އަންހެން ފުޓްބޯޅައިގެ މުބާރާތެއް ނެތުމުގެ ކަންބޮޑުވުން، އެކަމަކު ޓީމާ މެދު ނިޒާމް ދިނީ އުއްމީދު

އަންހެން ފުޓްބޯޅައިގެ މުބާރާތެއް ނެތުމަކީ އަންހެން ޓީމަށް އޮތް ގޮންޖެހުމެއް ކަމަށާއި އެކަމަކު ޓީމާ މެދު ބޮޑު އުއްމީދެއް އެބައޮތް ކަމަށް ކޯޗު މުހައްމަދު ނިޒާމު ބުނެފި އެވެ.

ރާއްޖޭގައި އަންހެން ފުޓްބޯޅައިގެ އެއްވެސް މުބާރާތެއް ނޯވެ އެވެ. އޮލިމްޕިކްސް ކުޅިވަރުތަކުގެ ތެރެއިން އަންހެން މުބާރާތެއް ނުބާއްވާ ހަމައެކަނި އެސޯސިއޭޝަނަކީ އެފްއޭއެމް އެވެ.

އަންނަ ބުރާސްފަތި ދުވަހުން ފެށިގެން މި މަހުގެ 30 އަށް ނޭޕާލްގައި ބާއްވާ އަންހެން ސާފް ޗެމްޕިއަންޝިޕަށް ގައުމީ އަންހެން ޓީމު އިއްޔެ ވަނީ ފުރައިފަ އެވެ. ރާއްޖެ މިފަހަރު ލައްވާލީ ނޭޕާލާއި ސްރީ ލަންކާ އަދި ބޫޓާނާ އެއް ގުރޫޕެއްގަ އެވެ. އަނެއް ގުރޫޕްގައި ހިމެނެނީ އިންޑިއާ އާއި ބަންގްލަދޭޝް އަދި ޕާކިސްތާނެވެ.

ނިޒާމް ބުނީ ރާއްޖޭގެ އަންހެން ފުޓްބޯޅަ އަށް އާ ކުޅުންތެރިންގެ ޝައުގުވެރިކަން އުފައްދަން ސާފް ޗެމްޕިއަންޝިޕުގައި ރަނގަޅު ނަތީޖާއެއް ނެރެން އުއްމީދު ކުރާ ކަމަށެވެ.

"ވާދަވެރި ރަނގަޅު ކުޅުމެއް މިފަހަރު ޓީމުން ފެނިގެންދާނެކަމުގެ އުއްމީދު ވަރަށް ބޮޑު،" ނިޒާމް ބުންޏެވެ.

"މިފަހަރު އަޅުގަނޑުމެން ދައްކާ ކުޅުމަކީ ރާއްޖޭގެ އަންހެން ފުޓްބޯޅަ އަށް އުއްމީދެއް ގެނެސްދެނިވި ކުޅުމެއްކަމުގައި ދައްކާ މިކަމުގައި ހިއްސާވާ މީހުންނަށް މީގެ މުހިންމުކަން ދެއްކުން، ނޫނީވިއްޔާ އެ ކުޅުންތެރިންގެ ފަރާތުން ޑިމާންޑެއް ދެއްކުން މީގެ މައިގަނޑު މަގުސަދަކީ."

ނިޒާމް ބުނީ އެކަން ދަނޑުމަތީގައި ދެއްކިއްޖެ ނަމަ އަންހެން ފުޓްބޯޅަ މުބާރާތާއި އަންހެން ފުޓްބޯޅައިގެ އެވޯޑް ވެސް "ލޯ މައްޗަށް ފެނިގެންދާނެ" ކަމަށެވެ.

މުބާރާތުގައި އަންނަ ހުކުރު ދުވަހު ރާއްޖޭގެ ފުރަތަމަ މެޗުގައި ކުޅޭނީ ލަންކާއާ ދެކޮޅަށެވެ. އަންނަ ހޯމަ ދުވަހު ނެޕާލާ ދެކޮޅަށް ރާއްޖޭން ނުކުންނާނެ އެވެ. ބޫޓާނާ ދެކޮޅަށް ކުޅޭނީ މި މަހު 24 ގަ އެވެ.