ފަސޭހައިން އަލިފާން ރޯވާ ގޮތަށް ހުރި 399 އިމާރާތް ބަލައި ފާސްކޮށްފި

ފަސޭހައިން އަލިފާން ރޯވާ ގޮތަށް މާލެ ސަރަހައްދުގައި ހުރި ގިނަ އަދަދެއްގެ އިމާރާތްތައް އެމްއެންޑީއެފް ފަޔާ އެންޑް ރެސްކިއު އިން ބަލައި ފާސްކޮށްފި އެވެ.

ކެމިކަލާ ބެހޭ ގަވާއިދުގައި ބަޔާންކޮށްފައިވާ މިންގަނޑަށް ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހުރިތޯ ބެލުމާއި އެ މިންގަނޑަށް ހޭލުންތެރިކުރަން "އޮޕަރޭޝަން ހިރާސް ފާސް" ނަމުގައި އޮޕަރޭޝަނެއް މި މަހު އެކަކުން އިއްޔެގެ ނިޔަލަށް ވަނީ ކުރިއަށް ގެންގޮސްފަ އެވެ.

އެ އޮޕަރޭޝަނާ ގުޅޭގޮތުން އެމްއެންޑީއެފްގެ ފަޔާ އެންޑް ރެސްކިއު ޑިޕާޓްމެންޓުގެ އޮފިޝަލަކު ވިދާޅުވީ މާލެ ސަރަހައްދުގައި ފަސޭހައިން ރޯވާ ގޮތަށް ހުރި 399 އިމާރާތް ބަލައި ފާސްކޮށްފައިވާ ކަމަށެވެ.

"ފަސޭހައިން އަލިފާން ރޯވާ ގޮތަށް ހުރި ތަންތަން ކަމަށް އަޅުގަނޑުމެން މި ބަލަނީ މިސާލަކަށް ދަގަނޑުން ނުވަތަ ޓިނުން ނުވަތަ ލަކުޑިން ހަދާފައި ހުންނަ އިމާރާތްތައް. އެ ތަންތަނަކީ އަޅުގަނޑުމެންނަށް މައުލޫމާތު ލިބުނު ތަންތަން،" އޭނާ ވިދާޅުވި އެވެ.

އެ އޮޕަރޭޝަން ސިލްސިލާ ގޮތެއްގައި ކުރިއަށް ގެންދިއުމަށް ރާވާފައިވާކަން ފާހަގަ ކުރައްވާ އެ އޮފިޝަލު ވިދާޅުވީ އެމްއެންޑީއެފްގެ އަމާޒަކީ އަލިފާނުގެ ހާދިސާއެއް ހިނގަން މެދުވެރިނުވާ ވަރަށް ބަލާ ފާސްކުރުން ކަމަށެވެ.

ފަސޭހައިން އަލިފާން ރޯވާ ގޮތަށް މާލެ ސަރަހައްދުގައި ހުރި އިމާރާތްތައް އާންމު ގޮތެއްގައި ދިރިއުޅެން ބޭނުން ކުރަނީ ބިދޭސީންނެވެ.

އެންމެ ފަހުން އަލިފާނުގެ ހާދިސާ ހިނގީ ހ. ދޫހިމިރިގޭގައި ހުންނަ ގާމަގު ކެފޭގަ އެވެ. އެ އިމާރާތުގައި ތިން ފްލޯ ހުންނައިރު އިމާާރާތުގެ މަތީ ދެ ފްލޯ ހަދާފައި ހުރީ ޑެކު އަޅައި ވަށައިގެން ޓިނު ޖަހައިގެންނެވެ. ރޯވި އަލިފާންގަނޑުގައި އެތަން ވަނީ ބޭނުން ނުކުރެވޭ ވަރަށް އަނދައިފަ އެވެ. އެތަނަކީ 57 ބިދޭސީންގެ އެކޮމޮޑޭޝަން ބްލޮކެއްގެ ގޮތުގައި ބޭނުންކުރަމުންދިޔަ ތަނެކެވެ.

ނޮވެމްބަރު 13، 2022 ގައި މ. ނިރުފެހިގޭގައި ހިނގި އަލިފާނުގެ ހާދިސާ އަކީ ރާއްޖޭގައި މިހާތަނަށް ހިނގައިދިޔަ އެންމެ ބޮޑު އަލިފާނުގެ ހާދިސާ އެވެ. އެއީ އެންމެ ގިނަ މީހުން މަރުވި އަލިފާނުގެ ހާދިސާ ވެސް އެވެ. ޖުމްލަ 10 ބިދޭސީން މަރުވި އެ ހާދިސާގައި އެ މީހުން ވެސް ދިރިއުޅެމުން ދިޔައީ އެންމެ ތިރީގައި ގަރާޖެއް ހިންގަމުން އައި އިމާރަތެއްގެ ދެވަނަ ބުރި އާއި ތިން ވަނަ ބުރީގަ އެވެ.

އެ ތަން ވެސް އެއްކޮށް ހަދާފައި ހުރީ ޓިނާއި ލަކުޑި ބޭނުން ކޮށްގެންނެވެ.