އަންހެން ފުޓްބޯޅަ އަށް ކަމާބެހޭ ފަރާތްތަކުން އިހުމާލުވެއްޖެ: މާޔަން

ވިމެންސް ސާފް ޗެމްޕިއަންޝިޕުގައި ގައުމީ އަންހެން ފުޓްބޯޅަ ޓީމަށް ކުރިމަތިވި ނާކާމިޔާބަކީ، ކަމާބެހޭ ފަރާތްތަކުން އަންހެން ފުޓްބޯޅައަށް އަޅާނުލުމުގެ ނަތީޖާ ކަމަށް ކުރީގެ ކުޅުންތެރިޔާ މަރިޔަމް މާޔަން މުހައްމަދު ބުނެފި އެވެ.

ސާފް ޗެމްޕިއަންޝިޕުގައި ރާއްޖޭން ކުޅުނު ތިން މެޗުގައި ރާއްޖެ ކޮޅަށް 25 ލަނޑު ވަނެވެ. ދިވެހި ޓީމަށް އެންމެ ލަނޑެއް ވެސް ނުޖެހުނެވެ.

އަންހެން ފުޓްބޯޅަ ޓީމުގެ އެސިސްޓެންޓް ކޯޗުކަން މަގާމު ވެސް ކުރިން އަދާކުރި މާޔަން ބުނީ، ނަތީޖާއާ މެދު ދެން އިތުރަށް ނުވިސްނައި އަންހެން ފުޓްބޯޅަ އަށް މަސައްކަތް ކުރަން ޖެހޭ ކަމަށެވެ.

"ހަމަ އަންހެން ފުޓްބޯޅަ އަށް ވެސް އޮންނާނީ މި އުސޫލު. ޔޫތު ޑިވެލޮޕްމެންޓްގެ ތެރެއިން ކުޅުންތެރިން ރެކްރޫޓް ކުރަން ޖެހޭނީ. އެހާހިސާބުން އަންހެން ފުޓްބޯޅަ ޑިވެލޮޕް ކުރަން ފަށަންވީ،" ވިމެން ފުޓްބޯޅައިގެ ނަމުގައި އަންހެން ޓީމެއް ވެސް ހިންގާ މާޔަން ބުންޏެވެ.

އޭނާ ބުނީ ރާއްޖޭގެ އަންހެން ފުޓްބޯޅައަކީ ކުރިން މި ސަރަހައްދުން މެޑަލް ހޯދި ޓީމެކެވެ. އެކަމަކު ފަހަތަށް ވެއްޓިގެން ދިޔައީ މަސައްކަތް ނުކުރެވުމުން ކަމަށް މާޔަން ބުންޏެވެ.

އޭނާ އެ އިޝާރާތް ކުރީ 2019 ގެ ސައުތު އޭޝިއަން ގޭމްސް ބްރޯންޒް މެޑަލް ހޯދި މުބާރަތަށް އިޝާރާތްކޮށެވެ. އަދި 2016 ގައި ސާފް ޗެމްޕިއަންޝިޕުގެ ސެމީ ފައިނަލަށް ވެސް ރާއްޖޭން ދަތުރު ކުރި އެވެ. އެ އަހަރު ރާއްޖޭން ސެމީ ފައިނަލަށް ދަތުރު ކުރި ލަންކާ އާއި ބޫޓާން ބަލި ކުރުމަށް ފަހު އެވެ. އެކަމަކު މި ފަހަރު އެ ދެ ގައުމު އަތުން ވެސް ރާއްޖެ ބަލިވީ އެވެ. ބުޓާން އަތުން ބަލިވީ 13-0 ގެ ތަފާތު ބޮޑު ނަތީޖާ އަކުންނެވެ.

މާޔަން ބުނީ އޭރު ރާއްޖެ އަތުން ބަލިވި ގައުމުތަކުން، އަންހެން ފުޓްބޯޅައިގެ ގިނަ މަސައްކަތްތަކެއް ކުރި ކަމަށެވެ.

"ބޫޓާން ފަދަ ގައުމުތަކުން އެ ފެނުނީ އެ މަސައްކަތުގެ ނަތީޖާ،" އޭނާ ބުންޏެވެ.

ބޫޓާންގައި އަންހެން ފުޓްބޯޅައަށް ހާއްސަ އެކަޑަމީއެއް، އެ ގައުމުގެ އެފްއޭގެ ދަށުން އޮވެ އެވެ. ރާއްޖޭގައި ވެސް އެފްއޭއެމްގެ ދަށުން އަންހެން ފުޓްބޯޅަ އެކަޑަމީއެއްގެ މަސައްކަތް ފެށި އެވެ. އެކަމަކު އެ އެސޯސިއޭޝަންގެ އެހެން މަސައްކަތްތަކެކޭ އެއްގޮތަށް އަންހެން ފުޓްބޯޅަ އެކަޑަމީ ވެސް ދިޔައީ ފަނުފުލުންނެވެ.

މާޔަން ބުނީ ވެދިޔަކަމެއް ވެދިޔައީ ކަމަށެވެ. އެކަމަކު އަލުން އާ ވިސްނުމަކާ އެކު މަސައްކަތް ފަށަން ޖެހޭ ކަމަށް، އޭނާ ބުންޏެވެ.

"މިހާރު ވެސް މާ ބޮޑަށް ވެސް ލަސް ވެއްޖެ. އަލުން ފަށައިގެން މަސައްކަތްތަކެއް ކުރަން ޖެހޭކަން އެނގިގެން އެދިޔައީ،" އޭނާ ބުންޏެވެ.

"ސާފްގެ އުމުރުފުރާގެ މުބާރާތްތަކުގައި ވާދަކުރަން ފަށަން އެބަޖެހޭ. އެހާހިސާބުން ފަށަންވީ."

ސާފުން، އަންހެން ފުޓްބޯޅައިގެ އުމުރުފުރާގެ މުބާރާތްތަކެއް ވެސް ކުރިއަށް ގެންދެ އެވެ. އެކަމަކު އެ މުބާރާތްތަކުގައި ރާއްޖޭން ވާދައެއް ނުކުރެ އެވެ.