އަބްމާނީގެ ކުންފުނިން ކަރަންގެ ޕްރޮޑަކްޝަން ހައުސްގެ ހިއްސާއެއް ގަންނަނީ

އިންޑިއާގެ މަހުޖަނު މުކޭޝް އަމްބާނީގެ ކުންފުންޏެއް ކަމަށްވާ ރިލަޔަންސް އިންޑަސްޓްރީސް ލިމިޓެޑް (އާރްއައިއެލް) އިން ބޮލީވުޑްގެ ޑައިރެކްޓަރު/ޕްރޮޑިއުސަރު ކަރަން ޖޯހަރްގެ ދަރްމާ ޕްރޮޑަކްޝަން ހައުސްގެ ހިއްސާއެއް ގަތުމަށް މަސައްކަތް ކުރަމުން އަންނަ ކަމަށް "ދި އިކޮނޮމިކް ޓައިމްސް" އިން އިއްޔެ ރިޕޯޓުކޮށްފި އެވެ.

އެ ރިޕޯޓުގައި ބުނެފައި ވަނީ މީގެ ކުރިން މަޝްހޫރު ޕްރޮޑިއުސަރު އެކްތާ ކަޕޫރްގެ ބަލާޖީގެ މައިނޯރިޓީ ހިއްސާއެއް ރިލަޔަންސް އިން ގަތް ގޮތަށް ދަރްމާ ޕްރޮޑަކްޝަންސްގެ ހިއްސާއެއް ވެސް ގަތުމަށް މަސައްކަތް ކުރަމުން އަންނަ ކަމަށެވެ.

ދަރްމާގެ 90.7 ޕަސެންޓް ހިއްސާ އޮންނަނީ ކަރަން އަށެވެ. އަދި 9.24 ޕަސެންޓް ހިއްސާ އޮންނަނީ ކަރަންގެ މަންމަ ހިރޫ ޖޯހަރަށެވެ. މި ވަގުތު ދާރްމާ އިން އަންނަނީ ވިޔަފާރި ފުޅާކުރަން ބައިވެރިން ހޯދުމުގެ މަސައްކަތް ވެސް ކުރަމުންނެވެ. ކަރަން ވަނީ އޭނާގެ ހިއްސާ ވިއްކާލުމަށް ގިނަ ދުވަސްތަކެއް ވަންދެން މަސައްކަތްކޮށްފަ އެވެ. ނަމަވެސް، އަގާ ގުޅޭ މައްސަލަތަކާ ހުރެ މިހާތަނަށް އެއްވެސް އެއްބަސްވުމަކަށް އާދެވިފައި ނުވެ އެވެ.

މީގެ ކުރިން ވަނީ އިންޑިއާގެ ބޮޑު ކުންފުންޏެއް ކަމަށްވާ ގޮއެންކާ ގްރޫޕްގެ ދަށުގައިވާ ސަރެގާމާ އިން ދަރްމާ ގަތުމަށް މަސައްކަތް ކުރާ ކަމުގެ އަޑުތަކެއް ވެސް ފެތުރިފަ އެވެ. ނަމަވެސް، ނޫސްތަކުން ރިޕޯޓްކުރި ގޮތުގައި، އަގާ ގުޅޭ މައްސަލައެއްގައި އެ އެއްބަސްވުން ވެސް ކުރިއަށް ނުދިޔަ އެވެ.

ކަރަންގެ ބައްޕަ ޔަޝް ޖޯހަރު 1979 ވަނަ އަހަރު އުފެއްދި ދަރްމާ ޕްރޮޑަކްޝަންސް އަކީ އިންޑިއާގެ އެންމެ ކުރިއަރާފައިވާ ފިލްމު ޕްރޮޑަކްޝަން ކުންފުނިތަކުގެ ތެރެއިން އެއް ކުންފުންޏެވެ. ކާމިޔާބު އެތައް ފިލްމުތަކެއް އެ ކުންފުނިން އުފައްދާފައިވެ އެވެ. ކަރަން އެ ކުންފުންޏާ ހަވާލުވީ އޭނާގެ ބައްޕަ މަރުވުމުން 2003 ގަ އެވެ.

ކަރަން ވަނީ ކުންފުނީގެ ހިންގުމާ ހަވާލުވެ، "ކަބީ ހުޝީ ކަބީ ގަމް" އާއި "މައި ނޭމް އިޒް ޚާން" އަދި "ސްޓޫޑެންޓް އޮފް ދަ އިޔާ" ކަހަލަ މަޝްހޫރު އެތައް ފިލްމުތައް ގެނެސްދީފަ އެވެ.

ނަމަވެސް، ރިޕޯޓްތައް ބުނި ގޮތުގައި، މިހާރު ޕްރޮޑަކްޝަންގެ ހަރަދުތައް ބޮޑުވެ، އެ ޕްރޮޑަކްޝަންގެ ފިލްމުތައް ބަލަން ސިނަމާތަކަށް ދާ މީހުންގެ އަދަދު ވެސް ވަރަށް ބޮޑަށް މަދުވުމުން އަދި އޯޓީޓީ ޕްލެޓްފޯމްތަކަށް އޮންނަ ޑިމާންޑު ބޮޑުވުމުން ދަރްމާ ކަހަލަ ކުންފުނިތަކަށް ވަނީ އާމްދަނީ ހޯދުމަށް ގޮންޖެހުންތަކާ ކުރިމަތިވެފަ އެވެ.

ސަރެގާމާ އިން ދަރްމާ ގަތުމަށް މަސައްކަތް ކުރާ ކަމުގެ އަޑުތަކާއި އަމްބާނީގެ ރިލަޔަންސް އިން މައިނޯރިޓީ ހިއްސާއެއް ގަންނަން އުޅޭ ކަމުގެ ޚަބަރުތައް ފެތުރެމުންދަނިކޮށް ދަރްމާގެ ސޯޝަލް މީޑިއާ އެކައުންޓްތަކުގެ ބަޔޯގައި ކަރަން ޖޯހަރުގެ ނަން "މާލިކު"ގެ ގޮތުގައި ކުއްލިއަކަށް ލިޔުމުން ގިނަ ބައެއްގެ ސަމާލުކަން ވަނީ އެކަމަށް ވެސް ލިބިފަ އެވެ.

ކަރަންގެ ޕްރޮޑަކްޝަނުން އެންމެފަހުން ގެނެސްދިން ފިލްމު "ޖިގްރާ"އަށް ވެސް ލިބުނު ތަރުހީބު ވަރަށް ކުޑަ އެވެ. މިދިޔަ ހުކުރު ދުވަހު ޕްރިމިއާކުރި، އާލިއާ ބަޓް ލީޑު ރޯލު ކުޅޭ އެ ފިލްމަށް ޓިކެޓް ނަގާ އަދަދު މަދުވުމުން ވަރަށް ގިނަ ޝޯތައް ވަނީ ކެންސަލްކޮށްފަ އެވެ.