ނާޒިމަށް ތުހުމަތުކޮށް ދެއްކި ރިޕޯޓު ފުލުހުން ދޮގުކޮށްފި، ބުނީ ޖިންސީ ގޯނާ އަށް ޝައްކު ނުކުރެވޭ ކަމަށް!

މާލޭގެ އިމާރާތަކުން ޒުވާން އަންހެނަކު ވެއްޓި މަރުވި މައްސަލާގައި އޭނާގެ ދޮންބައްޕަ އަދި ރައްޔިތުންގެ މަޖިލީހުގެ ނައިބު ރައީސް ދިއްގަރު ދާއިރާގެ މެމްބަރު އަހުމަދު ނާޒިމަށް ތުހުމަތުތަކެއްކޮށް، ޓީވީ ޗެނަލަކުން ދެއްކި ރިޕޯޓުގައި ހިމެނޭ ވާހަކަތައް ފުލުހުން މިއަދު ދޮގުކޮށްފި އެވެ.

މިފަދަ މައްސަލަތަކުގައި ހިމެނޭ މީހުންގެ ޒާތީ މައުލޫމާތުތަކާއި އަމިއްލަ އަށް މަރުވި ކަމަށް ބެލެވޭ މައްސަލަތަކުގެ ތަފުސީލުތައް ފުލުހުން އާންމުކޮށް ހާމައެއް ނުކުރެ އެވެ. ނަމަވެސް ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ވަނީ އެ ހާދިސާގައި މަރުވި އުމުރުން 25 އަހަރުގެ ޒުވާނާއާ ގުޅޭ ވަރަށް ގިނަ މައުލޫމާތުތައް ތަފްސީލުކޮށް ހާމަކޮށްފަ އެވެ.

މޭޖާ ކްރައިމް ޑިޕާޓްމަންޓުގެ އިސްވެރިޔާ ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ، އެއީ ގިނަ އަހަރުތަކެއް ވަންދެން ނަފުސާނީ ބައްޔަށް ފަރުވާ ކުރަމުން އައި ޒުވާނެއް ކަމަށެވެ.

އެ ޒުވާނާ މީގެ ކުރިން ވެސް އަމިއްލަ އަށް މަރުވާ މަސައްކަތް ކޮށްފައިވާ ކަމާއި އެ އިމާރާތުގެ ބެލްކަނިން ވެސް އަމިއްލަ އަށް ފުންމާލި ކަމަށް މިހާތަނަށް ނަގާފައިވާ ބަޔާންތަކާއި ލިބިފައި ހުރި އެހެނިހެން ހެކިތަކުން ބެލެވޭ ކަމަށް ޝިފާއު ވިދާޅުވި އެވެ.

ޖިންސީ ގޯނާގެ ތުހުމަތުތަކެއް ޓީވީ ޗެނަލަކުން ކޮށްފައިވީ ނަމަވެސް އެ ޒުވާނާގެ މެޑިކަލް ރިޕޯޓުތަކުން އެފަދަ އެއްވެސަ ކަމެއް ފާހަގަ ނުވާ ކަމަށް ޝިފާއު ވިދާޅުވި އެވެ. އެ މައްސަލާގައި ޒުވާނާގެ މަންމަ އާއި ބައްޕަ އަދި ދޮންބައްޕަ ނާޒިމާ ވެސް ސުވާލު ކުރި ކަމަށް ޝިފާއު ވިދާޅުވި އެވެ.

އެފަދަ ޒާތީ މައުލޫމާތުތައް އާންމު ކުރަން ޖެހުނު ސަބަބަކީ ޝިފާއު ވިދާޅުވި ގޮތުގައި ޓީވީ ޗެނަލަކުން އެފަދަ ގިނަ ވާހަކަތަކެއް އާންމު ކުރުމާ ގުޅިގެންނެވެ. އެ ނޫން ނަމަ އެ ވާހަކަތައް އާންމު ނުކުރާނެ ކަމަށް ޝިފާއު ވިދާޅުވި އެވެ.