އަންނަ އަހަރުގެ ޖޫން މަހުން ފެށިގެން ޓީޖީއެސްޓީ 17 ޕަސެންޓަށް ބޮޑު ކުރަނީ

ޓޫރިޒަމް ދާއިރާ އިން ނަގާ ޓެކްސް، ޖީއެސްޓީ 17 ޕަސެންޓަށް ބޮޑު ކުރަން ސަރުކާރުގެ ފަރާތުން ރައްޔިތުންގެ މަޖިލީހަށް ފޮނުވައިފި އެވެ.

ސަރުކާރުގެ ފަރާތުން މާފަންނު ހުޅަނގު ދާއިރާގެ ޕީއެންސީގެ މެންބަރު މުހައްމަދު މުސްތަފާ ހުށަހަޅާފައިވާ އެ އިސްލާހުގައިވާ ގޮތުން މިހާރު ނަގަމުން އަންނަ ގޮތަށް 16 ޕަސެންޓުގައި ޓީޖީއެސްޓީ ނަގާނީ އަންނަ އަހަރު މެއި މެހުގެ ނިޔަލަށެވެ. އެކަމަކު އެ އަހަރު ޖޫން މަހުން ފެށިގެން ޓީޖީއެސްޓީ 17 ޕަސެންޓުގައި ނަގަން ފަށާނެ ކަމަށް އެ އިސްލާހުގައި ވެ އެވެ. އެއާ އެކު، ދައުލަތަށް އިތުރަށް 200 މިލިއަން ރުފިޔާ ލިބޭނެ އެވެ. ޓީޖީއެސްޓީގެ ބަދަލަށް އަމަލު ކުރަން ފަށަން ނިންމާފައިވަނީ އަންނަ އަހަރުގެ ޖޫން މަހުން ފެށިގެންނެވެ.

ޓީޖީއެސްޓީގެ އިތުރުން ގްރީން ޓެކްސް ވަނީ 100 ޕަސެންޓަށް އިތުރު ކުރަން ނިންމައިފަ އެވެ. އެގޮތުން 50 ކޮޓަރި އަށް ވުރެ މަދުން ހިންގާ ޓޫރިޒަމް ހިދުމަތްދޭ ތަންތަން ނުވަތަ ގެސްޓް ހައުސްތަކުން ތިން ޑޮލަރުގެ ބަދަލުގައި ހަ ޑޮލަރު ނަގަން ވަނީ ނިންމައިފަ އެވެ.

ރިސޯޓުތަކުން ގްރީން ޓެކްސްގެ ގޮތުގައި ނަގާނީ ޓޫރިސްޓެއްގެ ބޮލަކަށް ހަ ޑޮލަރުގެ ބަދަލުގައި 12 ޑޮލަރެވެ. އަދި އަންނަ ޓޫރިސްޓުންގެ ތެރެއިން ދެ އަހަރުން ދަށުގެ ކުދިންގެ އަތުން ގްރީން ޓެކްސްއެއް ނުނަގާނެ އެވެ. ގްރީން ޓެކްސްގެ އާ ބަދަލަށް އަމަލު ކުރަން ފަށާނީ އަންނަ ޖެނުއަރީ މަހުން ފެށިގެންނެވެ.

ސަރުކާރުން މީގެ ކުރިން ބުނެފައި ވަނީ ޖީއެސްޓީގެ ޓެކްސް ބޭސް ފުޅާކުރުމުގެ މަސައްކަތް ކުރާނެ ކަމަށާއި ނަމަވެސް ޖީއެސްޓީ އާއި ޓީޖީއެސްޓީ ބޮޑު ނުކުރާނެ ކަމަށެވެ.

އިގްތިސާދީ ހާލަތު ރަނގަޅު ކުރުމަށްޓަކައި ފަސް ކަމެއް ބަދަލު ކުރަން ސަރުކާރުން ވަނީ ނިންމައިފަ އެވެ. އޭގެ ތެރޭގައި؛

1. އެއާޕޯޓް ޑިވެލޮޕްމަންޓް ޓެކްސް އާއި ފީގެ ރޭޓް މުރާޖައާ ކުރުން.

2. ސިއްހަތަށް ގެއްލުން ހުރި ބާވަތްތަކުން ނަގާ ޑިއުޓީ ބޮޑުކުރުން.

3. ޖީއެސްޓީގެ އިދާރީ ގާނޫނު މުރާޖައާކޮށް ޓެކްސް ބޭސް ފުޅާކުރުން.

4. ގްރީން ޓެކްސްގެ ރޭޓްތައް މުރާޖައާ ކުރުން.

5. އިގްތިސާދަށް ތަފާތު ހަރަކާތްތައް އިތުރު ކުރުން.

ސަރުކާރުން ވަނީ އެއާޕޯޓް ޑިވަލޮޕްމަންޓް ޗާޖާއި ގްރީން ޓެކްސް ވެސް ބޮޑު ކުރުމަށް މަޖިލީހަށް ހުށަހަޅައިފަ އެވެ.

މި ތިން ބިލުގެ މަސައްކަތް ވެސް މާދަމާގެ އެޖެންޑާގައި ވަނީ ހިމަނައިފަ އެވެ.