ޔުނިވާސަލްގެ ހަރަދުގައި ސްޕެޝަލައިޒް ވުމުގެ ފުރުސަތު ތިން ޑޮކްޓަރަކަށް

ރާއްޖޭގައި ޓޫރިޒަމް ވިޔަފާރީގައި އެންމެ މުއްސަނދި އެއް ކުންފުނި ޔުނިވާސަލްގެ ހަރަދުގައި ސްޕެޝަލައިޒް ވުމުގެ ފުރުސަތު މި އަހަރު ތިން ޑޮކްޓަރަކަށް ދޭން ނިންމައި އެ މީހުންނާ މިއަދު ސްކޮލަޝިޕް ހަވާލުކޮށްފި އެވެ.

ސްޕެޝަލައިޒް ވުމުގެ ފުރުސަތު ޔުނިވާސަލް ކުންފުނީގެ ދަށުން ހިންގާ ޔުނިވާސަލް ފައުންޑޭޝަނުން މި އަހަރު ދިނުމަށް ކަނޑައެޅި ޑޮކްޓަރުންނާ ސްކޮލާޝިޕްތައް ހަވާލުކުރީ އެކަމަށްޓަކައި ބޭއްވި ހާއްސަ ރަސްމިއްޔާތެއްގަ އެވެ. ހުރިހާ ހަރަދެއް ޔުނިވާސަލް އިން ކުރާ އެ ސްކޮލާޝިޕްތަކަށް މި ފަހަރު ފުރުސަތު ދީފައި ވަނީ:

1. ޑރ، ފާތިމަތު މިޝްފާ ވަސީމް: މާސްޓާ އޮފް އޯޓޯރައިނޯލަރީންގޮލޮޖީ (ކަރުންމަތީގެ ބަލިތަކަށް ހާއްސަ)

2. ޑރ. ނުހާ އަބްދުއްރަހުމާން: މާސްޓާ އޮފް ޕީޑިއޭޓްރިކްސް (ކުޑަކުދިންގެ ބަލިތަކަށް ހާއްސަ)

3. ޑރ. އައިމިނަތު ނަޖުދާ: މާސްޓާ އޮފް ސާޖަރީ (އޮޕަރޭޝަންތަކަށް ހާއްސަ)

އެ ތިން ސްކޮލާޝިޕް ވެސް ދީފައި ވަނީ މެލޭޝިއާގައި ކިޔެވުމަށެވެ.

ޔުނިވާސަލް ފައުންޑޭޝަނުން އަލްމަރުހޫމް ޑރ. އިބްރާހީމް އުމަރު މަނިކުގެ ހަނދާނުގައި، މިދިޔަ އަހަރު ވަނީ ސްކޮލާޝިޕް ސްކީމެއް ތައާރަފުކޮށްފަ އެވެ. އެއީ ވެސް ރާއްޖެ އިން ބޭރުގައި ސިއްހީ ދާއިރާ އިން މަތީ ތައުލީމް ހާސިލް ކުރުމަށް އެދޭ ދިވެހި ދަރިވަރުންނަށްދޭ ފުތުސަތުތަކެކެވެ.

ސްޕެޝަލައިޒް ވުމުގެ ފުރުސަތު މިއަދު ދިން ތިން ޑޮކްޓަރުން މެލޭޝިއާގައި ކިޔަވާނީ ސީދާ ޔުނިވާސަލް ފައުންޑޭޝަން ނުވަތަ ޔުނިވާސަލް ކުންފުނީގެ ހަރަދުގަ އެވެ. އެއީ އަލްމަރުހޫމް ޑރ. އިބްރާހީމް އުމަރު މަނިކުގެ ހަނދާނުގައި، މިދިޔަ އަހަރު ތައާރަފުކުރި ސްކޮލާޝިޕް ސްކީމްގެ ބޭރުން ހިންގާ ޕްރޮގްރާމެކެވެ.

ޔުނިވާސަލް އެންޓަޕްރައިޒަސްގެ ތާރީހުގައި މިދިޔަ 41 އަހަރުގެ ތެރޭގައި ދިވެހިންގެ ލާބަ އާއި މަންފާ އަށް ކޮށްފައިވާ ގިނަ މަސައްކަތްތައް މިހާރު ރަސްމީ ގޮތެއްގައި ކުރިއަށް ގެންދަނީ ޔުނިވާސަލް ފައުންޑޭޝަނުންނެވެ.

ޔުނިވާސަލް ފައުންޑޭޝަނުން ވަނީ 2014 ވަނަ އަހަރުން ފެށިގެން މިހާތަނަށް ދިވެހި ދަރިވަރުންނަށް 121 ސްކޮލާޝިޕް ދީފަ އެވެ. އޭގެ ތެރެއިން 15 ދަރިވަރަކު މިހާރު ވެސް އަންނަނީ ރާއްޖެ އިން ބޭރުގައި ތައުލީމު ހާސިލް ކުރަމުން ކަމަށް އެ ފައުންޑޭޝަނުން ބުންޏެވެ.

ސަރުކާރާއި އަމިއްލަ ޖަމިއްޔާ، ޖަމާއަތްތަކުން ރާއްޖޭގެ ތަރައްގީއަށާއި އިޖުތިމާއީ ކަންކަމަށާއި އެކިއެކި އެހީގެ ޕްރޮގްރާމް ރާވައި ހިންގުމުގައި ސީދާ ގޮތުންނާއި ނުސީދާގޮތުން ޔުނިވާސަލް ފައުންޑޭޝަންގެ އެހީތެރިކަން ފޯރުކޮށްދެ އެވެ.