މަރުގެ މައްސަލައެއްގައި ދެބަސްވެ އިންޑިއާ އާއި ކެނެޑާއިން ސަފީރުން ބޭރުކޮށްފި

އިންޑިއާގައި ވަކިވެގަތުމަށް މަސައްކަތްކުރާ ސިކުންގެ މީހަކު ކެނެޑާގައި މަރާލި މައްސަލައިގައި، ކެނެޑާގައި ހުންނަވާ އިންޑިއާގެ ސަފީރުގެ ނަން، "ޕާސަންސް އޮފް އިންޓަރެސްޓް" ލިސްޓުގައި ހިމެނުމާ އެކު އުފެދުނު ނުތަނަވަސްކަމުގެ ތެރޭގައި އެއް ގައުމުން އަނެއް ގައުމުގެ އެންމެ އިސް ޑިޕްލޮމެޓާ އެކު ފަސް ޑިޕްލޮމޭޓަކު ގައުމުން ބޭރުކޮށްފި އެވެ.

އިންޑިއާއިން ބުނީ ކެނެޑާގައި ތިބި އެ ގައުމުގެ ހަ ޑިޕްލޮމެޓުން އަނބުރާ ގެންނަން ނިންމާފައިވާ ކަމަށެވެ. ނަމަވެސް ކެނެޑާއިން ބުނީ އެ މީހުން އިންޑިއާއިން ގެންދަނީ ނޫން ކަމަށާއި އެ މީހުންނަށް ވާނީ ގައުމުން ނުކުންނަށް ނޯޓިސް ދީފައި ކަމަށެވެ.

ކެނެޑާގެ ރައްޔިތެއް ކަމަށްވާ ހަރުދީޕް ސިންގް ނިޖާރު 2023 ވަނަ އަހަރު މަރާލުމުގައި އިންޑިއާގެ އިންޓެލިޖެންސް އިދާރާތަކާ ގުޅުންހުރި ކަމަށް ގަބޫލުކުރެވޭ ތުހުމަތުތަކެއް ހުރި ކަމަށް ކެނެޑާއިން ބުނުމާ އެކު ދެ ގައުމުގެ ގުޅުން ވަނީ ވަރަށް ބޮޑަށް ގޯސްވެފަ އެވެ.

ދެ ފަރާތުގެ އެންމެ އިސް ސަފީރުން ހިމެނޭގޮތަށް ޑިޕްލޮމެޓުން ބޭރުކުރުމަކީ މި މައްސަލައިގައި އަދި މިހާތަނަށް ހިނގާފައި ނުވާ ބޮޑު ކަމެކެވެ.

އިންޑިއާއިން ނިންމީ ކެނެޑާގެ އޮޓާވާގައި ހުންނަވާ އެކްޓިން ހައި ކޮމިޝަނަރު ސްޓުއާޓް ވީލާ، އޭނާގެ ޑެޕިއުޓީ އަދި ފަސްޓް ސެކްރެޓަރީންގެ ހަތަރު ބޭފުޅަކު ބޭރުކުރުމަށް އަދި އާދިއްތަ ދުވަހުގެ މެންދަމުގެ ކުރިން ފުރުމަށް އަމުރުކުރިއެވެ.

ކެނެޑާއިން ވެސް ހަމަ މިފަދަ ފިޔަވަޅުތަކެއް އަޅާނެ ކަމަށް ވަނީ ބުނެފަ އެވެ.

ކެނެޑާގެ ފުލުހުން ބުނީ "އިންޑިއާ ސަރުކާރުގެ އޭޖެންޓުން ކެނެޑާގައި ބޮޑެތި ޖިނާއީ އަމަލުތަކުގައި ބައިވެރިވާކަމުގެ ހެކި" އެބަހުރި ކަމަށެވެ.

ކެނެޑާގެ ފޮރިން މިނިސްޓަރު މެލަނީ ޖޮލީ ވިދާޅުވީ އިންޑިއާއިން ތަހުގީގުގައި އެއްބާރުލުން ދޭން އިންކާރުކޮށްފައި ވާއިރު އެ ގައުމުގެ ސަފީރުންގެ ޑިޕްލޮމެޓިކް އިމިއުނިޓީ ނަގަން ވެސް އިންކާރުކޮށްފައިވާ ކަމަށެވެ.

ކެނެޑާ އަށް 1997 ގައި ހިޖުރަކޮށް 2015 ގައި އެ ގައުމުގެ ރައްޔިތަކަށްވި ނިޖާރުއަކީ އިންޑިއާއިން ވަކިވެފައިވާ ސިކު ދައުލަތެއް ކަމަށްވާ ހާލިސްތާން އުފެއްދުމަށް ވަކާލާތުކުރި މީހެކެވެ.

އޭނާއަކީ ޓެރަރިޒަމާއި މީހުން މެރުމަށް ރޭވުމުގެ ތުހުމަތުގައި އިންޑިއާގެ އިދާރާތަކުން ހޯދަމުންދިޔަ މީހެކެވެ.

ވެންކޫވާރާގައި 2023 ވަނަ އަހަރުގެ ޖޫން މަހު މަންދިރެއްގެ ޕާކިންގައި ހިނގި ނިޖާރު މަރާލުމުގެ މައްސަލައާ ގުޅިގެން އިންޑިއާގެ ހަތަރު މީހަކު ހައްޔަރުކޮށްފައިވާ ކަމަށެވެ.

އިންޑިއާއިން ބުނީ ސަފީރު، ސަންޖޭ ކުމާރު ވަރުމާއަކީ ކުރިން ޖަޕާނާއި ސޫދާނުގައި ސަފީރުކަން ކުރައްވާފައިވާ، އިހްތިރާމު ލިބިފައިވާ ކެރިއަ ޑިޕްލޮމެޓެއް ކަމަށެވެ. -- އޭއެފްޕީ