މާވަށު ސްކޫލްގެ ހުރިހާ ކްލާސްރޫމެއް ކައުންސިލުން އޭސީކޮށްދެނީ

ލ. މާވަށު ކައުންސިލްގެ ބަޖެޓުން ހަރަދުކޮށް، އެ ރަށު ސްކޫލުގެ ހުރިހާ ކްލާސްރޫމެއް އޭސީ ކޮށްދޭން ކައުންސިލުން ނިންމައިފި އެވެ.

ގުރޭޑް 10އާ ހަމައަށް ކިޔަވައިދޭ މާވަށު ސްކޫލުގައި 400 އަށް ވުރެ ގިނަ ދަރިވަރުން ކިޔަވަ އެވެ.

މާވަށު ކައުންސިލް މެމްބަރު ސަލްމާން އަބްދުލް ރަހީމް "މިހާރު" އަށް ވިދާޅުވީ އެ ރަށު ސްކޫލުގެ ހުރިހާ ކްލާސްރޫމެއް އޭސީ ކޮށްދިނުމަކީ ކައުންސިލުން ކުރަން ކަނޑައަޅާފައިވާ މަސައްކަތްތަކުގެ ތެރޭގައި ހިމަނާފައިވާ ކަމެއް ކަމަށެވެ.

"ދަރިވަރުން ވަރަށް ހޫނުގައި މި ތިބެނީ ސްކޫލުގައި. އެކަމަށް ހައްލެއް ހޯދައިދިނުމަށް، ކައުންސިލަށް ރައްޔިތުން ބޭނުންވާ ކަމަކަށް ކޮށްދެވޭނެ ކަމަކަށް ފެނުނީ ހުރިހާ ކްލާހެއް އޭސީ ކޮށްދިނުން ކަހަލަ ކަމެއް ކުރުން ކަމަށް ވިސްނާފައި ނިންމީ އޭސީ ކުރަން،" ސަލްމާން ވިދާޅުވި އެވެ.

"ކައުންސިލްގެ ބަޖެޓުގެ ގޮތުގައި އެހާ ފުދިގެން އުޅެވޭނެ ބަޖެޓެއް ނޫން ލިބިފައި އޮންނަނީ. އެހެންވެ އަޅުގަނޑުމެން އެ ހަރަދު ކުރަން ނުޖެހި ސަރުކާރުން ކޮށްދީފިއްޔާ އިޖުތިމާއީ އެހެން މަސައްކަތަކަށް އެ ފައިސާ ހަރަދު ކުރާ ގޮތަށް އޭރު ނިންމާފައި އޮތީ."

މާވަށު ސްކޫލްތައް އޭސީކުރަން ކައުންސިލުން ނންމިއިރު، ސަރުކާރުން ހުރިހާ ސްކޫލެއް އޭސީ ކުރަން "ކޫލް ސްކޫލް" ޕްރޮޖެކްޓް ވަނީ ފަށައިފަ އެވެ.

ސަލްމާން ވިދާޅުވި ގޮތުގައި ކައުންސިލުން ހުރިހާ ކްލާސްރޫމެއް އޭސީކުރަން ނިންމީ، އެ ޕްރޮޖެކްޓްގެ ދަށުން އަވަސް މުސްތަގުބަލެއްގައި އެ ސްކޫލުގައި އޭސީ ހަރުކުރެވޭނެ ކަމުގެ ޔަގީންކަން ނެތުމުންނެވެ.

12 ކްލާސްރޫމް އޭސީ ކުރުމުގެ ބަޖެޓަކީ 300،000ރ.

ސަލްމާން ވިދާޅުވީ އެ ރަށު ސްކޫލުގެ ހުރިހާ ކްލާސްރޫމެއް އޭސީކުރަން ވާން ޖެހޭ ތައްޔާރީތައް މިހާރު އަންނަނީ ވަމުން ކަމަށެވެ. އެއްދަންފަޅިއަށް ކިޔަވައިދޭ ސްކޫލުގެ 12 ކްލާސްރޫމްގެ އިތުރުން އަލަށް އަޅާ ނުވަ ކްލާސްރޫމް ވެސް ކައުންސިލުން ވަނީ އޭސީ ކޮށްދޭން ނިންމައިފަ އެވެ.

ޖުމްލަ 35 އޭސީ ބޭނުންވާއިރު، ކޮންމެ ކުލާހެއްގައި 18 ބީޓޫޔޫގެ ދެ އޭސީ ހަރުކުރަން ޖެހެ އެވެ.

އޭސީ ހަރުކުރުމުގައި ކައުންސިލާއި ސްކޫލުގެ އިތުރުން އެ ރަށުގައި އިޖުތިމާއީ ގޮތުން ހަރަކާތްތެރިވާ ޖަމިއްޔާތަކާއި ފެނަކައިން މަސައްކަތް ކޮށްދޭ ގޮތަށް ނިންމާފައިވާ ކަމަށް ވެސް އޭނާ ވިދާޅުވި އެވެ.

ސްކޫލް އޭސީކުރުމުގެ ބަޖެޓުގެ ގޮތުގައި ކައުންސިލުން ފުރަތަމަ ކަނޑައެޅީ 200،000 ރުފިޔާ އެވެ. އެކަމަކު މުޅި ޕްރޮޖެކްޓް ނުނިމޭނެތީ، ދެން ހިނގާ ހަރަދުތައް ވެސް ދޭން ކައުންސިލުން އޮތީ ފާސްކޮށްފަ އެވެ.

"އެގޮތަށް ބަލާއިރު 3 ލައްކައަށް ވުރެ ގިނައިން ހަރަދުވޭ. ކައުންސިލުން މިހާރު ފާސްކޮށްފައި ވަނީ 2 ލައްކަ ރުފިޔާ ކައުންސިލްގެ ބަޖެޓުން. އަދި އިތުރަށް ވެސް އެ ދާ ހުރިހާ ހަރަދެއް ކައުންސިލުން ކުރާ ގޮތަށް، އެއީ ކައުންސިލްގެ ބަޖެޓުން 3 ލައްކަ ރުފިޔާ އެކަމަށް ބަޖެޓް ފާސް ކޮށްފައި މިހާރު ވަނީ،" ސަލްމާން ވިދާޅުވި އެވެ.

އޭސީ ޕްރޮޖެކްޓް ކުރިއަށް ގެންދަން އެޑިޔުކޭޝަން މިނިސްޓްރީގެ ހުއްދަ ލިބިފައިވާކަން ފާހަގަ ކުރައްވައި ސަލްމާން ވިދާޅުވީ ބީލަން އުސޫލުން އޭސީ ހޯދުމުގެ މަސައްކަތް މިހާރު ކުރިއަށްދާ ކަމަށެވެ. މި އަހަރު ނިމުމުގެ ކުރިން ހުރިހާ ކްލާސްރޫމެއް އޭސީކޮށް ނިންމާލެވޭނެ ކަމަށް އޭނާ ވިދާޅުވި އެވެ.