ދުނިޔޭގެ ކޮލެރާ ވެކްސިން ސްޓޮކް ހުސްވެއްޖެ

އަނގައިން ދޭ ކޮލެރާ ވެކްސިން ދުނިޔޭގެ ސްޓޮކްޕައިލްގައި ހުސްވެފައިވާ ކަމަށް ވޯލްޑް ހެލްތު އޯގަނައިޒޭޝަން (ޑަބްލިޔުއެޗްއޯ) އިން ހުކުރު ދުވަހު ބުނެފި އެވެ.

އެ ޖަމިއްޔާއިން ބުނީ މިއީ މި ބަލި ފެތުރުން ހުއްޓުވުމުގެ މަސައްކަތަށް މި ކަމުގެ ސަބަބުން ދަތިކަމާ ކުރިމަތިވެފައިވާ ކަމަށެވެ.

ވެކްސިން އުފެއްދުން ފުލް ކެޕޭސިޓީގައި ހިނގަމުންދިޔަ ނަމަވެސް، ސަޕްލައިއަށްވުރެ ޑިމާންޑް މަތިވެފައިވާ ކަމަށް އދ.ގެ ސިއްހީ އޭޖެންސީގެ މަހު ރިޕޯޓްގައި ބުނެފައިވެ އެވެ.

"އޮކްޓޯބަރ 14 ގެ ނިޔަލަށް، އަނގައިން ދޭ ކޮލެރާ ވެކްސިންގެ ދުނިޔޭގެ ސްޓޮކްޕައިލް ވަނީ ހުސްވެފަ އެވެ. މި ވަގުތު އެންމެ ޑޯޒެއް ވެސް ލިބޭކަށް ނެތެވެ." ޑަބްލިއުއެޗްއޯ އިން ބުނެފައިވެ އެވެ.

"އަންނަ ހަފްތާތަކުގައި އިތުރު ޑޯޒްތަކެއް ލިބޭނެކަމަށް އުއްމީދު ކުރެވުނަސް، ބަލި ފެތުރުން ހުއްޓުވުމުގެ މަސައްކަތަށް މި ދަތިކަމުގެ ސަބަބުން ބޮޑެތި ގޮންޖެހުންތަކެއް ކުރިމަތިވެ، ބަލި ފެތުރުން ކޮންޓްރޯލް ކުރުމުގެ މަސައްކަތަށް ހުރަސްއެޅެ އެވެ." ސެޕްޓެމްބަރު 1 އިން އޮކްޓޯބަރު 14 އާ ދެމެދު، ބަންގްލަދޭޝް، ސޫދާން، ނައިޖަ، އިތިއޯޕިއާ އަދި މިޔަންމާ އިން ވެކްސިނަށް އެދި ހުށަހެޅި ކަމަށް ޑަބްލިއުއެޗްއޯ އިން ބުންޏެވެ.

މި ގައުމުތަކުން 8.4 މިލިއަން ޑޯޒަށް އެދިފައި ވިޔަސް، ލިބެންހުރި އަދަދު މަދުކަމުން ފޮނުވޭނީ 7.6 މިލިއަން ޑޯޒް ކަމަށް ބުންޏެވެ.

މަރުވާ މީހުންގެ އަދަދު މައްޗަށް

މި އަހަރުގެ ސެޕްޓެމްބަރު 29 ގެ ނިޔަލަށް 439,724 ކޮލެރާ ކޭސް އަދި 3,432 މަރު ރިޕޯޓްކޮށްފައިވާ ކަމަށް ޑަބްލިއުއެޗްއޯ އިން ބުންޏެވެ.

"2024 ގައި ކޭސްތަކުގެ އަދަދު ވަނީ ފާއިތުވި އަހަރަށްވުރެ 16 ޕަސެންޓް ދަށްވެފައި ނަމަވެސް، މަރުގެ އަދަދު 126 ޕަސެންޓް އިތުރުވެފައިވާކަމީ ވަރަށް ކަންބޮޑުވާންޖެހޭ ކަމެކެވެ."

މަރުވާ މީހުންގެ އަދަދު އިތުރުވަމުންދަނީ ހަމަނުޖެހުންތައް ހިނގާ ސަރަހައްދުތަކުގައި ސިއްހީ ޚިދުމަތް ލިބުން އުނދަގޫވެފައިވުމާއި، ފެންބޮޑުވުމުގެ ސަބަބުން ގެއްލުންވެފައިވާ ސަރަހައްދުތަކުގައި ކަމަށް ވެދާނެ ކަމަށް ޑަބްލިއުއެޗްއޯ އިން ބުނެ އެވެ.

ފާއިތުވި މަހުގެ ރިޕޯޓަށް ފަހު، ނައިޖާ (705 ކޭސް އަދި 17 މަރު) އަދި ތައިލެންޑް (5 ކޭސް، މަރެއް ނެތް) ގައި ކޮލެރާ އަލުން ފެތުރެން ފެށިކަން ރިޕޯޓްކޮށްފައިވާ ކަމަށާއި، 2024 ގައި މި ބައްޔަށް ހުށަހެޅިފައިވާ ގައުމުތަކުގެ އަދަދު 30 އަށް އަރާފައިވާ ކަމަށް ޑަބްލިއުއެޗްއޯ އިން ބުންޏެވެ.

ސެޕްޓެމްބަރު މަހު އަލަށް 14 ގައުމަކުން ކޮލެރާގެ 47,234 ކޭސް ރިޕޯޓްކޮށްފައިވެ އެވެ. އަދި މި މަހު، ހަނގުރާމައިގެ ތެރޭގައިވާ ލުބްނާނުން ކޮލެރާގެ ކޭސްއެއް ފެނިފައި ވުމާއި، ގިނަ އަދަދެއްގެ ބަޔަކު ހިޖުރަކޮށްފައިވުމާއި ސާފުތާހިރުކަމުގެ ހާލަތު ދަށްވެފައިވުމުގެ ސަބަބުން ބަލި ފެތުރުމުގެ ފުރުސަތު "ވަރަށް މަތި" ކަމަށް ޑަބްލިއުއެޗްއޯ އިން އިންޒާރުދީފައިވެ އެވެ.

ކޮލެރާއަކީ ވިބްރިއޯ ކޮލެރޭ ބެކްޓީރިއާގެ ސަބަބުން، ކާނާގެ ޒަރިއޔާއިން އަދި ގިނަފަހަރަށް ތަޣައްޔަރުވެފައިވާ ފެނުން ފެތުރޭ، ގޮހޮރުގެ އިންފެކްޝަނެކެވެ. މިއީ ފަރުވާ ނުކޮށްފި ނަމަ ގަޑިއިރުތަކެއްގެ ތެރޭގައި މަރުވެދާނެ ބައްޔެއް ނަމަވެސް، އާދައިގެ އޯރަލް ރީހައިޑްރޭޝަނުން އަދި ގަދަ ހާލަތްތަކުގައި އެންޓިބަޔޮޓިކްސްއިން ފަރުވާކުރެވިދާނެ އެވެ.

އޭޕްރީލް މަހު، ގަވީ ވެކްސިން އެލަޔަންސް އަދި އދ. ގެ ކުޑަކުދިންގެ އޭޖެންސީ ޔުނިސެފުން ބުނެފައިވަނީ ދުނިޔޭގެ ސްޓޮކްޕައިލަށް، އަނގައިން ދޭ ކޮލެރާ ވެކްސިން މިހާރު ސަޕްލައިކުރަނީ ހަމައެކަނި ދެކުނު ކޮރެއާގެ ޔޫބައިއޮލޮޖިކްސް ކުންފުނިން ކަމަށާއި، އަންނަ އަހަރުތަކުގައި އެހެން މެނުފެކްޗަރުންގެ އުފެއްދުންތައް ވެސް ލިބޭނެ ކަމަށް އުއްމީދުކުރެވޭ ކަމަށެވެ.