އިންޑިއާއިން ކެނެޑާގެ އިސްތިގުލާލަށް އަރައިގަތްކަން ސާފުކޮށް އެނގޭ: ޓްރޫޑޯ

އިންޑިއާއިން ކެނެޑާގެ އިސްތިގުލާލަށް އަރައިގެންފައިވާކަން ވަރަށް ސާފުކޮށް އެނގެން އެބަހުރި ކަމަށް ކެނެޑާގެ ބޮޑުވަޒީރު ޖަސްޓިން ޓްރޫޑޯ އިއްޔެ ވިދާޅުވެއްޖެ އެވެ.

އިންޑިއާގެ ސިކުން ހިންގާ ވަކިވެގަތުމުގެ ހަރަކާތަށް ތާއީދުކުރާ މީހަކު ކެނެޑާގައި މިދިޔަ އަހަރު މަރާލި ހާދިސާގެ ތަހުގީގަށް ފަހު ހާމަކުރި ކަންކަމާ ގުޅިގެން ދެ ގައުމުގެ ގުޅުން ގޯސްވެ އެއްގައުމުން އަނެއް ގައުމެއްގެ ޑިޕްލޮމޭޓުން ވަނީ ބޭރުކޮށްފަ އެވެ.

ސިކުންނަށް ވަކި ދައުލަތެއް އުފައްދަން ހިންގާ "ޚާލިސްތާން" ކެމްޕެއިނަށް ތާއީދުކުރާ ސިކުންގެ މީހެއް ކަމަށްވާ ހަރްދީޕް ސިންގް ނީޖާރް ސިކުންގެ ފައްޅިއެއްގެ ބޭރުގައި މަރާލުމުގެ އަޑީގައި ތިބީ އިންޑިއާގެ ޖާސޫސުން ކަމަށް ކެނެޑާއިން ތުހުމަތުކުރެ އެވެ.

ބޭރުގެ ނުފޫޒާ ގުޅޭ ގޮތުން ބުދަ ދުވަހު ބޭއްވި އިންކުއަރީގައި ޓްރޫޑޯ ވަނީ ނީޖާރުގެ މަރާ ގުޅޭ ގޮތުން ވާހަކަ ދައްކަވައިފަ އެވެ. އޭނާ ވިދާޅުވީ ކެނެޑާގައި އުޅޭ އެ ގައުމުގެ މީހުންނަށް އަމާޒުކޮށް އިންޑިއާ ސަރުކާރުގެ މަންދޫބުން އެކި ހަރަކާތްތައް ހިންގާ ކަމަށެވެ.

ޓްރޫޑޯ ވިދާޅުވީ ތަހުގީގަށް އެނގުނު ކަންކަން އިންޑިއާ ސަރުކާރާ ހިއްސާކުރުމާ ހިތްހަމަނުޖެހިފައިވާ ކަމަށެވެ. އަދި އެއްބާރުލުން ދިނުމުގެ ބަދަލުގައި އިސްކުރީ ދެކޮޅުވެރިކަން ކަމަށާއި ޑިޕްލޮމޭޓުން އިންޑިއާއިން ބޭރުކޮށްލީ ވެސް އެއްވެސް ސަބަބެއް ނުދައްކާ ކަމަށް ވިދާޅުވި އެވެ.

"މި ތުހުމަތުތަކަށާއި ތަހުގީގަށް އިންޑިއާއިން ދިން ޖަވާބަކީ މި ސަރުކާރާ ދެކޮޅަށް ދޭ ހަމަލާތައް ދެގުނަ ކުރުން... އަދި ކެނެޑާގެ ޑިޕްލޮމެޓުންގެ ތެރެއިން ގިނަ އަދަދެއްގެ ޑިޕްލޮމެޓުން އެއްވެސް ސަބަބަކާނުލައި އިންޑިޔާއިން ބޭރުކޮށްލުން،" ޓްރޯޑޯ ވިދާޅުވި އެވެ.

ބުދަ ދުވަހު ޓްރޫޑޯ އިންކުއަރީގައި ވިދާޅުވެފައި ވަނީ ކެނެޑާއާ ގާތް ގުޅުމެއް އޮންނަ "ވިޔަފާރީގެ މުހިންމު ބައިވެރިޔަކާ އެކު ކުރިމަތިލުމެއް އޮންނާނެ ހާލަތެއް" އޭނާގެ ސަރުކާރުން ބޭނުން ނުވާ ކަމަށެވެ.

ނަމަވެސް ކެނެޑާގެ އިސްތިގުލާލަށް ތެދުވާއިރު ފަހަތަށް ޖެހިވަޑައިނުގަންނަވާނެ ކަމަށް އޭނާ ވިދާޅުވި އެވެ.

ކެނެޑާއަށް 1997 ވަނަ އަހަރު ހިޖުރަކޮށް 2015 ވަނަ އަހަރު އެ ގައުމުގެ ރައްޔިތަކަށް ވި ނީޖާރު ވަކާލާތު ކުރީ އިންޑިއާއިން ބޭރުގައި އުފެދުނު ޚާލިސްތާން ނަމަކަށް ކިޔާ ސިކުންގެ ދައުލަތެއް އުފެއްދުމަށެވެ.

އޭނާ އަކީ ޓެރަރިޒަމާއި މީހުން މެރުމަށް ރޭވުން ފަދަ ތުހުމަތުގައި އިންޑިއާގެ ކަމާބެހޭ ފަރާތްތަކުން ހޯދަމުން ދިޔަ މީހެކެވެ. ނީޖާރް 2023 ވަނަ އަހަރުގެ ޖޫން މަހު ވެންކޫވާގެ ސިކުންގެ ފައްޅިއެއްގެ ޕާކިން ލޮޓުގައި މަރާލި މައްސަލައިގައި އިންޑިއާގެ ހަތަރު މީހަކު ހައްޔަރުކުރި އެވެ. ކެނެޑާއިން ބުނާ ގޮތުގައި އެ މީހާ މަރާލުމަށް އިރުޝާދު ދީ އެކަމަށް މަގު ފަހިކޮށްދީފައިވަނީ އިންޑިއާގެ ޖާސޫސެކެވެ.

ނީޖާރް މަރާލުމާ ގުޅިފައިވާ ކަމަށް ކުރެވޭ ތުހުމަތުތަކަކީ ހަގީގަތާ ހިލާފު ވާހަކަތަކެއް ކަމަށާއި އެއީ ސިޔާސީ މަންފާއެއް ހޯދުމަށް އިންޑިއާއަށް ފުރައްސާރަ ކުރުމުގެ ވިސްނުމުގައި ދައްކާ ވާހަކަތަކެއް ކަމަށް އިންޑިއާ އިން ބުނެފައިވެ އެވެ. -- އޭއެފްޕީ