލައިގެ ތަހުގީގުވެސް ކުރިއަށް ދާކަން މި ފުރުސަތުގައި ފާހަގަކުރަމެވެ،" ފުލުހުންގެ މެސެޖްގައި ވެ އެވެ.

ފުރަތަމަ ޑިވިޝަނުގެ ކޮންމެ ކްލަބަކަށް އަހަރަކު ތިން މިލިއަން ރުފިޔާ ދިނުމަށް ވީ ވައުދާ އެކު 2016 ގައި އެފްއޭއެމްގެ ރައީސް ކަމަށް ވަޑައިގެންނެވި ބައްސާމްގެ ފުރަތަމަ ދައުރުގެ ފުރަތަމަ ދެ އަހަރު ކްލަބްތަކަށް ފައިސާ ދިނީ ސަރުކާރުގެ ކުންފުނިތައް މެދުވެރިކޮށެވެ.

އެކަމަކު 2018 ގައި ސަރުކާރު ބަދަލުވެ، ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން ނިންމީ ކުންފުނިތައް މެދުވެރިކޮށް ކްލަބްތަކަށް ފައިސާ ނުދިނުމަށެވެ. އޭގެ ފަހުން އެ ފައިސާ ކްލަބްތަކަށް އެފްއޭއެމުން ދޭ ގޮތަށް ބައްސާމް ނިންމެވި އެވެ.

އޭނާ އަށް ތުހުމަތު ކުރެވޭ މައްސަލައިގައި ބައްސާމްގެ ހިއްސާ އޮންނަ ކުންފުންޏަކާއި އޭރު އެފްއޭއެމްގައި މަސައްކަތް ކުރި ބައެއް މުވައްޒަފުންގެ އަމިއްލަ އެކައުންޓްތަކަށް ފައިސާ ޖަމާކުރި ކަމަށް ތުހުމަތު ކުރެވޭ މައްސަލަ ވެސް ތަހުގީގު ކުރަމުން އަންނަ ކަމަށް ފުލުހުން ބުންޏެވެ.

އެފްއޭއެމްގެ ފައިސާ އަށް ހިޔާނާތްތެރިވި ކަމުގެ ތުހުމަތުގައި މިހާރު ވެސް ދެ ދައުވާއެއް ބައްސާމާ ދެކޮޅަށް ކްރިމިނަލް ކޯޓުގައި ކުރިއަށް ގެންދެ އެވެ. ބައްސާމަށް އަށް ކުރެވޭ ތުހުމަތުތަކާ ގުޅިގެން ޝަރީއާތް ނިމެންދެން ފުރުން މަނާކޮށް އޭނާގެ ޕާސްޕޯޓް ވަނީ ކޯޓު އަމުރެއްގެދަށުން ހިފަހައްޓައިފަ އެވެ.

މިދިޔަ އަހަރު ފީފާއިން ވެސް ބައްސާމަށް ނުވަ މަސްދުވަހުގެ ސަސްޕެންޝަންގެ ފިޔަވަޅު އެޅި އެވެ. އެ ސަސްޕެންޝަނުގެ މުއްދަތު މިދިޔަ މާޗް މަހު ވަނީ ހަމަވެފަ އެވެ.