އިޒްރޭލްގެ ޕާސްޕޯޓާ ގުޅޭ ކުއްލި މައްސަލަ ބޭރުކޮށްލުމުން އެމްޑީޕީގެ ކަންބޮޑުވުން!

އިޒްރޭލުގެ ޕާސްޕޯޓު އޮންނަ މީހުން ރާއްޖެ އެތެރެވުން މަނާކުރާ ބިލާ މެދު ގޮތެއް ނިންމުން ލަސްވާ މައްސަލާގައި އެމްޑީޕީން މިއަދު ހުށަހެޅި ކުއްލި މައްސަލަ މަޖިލީހުން ބަލައިނުގަތުމުން އެ ޕާޓީން ކަންބޮޑުވުން ފާޅުކޮށްފި އެވެ.

އިޒްރޭލުގެ ޕާސްޕޯޓު އޮންނަ މީހުން ރާއްޖެ އަށް އެތެރެވުން މަނާކުރުމަށް އިމިގްރޭޝަން ގާނޫނު ބަދަލުކުރަން ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ. މިދިޔަ މޭ މަހުގެ 29 ވަނަ ދުވަހު ހުށަހެޅި ބިލް ބަލައިގަނެ ކޮމިޓީ އަށް ފޮނުވި ފަހުން، އެ ބިލް އަދިވެސް އޮތީ ކޮމިޓީ މަރުހަލާގައި ޕާކުވެފަ އެވެ.

މި މައްސަލަ ލަސްވާތީ އެމްޑީޕީން މަޖިލީހަށް ހުށަހެޅި ކުއްލި މައްސަލަ ބަލައިނުގަތީ މަޖިލީހުގައި އޮތް މައްސަލައަކަށް ވާތީ އެވެ.

އެކަމާ ކަންބޮޑުވުން ފާޅުކޮށް، އެ ޕާޓީން މިއަދު ބޭއްވި ނޫސްވެރިންގެ ބައްދަލުވުމެއްގައި ޕީޖީ ލީޑަރު އިބްރާހިމް ނާޒިލް ވިދާޅުވީ، ބިލް އަވަސް ކުރަން މަޖިލީހަށް ގޮވާލާ ކުއްލި މައްސަލަ ހުށަނޭޅޭނެ ކަމަށް މަޖިލީހުގެ އިދާރާ އިން އެންގުމުން އެކަމާ އެމްޑީޕީގެ ކަންބޮޑުވުން އެބައޮތް ކަމަށެވެ.

ނާޒިލް ވިދާޅުވީ، އިޒްރޭލް ޕާސްޕޯޓު މަނާ ނުކުރެވި އޮތީ މަޖިލިސް މެންބަރުންގެ ސަބަބުން ކަމަށް ދޭހަވާ ގޮތަށް އެޓާނީ ޖެނެރަލް ހުރިހާ މެންބަރުންނަށް ނިސްބަތްވާ ގޮތަށް ތުހުމަތު ކުރައްވާފައިވާ ކަމަށާއި އެއީ ކަންބޮޑުވާ ކަމެއް ކަމަށެވެ.

މި ބިލު ކުރިއަށް ގެންދިއުމަށް މަޖިލިސް ތެރެއިން އެމްޑީޕީއަށް ކުރެވެން ހުރި ކަންކަން ބަލައި އެކަން ކުރާނެ ކަމަށް ނާޒިލް ވިދާޅުވި އެވެ.

ބިލް ހުށަހެޅުއްވި މެންބަރު މީކާއިލް ވިދާޅުވީ މި ބިލް އަވަސް ކުރުމަށް ޕީއެންސީން މި ފަހުން މަޖިލީހަށް އިލްތިމާސްކުރުމަކީ ރައްޔިތުންނަށް ކުރި މަލާމާތެއް ކަމަށެވެ.

އެ ޕާޓީގެ ރައީސަކީ ރައީސް ޑރ. މުހައްމަދު މުއިއްޒު ކަމަށާއި އެ ޕާޓީގެ ޗެއާޕާސަނަކީ މަޖިލީހުގެ ރައީސް އަބްދުއްރަހީމް އަބްދުﷲ ކަމަށާއި 241 ކޮމިޓީގެ މުގައްރިރަކީ ޕީއެންސީގެ ބޭފުޅަކަށް ވެފައި އެ ކޮމިޓީގެ މެޖޯރިޓީ ވެސް އޮތީ އެ ޕާޓީއަށް ކަމަށް މީކާއިލް ވިދާޅުވި އެވެ.

"ރައްޔިތުންނަށް ހަޖޫ ޖެއްސެވުން ހުއްޓަވައި، ވީހާ ވެސް އަވަހަކަށް މި މައްސަލަ ނިންމަވައިދެއްވުމަކީ އަޅުގަނޑުމެން އެމްޑީޕީން އެދޭ ކަމެއް،" މީކާއިލް ވިދާޅުވި އެވެ.

އިމިގްރޭޝަން ގާނޫނަށް ހުށަހެޅި އިސްލާހުގެ މަސައްކަތް ހުއްޓިފައިވަނިކޮށް، މީގެ ކުރިން އެޓާނީ ޖެނެރަލް އުޝާމް ވިދާޅުވެފައި ވަނީ މީކާއިލް ހުށަހެޅުއްވި ބިލް އޮތް ގޮތަށް ފާސްކޮށްފި ނަމަ ރާއްޖެ އަށް އުނދަގޫތަކެއް ކުރިމަތިވާނެ ކަމަށެވެ.

އެ ބިލްގައި މިހާރު އޮތީ އިޒްރޭލް ޕާސްޕޯޓު ގެންގުޅޭ މީހުންނާއި އިޒްރޭލް ޕާސްޕޯޓު އޮންނަ އެހެން ގައުމެއްގެ މީހުންނަށް ވެސް ރާއްޖެ އައުން މަނާވާ ގޮތަށެވެ.

ނަމަވެސް އިޒްރޭލް ޕާސްޕޯޓު އޮންނަ އެންމެންނަށް ރާއްޖެ އަށް ނުވަދެވޭ ގޮތަށް އޮތް އޮތުން ބަދަލު ކުރަން ޖެހޭ ކަމަށް އުޝާމް ވިދާޅުވެފައިވެ އެވެ. އޭގެ އެއް ސަބަބަކީ އޭނާ ވިދާޅުވި ގޮތުގައި އިޒްރޭލް ޕާސްޕޯޓުގައި ވަރަށް ގިނަ ފަލަސްތީން ރައްޔިތުން ވެސް ގައުމުތަކަށް ދަތުރު ކުރުމެވެ.