ޓޫރިޒަމް ދާއިރާއިން ނަގާ ޓެކްސްތައް ބޮޑުކުރަން މުޅި މަޖިލިސް ކޮމިޓީން ފާސްކޮށްފި

ޓޫރިޒަމް ދާއިރާ އިން ނަގާ ޓެކްސް، ޓީޖީއެސްޓީ އާއި ގްރީން ޓެކްސް އާއި އެއާޕޯޓު ޓެކްސް ބޮޑުކުރުމަށް ސަރުކާރުން ހުށަހަޅާފައިވާ ދެ ބިލް ރައްޔިތުންގެ މަޖިލީހުގެ މުޅި މަޖިލިހުގެ ކޮމިޓީން މިއަދު ފާސްކޮށްފި އެވެ.

ޓީޖީއެސްޓީ ބޮޑުކުރުމަށް މުދަލާއި ހިދުމަތުގެ އަގުން ޓެކްސް ނެގުމުގެ އިސްލާހުގެ ގާނޫނަށް ހުށަހެޅުއްވީ ސަރުކާރުގެ ފަރާތުން މާފަންނު ހުޅަނގު ދާއިރާގެ ޕީއެންސީގެ މެންބަރު މުހައްމަދު މުސްތަފާ އެވެ.

ބިލުގައިވާ ގޮތުން މިހާރު ނަގަމުން އަންނަ ގޮތަށް 16 ޕަސެންޓުގައި ޓީޖީއެސްޓީ ނަގާނީ އަންނަ އަހަރު މެއި މަހުގެ ނިޔަލަށެވެ. އެކަމަކު އަންނަ އަހަރުގެ ޖޫން މަހުން ފެށިގެން ޓީޖީއެސްޓީ 17 ޕަސެންޓުގައި ނަގަން ފަށާނެ ކަމަށް އެ އިސްލާހުގައި ވެ އެވެ. އެއާ އެކު، ދައުލަތަށް އިތުރަށް 200 މިލިއަން ރުފިޔާ ލިބޭނެ އެވެ.

ބިލު ދިރާސާކުރި ސަބް ކޮމިޓީން ވަނީ އަންނަ އަހަރުގެ ޖޫން މަހުގެ ނިޔަލަށް 16 ޕަސެންޓުގައި ނަގައި ޖުލައި މަހުން ފެށިގެން 17 ޕަސެންޓުގައި ނަގަން އިސްލާހުކޮށްފަ އެވެ.

މުޅި މަޖިލީހުގެ ކޮމިޓީން މި ބިލު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 68 މެންބަރުންގެ އިއްތިފާގުންނެވެ.

ގްރީން ޓެކްސް ބޮޑުކުރުމަށް ސަރުކާރުން ހުށަހެޅި އިސްލާހުގައި ބުނާގޮތުން އަންނަ އަހަރުން ފެށިގެން ކުރިން ހަ ޑޮލަރު ދައްކަމުން އައި ތަންތަނުން 12 ޑޮލަރު ދައްކަން ޖެހޭނެ އެވެ. އަދި ތިން ޑޮލަރު ދައްކަމުން އައި ތަންތަނުން ހަ ޑޮލަރު ދައްކަން ޖެހޭނެ ކަމަށް އެ އިސްލާހުގައި ބުނެފައިވެ އެވެ. މިއީ ކުރިން ދައްކަމުން އައި އަދަދަށް ވުރެ 100 ޕަސެންޓު އިތުރު އަދަދެކެެވެ.

ސަބްކޮމިޓީން ވަނީ ގްރީން ޓެކްސް ބޮޑުކުރާ ތާރީހު ވެސް އަންނަ އަހަރުގެ ޖުލައި މަހުން ފެށިގެން ނަގަން ފަސްކޮށްފަ އެވެ. ސަރުކާރުން ހުށަހެޅި ބިލުގައި އޮތީ ޖޫން މަހުން ފެށިގެން ނަގާ ގޮތަށެވެ.

ގްރީން ޓެކްސް ބޮޑުކުރުމުގެ ބިލުގައި 25 ކޮޓަރިއަށް ވުރެ ކުދި ގެސްޓް ހައުސްތައް ނުހިމެނުމަށް އިދިކޮޅު އެމްޑީޕީން ކެންދޫ ދާއިރާގެ މެންބަރު މައުރޫފް ޒާކިރު ހުށަހެޅުއްވި ނަމަވެސް އެ އިސްލާހު ފާހެއް ނުވެ އެވެ.

އެއާޕޯޓު ޑިވެލޮޕްމެންޓް ފީ އާއި ޑިޕާޗާ ޓެކްސްއަށް ސަރުކާރުން ހުށަހެޅި ބިލު ވެސް މިއަދުގެ ކޮމިޓީގައި ވަނީ ފާސްކޮށްފަ އެވެ. އެ ދެ ފީގެ ގޮތުގައި އިކޮނޮމީ ކްލާހުގައި ދަތުރުކުރާ ބިދޭސީންގެ އަތުން ގާނޫނަށް ގެންނަ އިސްލާހު ރައްޔިތުންގެ މަޖިލިހުން ފާސްވުމުން ދެން ނަގަން ފަށާނީ 30 ޑޮލަރުގެ ބަދަލުގައި 50 ޑޮލަރެވެ. އެއީ 65 ޕަސެންޓު އިތުރުވުމެކެވެ.

ގާނޫނަށް ގެންނަ އިސްލާހު މަޖިލިހުން ފާސްވުމުން، ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން ނަގާނީ 120 ޑޮލަރެވެ. އެއީ 100 ޕަސެންޓުގެ އިތުރުވުމެކެވެ. އިސްލާހު ފާސްވެއްޖެ ނަމަ، ފަސްޓް ކްލާހުގައި ދަތުރުކުރާ އެންމެންގެ އަތުން ނަގާނީ 240 ޑޮލަރެވެ. އެއީ 165 ޕަސެންޓުގެ އިތުރުވުމެކެވެ. އޭގެ އިތުރުން ޕްރައިވެޓް ޖެޓުގައި ދަތުރު ކުރާ މީހުންގެ އަތުން 480 ޑޮލަރު ނަގާނެ އެވެ. އެއީ ކުރިން ނަގަމުން އައި އަދަދަށް ވުރެ 300 ޕަސެންޓުގެ އިތުރުވުމެކެވެ.