ކާވާ ޗެލެންޖް ކަޕްގައި ފިރިހެން ވޮލީ ޓީމަށް ނާކާމިޔާބު ފެށުމެއް

އުޒްބަކިސްތާނުގައި އިއްޔެ ފެށި ކާވާ ފިރިހެނުންގެ ޗެލެންޖް ކަޕްގައި ރާއްޖޭގެ ގައުމީ ވޮލީބޯޅަ ޓީމު ކުޅުނު ފުރަތަމަ މެޗުގައި ކިރިގިސްތާން އަތުން ބަލިވެއްޖެ އެވެ.

މުބާރާތުގެ ފުރަތަމަ މެޗު ސީދާ ތިން ސެޓުން ކިރިގިސްތާން ކާމިޔާބުކުރީ 25-15، 25-13 އަދި 25-16 އިން ސެޓްތައް ގެންގޮސްގެންނެވެ.

ހަ ޓީމާ އެކު ކުރިއަށް ގެންދާ މި މުބާރާތުގައި ރާއްޖެ އާއި ކިރިގިސްތާން އަދި އުޒްބަކިސްތާންގެ އިތުރުން ދެން ވާދަކުރަނީ ތަޖިކިސްތާނާއި ތުރުކުމެނިސްތާން އަދި އަފްޣާނިސްތާނެވެ.

ރައުންޑް ރޮބިން އުސޫލުން އަންނަ ބުދަ ދުވަހާ ހަމައަށް މެޗުތައް ކުޅުމަށް ފަހު، ރޭންކިން މެޗުތައް ކުޅޭނީ ޖެހިގެން އަންނަ ބުރާސްފަތި ދުވަހު އެވެ. އެއްވަނަ އަދި ދެވަނަ ޓީމު ފައިނަލް މެޗު ކުޅޭގޮތަށް ހަމަޖެހިފައި ވާއިރު، ތިންވަނަ ހޮވާ މެޗުގައި ނުކުންނާނީ ތިންވަނަ އަދި ހަތަރުވަނައިގައި ނިންމާ ޓީމެވެ.

އިއްޔެ ކުޅުނު އިތުރު މެޗުތަކަށް ބަލައިލާއިރު އުޒްބަކިސްތާނުން ވަނީ 25-14، 25-13 އަދި 25-12 އިން ސެޓްތައް ގެންގޮސްގެން ތަޖިކިސްތާން ބަލިކޮށްފަ އެވެ.

ތުރުކުމެނިސްތާނުން ވެސް ވަނީ ސީދާ ތިން ސެޓުން މޮޅުވެފަ އެވެ. އަފްޣާނިސްތާނާ ދެކޮޅަށް ކުޅުނު މެޗުގެ ސެޓްތައް ތުރުކުމެނިސްތާން ގެންދިޔައީ 25-17، 25-16 އަދި 25-23 އިންނެވެ.

މުބާރާތުގައި ރާއްޖެ ކުޅޭ ދެވަނަ މެޗުގައި މިއަދު ނުކުންނާނީ ތުރުކުމެނިސްތާނާ ދެކޮޅަށެވެ. މާދަމާ އަފްޣާނިސްތާނާ ދެކޮޅަށް ކުޅުމަށް ފަހު. ހަތަރުވަނަ މެޗުގައި އުޒްބަކިސްތާނާ ދެކޮޅަށް ނުކުންނާނީ އަންގާރަ ދުވަހު އެވެ. ބުދަ ދުވަހު ކުޅޭނީ ތަޖިކިސްތާނާ ދެކޮޅަށެވެ.