ވޮލީ ޓީމު ރޭންކިން މެޗުގައި ވެސް ތަޖިކިސްތާން ބަލިކޮށްފި

ކާވާ ވޮލީބޯލް ޗެލެންޖް ކަޕްގައި ރާއްޖޭގެ ވޮލީބޯޅަ ޓީމުން ރޭންކިން މެޗުގައި ވެސް ތަޖިކިސްތާނުގެ މައްޗަށް ކުރި ހޯދައިފި އެވެ.

ރޭންކިން މެޗުގައި ރާއްޖޭން އިއްޔެ ތަޖިކިސްތާން ބަލިކުރީ 3-1 ސެޓުންނެވެ. ރާއްޖޭން 25-17، 25-16 އިން ފުރަތަމަ ދެ ސެޓު ގެންގޮސްފައި ވަނިކޮށް ތަޖިކިސްތާނުން ވަނީ 25-23 އިން ތިންވަނަ ސެޓް ގެންގޮސްފަ އެވެ. ނަމަވެސް 25-22 އިން ހަތަރު ވަނަ ސެޓް ގެންގޮސް، ރާއްޖޭން ވަނީ ފަސް ވަނަ ހޯދައިފަ އެވެ.

ފުރަތަމަ ދެ ސެޓު ރާއްޖޭން ފަސޭހަ ކަމާއެކު ހޯދި ނަމަވެސް ތަޖިކިސްތާނު ވަނީ ވާދަވެރި ކުޅުމަކަށް ފަހު ތިންވަނަ ސެޓު ކާމިޔާބުކޮށްފަ އެވެ.

ރާއްޖެ މެޗުން މޮޅުވީ ހަމަ އެ ވާދަވެރިކަމުގައި ކުޅެ ހަތަރުވަނަ ސެޓް ކާމިޔާބު ކޮށްގެންނެވެ. އިސްމާއިލް ސާޖިދު (ކުޑަކާއްޓޭ) އާއި ހުސެއިން ޝަމާއިލް އަދި މިޑްލް ބްލޮކަރު ފައިރޫޒް އާދަމް ވަނީ މެޗުގައި މޮޅު ކުޅުމެއް ދައްކައިފަ އެވެ.

ރާއްޖޭގެ ޓީމަށް ގިނަ ޕޮއިންޓްތަކެއް ހޯދައިދިން ކެޕްޓަން ސާޖިދަށް ވަނީ އިވެންޓްސް ބެސްޓް ސްކޯރާ އެވޯޑް ލިބިފަ އެވެ. އޭނާ ވަނީ އިއްޔެގެ މެޗުގައި ރާއްޖެއަށް 20 ޕޮއިންޓް ހޯދައިދީފަ އެވެ.

ހަ ޓީމު ވާދަކުރި މުބާރާތުގައި ރާއްޖޭން ވަނީ ރައުންޑް ރޮބިން ބުރުގެ ފަހު މެޗުގައި ވެސް 3-1 ސެޓުން ތަޖިކިސްތާން ބަލިކޮށްފަ އެވެ. އެ މެޗުގެ ސެޓްތައް ގެންދިޔައީ 25-20، 20-25، 25-23 އަދި 25-22 އިންނެވެ.

މުބާރާތުގެ ފުރަތަމަ މެޗުގައި ކިރިގިސްތާނާ ވާދަކޮށް ރާއްޖެ ސީދާ ތިން ސެޓުން ބަލިވި ނަމަވެސް ތުރުކުމެނިސްތާނާ ވާދަކޮށް ބަލިވީ 3-2 ސެޓުންނެވެ. އަފްޣާނިސްތާނާއި އުޒްބަކިސްތާން އަތުން ވެސް ބަލިވީ ސީދާ ތިން ސެޓުންނެވެ.

ތުރުކުމެނިސްތާނުން ވަނީ އިއްޔެ ކުޅުނު ބްރޯންޒް މެޑަލް މެޗުގައި ސީދާ ތިން ސެޓުން އަފްޣާނިސްތާން ބަލިކޮށްފަ އެވެ. އެޓީމުން ސެޓްތައް ގެންދިޔައީ 25-23، 25-21 އަދި 25-20 އިންނެވެ.

ފައިނަލް މެޗުގައި ސީދާ ތިން ސެޓުން އުޒްބަކިސްތާޏް ބަލިކޮށް ޗެމްޕިއަންކަން ހޯދީ ކިރިގިސްތާނެވެ. ކިރިގިސްތާނުން ފައިނަލްގެ ސެޓްތައް ގެންދިޔައީ 28-26، 25-19 އަދި 25-20 އިންނެވެ.