މަރުގެ މައްސަލާގައި ޒާތީ މައުލޫމާތު އާއްމުކުރުމުން ފުލުހުންނަށް ފާޑުކިޔުން!

މާލޭގެ އިމާރާތަކުން ވެއްޓި މަރުވި ޒުވާން އަންހެން ކުއްޖާގެ ހައްގަށް އަރައިގަނެވޭ ގޮތަށް، ވަރަށް ޒާތީ މައުލޫމާތުތަކެއް އާއްމުކުރި މައްސަލާގައި ފުލުހުންނަށް ފާޑުކިއުން އަމާޒުވެއްޖެ އެވެ.

ދެކުނުގެ ރަށަކަށް ނިސްބަތްވާ 25 އަހަރުގެ ކުއްޖާ މިދިޔަ އޮގަސްޓް 14 ގައި މަރުވީ މާފަންނު ގެއެއްގެ ނުވަ ވަނަ ފްލޯ އިން ވެއްޓިގެންނެވެ. މި މަރާ އެކު، އެ ކުއްޖާ ފަރުވާ ހޯދަމުން ދިޔަ ބަލީގެ ތަފްސީލުތަކާ އެކު ޒާތީ ގިނަ މައުލޫމާތުތަކެއް އާއްމުވާ ގޮތަށް ޗެނަލް 13 އިން ވަނީ ޕްރޮގްރާމެއް ގެނެސްފަ އެވެ. އޭގައި، އަންހެން ކުއްޖާގެ ދޮން ބައްޕަ، ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމަށް ބޮޑެތި ތުހުމަތުތަކެއް ކޮށްފައިވެ އެވެ.

އަންހެން ކުއްޖާގެ ނަފްސާނީ ފަރުވާއާ ގުޅޭގޮތުން، ފުލުހުންގެ އިސް މަގާމެއްގައި ހުންނެވި އެ ކުއްޖާގެ ބައްޕަ އިބްރާހިމް އަދުނާން އަނީސް އާއި އިންޑިއާގެ ހޮސްޕިޓަލާ ދެމެދު ކުރި އީ-މެއިލްގެ ސްކްރީންޝޮޓް އަދި ބޭސް ސިޓީގެ ފޮޓޯތަކާއި އަނީސްއާ ދެމެދު ދެއްކި ވާހަކަތަކުގެ ސްކްރީންޝޮޓު ޗެނަލް 13 އިން ދެއްކި އެވެ.

އެ ކުއްޖާގެ ޒާތީ މައުލޫމާތު މި މިންވަރަށް އާއްމުންނަށް ދޫކޮށްލާފައި ވަނިކޮށް، ފުލުހުން އިއްޔެ ބޭއްވި ނިއުސް ކޮންފަރެންސްގައި ވަނީ، ނާޒިމަށް އަމާޒުވި ތުހުމަތުތަކުގެ ދިފާއުގައި، މަރުގެ މައްސަލައެއްގައި އާއްމުކުރަން ނުވާ ވަރުގެ ގިނަ މައުލޫމާތުތަކެއް އާއްމުކޮށްފަ އެވެ.

އެ ނިއުސް ކޮންފަރެންސްގައި، މޭޖާ ކްރައިމް ޑިޕާޓްމަންޓުގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް ހަސަން ޝިފާއު، އަންހެން ކުއްޖާގެ ޒާތީ ވަރަށް ގިނަ މައުލޫމާތު ދެއްވި އެވެ.

މީގެ ކުރިން، މިފަދަ މައްސަލަތަކުގައި ހިމެނޭ މީހުންގެ ޒާތީ މައުލޫމާތުތަކާއި އަމިއްލަ އަށް މަރުވި ކަމަށް ބެލެވޭ މައްސަލަތަކުގެ ތަފުސީލުތައް ފުލުހުން އާންމުކޮށް ހާމައެއް ނުކުރެ އެވެ. ޕަބްލިކް އިންޓްރެސްޓް ހުރި ނަމަވެސް ފުލުހުން މީގެ ކުރިން އަމަލު ކޮށްފައިވަނީ އެގޮތަށެވެ.

އެ ކުއްޖާ މަރުވުމަށް ފަހު ހެދި ޓެސްޓްތަަކަށް ބާރުދީ، ޖިންސީ ގޯނާގެ ތުހުމަތު ޝިފާއު ދޮގު ކުރެއްވި އެވެ.

އެހާ ގިނަ ތަފްސީލްތައް އެފަދަ މަރުގެ މައްސަލައެއްގައި އާއްމުކުރުމަކީ ފުލުހުން ކުރާ ކަމެއް ނޫން ކަން ފާހަގަ ކުރައްވައި ޝިފާއު ވިދާޅުވީ، އެ މިންވަރަށް އެ މައުލޫމާތުތައް އާއްމުކުރަން ޖެހުނީ ޓީވީ ޗެނަލަކުން ދެއްކި ދޮގު ވާހަކަތަކަކާ ގުޅިގެން ކަމަށެވެ. އެހެން ނޫން ނަމަ އެ ވާހަކަތައް އާންމު ނުކުރާނެ ކަމަށް އޭނާ ވިދާޅުވި އެވެ.

ފުލުހުންގެ ޕްރެސް ކޮންފަރެންސާ ގުޅިގެން، ޕޮލިހުގައި ގިނަ ދުވަސްތަކެއް ވަންދެން މަސައްކަތްކުރި ޑރ. މުހައްމަދު ތޮއްޔިބު ވެސް ވަނީ ފާޑުކިޔައިފަ އެވެ.

އެކްސްގައި ކުރި ޕޯސްޓުގައި އޭނާ ބުނީ ވެރިކަމުގައި ތިބި ބަޔަކު ހިމާޔަތް ކުރުމަށްޓަކައި، މަރުވި މީހެއްގެ ޒާތީ މައުލޫމާތު އާއްމު ކުރުމަކީ ގާނޫނު ތަންފީޒުކުރާ މުއައްސަސާތަކަށް ނުފޫޒު ފޯރުވުމުގެ އަސަރު ކަމަށެވެ. އެއީ ފުލުހުން ހެދި ވަރަށް ބޮޑު ގޯހެއް ކަމަށް އޭނާ ބުންޏެވެ.

"އަޑުއަހާ މީހުންނަށް އައިބުހެން ހީނުވާނެ ގޮތަށް އެ އިބާރާތް ބަދަލުކޮށްލާނެ ސިކުނޑިއެއް ވެސް ނެތް ފުލުހުންގެ. މިއީ ވަރަށް އަމިއްލަ މައުލޫމާތެއް. އެ މައުލޫމާތެއް ލީކުކުރުމުގެ އެއްވެސް ހައްގެއް ފުލުހުންނަކަށް ނޯންނާނެ،" ހަސަންގެ ނަމުގައި މީހަކު ކުރި ޕޯސްޓެއްގައި ބުންޏެވެ.

އާމިނަތު ލަމްހާ އަސްލަމް ކުރި ޕޯސްޓުގައި ބުނީ އެއަށް ވުރެ އިހްތިރާމާއެކު ފުލުހުންނަށް، ތުހުމަތުތަކަށް އަލިއަޅުވާލެވޭނެ ކަމަށެވެ. މަރުވި މީހަކާ ބެހޭ ގޮތުން އެ ވަރަށް ތަފްސީލު އާއްމު ކުރުމަކީ ބޭކާރު ވާހަކައެއްކަން ފާހަގަކުރި އެވެ.

ފާތިމަތު ޒަހާ ކުރި ޕޯސްޓުގައި ބުނީ މަރުވެފައިވާ މީހަކާ ބެހޭ ގޮތުން އެ ކަހަލަ ޒާތީ ވާހަކަ ދެއްކުމަކީ ގޯހެއް ކަމަށެވެ.

"މިއީ އަސްލު ވަރަށް ޕާސަނަލް ވާހަކަތަކެއް. މި ކަހަލަ ވާހަކަތައް ނިޔާވެފައިވާ މީހަކާ ބެހޭގޮތުން ދެއްކުން އެއީ މައްސަލައެއް. ވަރަށް ބޮޑު މައްސަލައެއް،" އޭނާ ބުންޏެވެ.

ޗެނަލް 13 އިން ވަނީ އަންހެން ކުއްޖާގެ ޕްރޮގްރާމް ދެއްކުމުގެ ހަފުތާއެއް ކުރިން ސޯޝަލް މީޑިއާގައި ޓީޒާއެއް އާއްމުކޮށްފަ އެވެ. އެއާއެކު، އާއިލާގެ ފަރާތުން ފުލުހުންނަށް ފޮނުވި ސިޓީއާ އެކު، އެ އިދާރާއިން ވަނީ ބްރޯޑްކޮމް އަށް ޝަކުވާ ހުށަހަޅައިފަ އެވެ. އެ ޕްރޮގްރާމް ދެއްކީ، އެ ކޮމިޝަންގެ އެންގުމާ ހިލާފަށެވެ.