ޓޫރިޒަމް ދާއިރާގެ ޓެކްސްތަކާއި އޭޑީސީ ބޮޑުކުރަން ފާސްކޮށްފި

ޓޫރިޒަމް ދާއިރާއިން ނަގާ ޓެކްސް، ޓީޖީއެސްޓީ އާއި ގްރީން ޓެކްސް އާއި ރާއްޖެއިން ބޭރަށް ފުރާ ޕަސިންޖަރުންގެ އަތުން ނަގާ ޓެކްސްތައް ބޮޑުކުރުމަށް ސަރުކާރުން ހުށަހަޅާފައިވާ ތިން ބިލް ރައްޔިތުންގެ މަޖިލީހުން ފާސްކޮށްފި އެވެ.

މަޖިލީހުން މިއަދު ފާސްކޮށްފައިވަނީ ޓޫރިޒަމް ދާއިރާއިން ނަގާ ޓީޖީއެސްޓީ ބޮޑުކުރުމަށް މުދަލާއި ހިދުމަތުގެ އަގުން ޓެކްސް ނެގުމުގެ އިސްލާހުގެ ގާނޫނަށް ހުށަހެޅި އިސްލާހާއި ގްރީން ޓެކްސް ބޮޑުކުރުމަށް ސަރުކާރުން ހުށަހެޅި އިސްލާހުގެ އިތުރުން އެއާޕޯޓް ޑިވެލޮޕްމެންޓް ފީ އާއި ޑިޕާޗާ ޓެކްސް ބޮޑުކުރުމުގެ އިސްލާހެވެ.

މި ތިން ބިލް ވެސް ފާސްކޮށްފައިވަނީ 71 މެންބަރުންގެ ވޯޓުންނެވެ. އެ ބިލް ފާސްކުރުމާ ދެކޮޅަށް އަށް މެންބަރަކު ވޯޓު ދެއްވި އެވެ.

ޓީޖީއެސްޓީ ގާނޫނަށް އިސްލާހު ގެންނަން ފާސްކުރީ އަންނަ އަހަރުގެ ޖޫން މަހުން ފެށިގެން ޓީޖީއެސްޓީ 17 ޕަސެންޓުގައި ނަގަން ފެށުމެވެ. އެ ބަދަލާއެކު، ދައުލަތަށް އިތުރަށް 200 މިލިއަން ރުފިޔާ ލިބޭނެ އެވެ.

ގްރީން ޓެކްސް ބޮޑުކުރުމަށް ފާސްކުރީ ކޮންމެ ޓޫރިސްޓެއްގެ ގޮތުން ހަ ޑޮލަރު ނަގަމުން އައި ތަންތަނުން 12 ޑޮލަރު ދައްކަން ޖެހޭ ގޮތަށް އަދި ތިން ޑޮލަރު ނަގަމުން އައި ތަންތަނުން އަންނަ އަހަރުން ފެށިގެން ހަ ޑޮލަރު ގްރީން ޓެކްސްގެ ގޮތުގައި ދައްކަން ޖެހޭ ގޮތަށެވެ. މިއީ ކުރިން ނަގަމުން އައި އަދަދަށް ވުރެ 100 ޕަސެންޓް އިތުރު އަދަދެކެެވެ. ގްރީން ޓެކްސް ބޮޑުކުރާނީ އަންނަ ޖުލައި މަހުން ފެށިގެންނެވެ.

އެއާޕޯޓް ޑިވެލޮޕްމެންޓް ފީ އާއި ޑިޕާޗާ ޓެކްސްއަށް ގެންނަ ފާސްކުރި އިސްލާހުގެ ދަށުން، އިކޮނޮމީ ކްލާހުގައި ރާއްޖެއިން ބާރަށް ދަތުރުކުރާ ބިދޭސީންގެ އަތުން ނަގާ ފީ 30 ޑޮލަރުން 50 ޑޮލަރަށް ބޮޑުވާނެ އެވެ.

މީގެ އިތުރުން ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން ނަގަމުން އައި 60 ޑޮލަރު 120 ޑޮލަރަށް ބޮޑުވާނެ އެވެ. އަދި ފަސްޓް ކްލާހުގައި ދަތުރުކުރާ އެންމެންގެ އަތުން ނަގާ ފީ 240 ޑޮލަރަށް ބޮޑުވުމުގެ އިތުރުން ޕްރައިވެޓް ޖެޓުގައި ދަތުރުކުރާ މީހުންގެ އަތުން ނަގާ ފީ 480 ޑޮލަރަށް ބޮޑުވާނެ އެވެ.