އެއާކޯނާއި ރެފްރިޖަރޭޓަރު މަރާމާތުކުރާ މީހުން ތަމްރީނުކޮށް، ލައިސެންސް ދެނީ

ރާއްޖޭގެ އެއާ ކޮންޑިޝަނާއި ރެފްރިޖެރޭޝަން ދާއިރާގައި މަސައްކަތްކުރާ ޓެކްނީޝަނުން ތަމްރީނުކޮށް، އެ މީހުންނަށް ލައިސަންސް ދޫކުރުމަށް ސަރުކާރުން ޕޮލިޓެކްނިކާ އެކު އެމްއޯޔޫއެއްގައި އިއްޔެ ސޮއިކޮށްފި އެވެ.

މި އެމްއޯޔޫގައި ސޮއިކުރީ ތިމާވެއްޓާ ބެހޭ މިނިސްޓްރީގައި ބޭއްވި ހަފުލާއެއްގަ އެވެ. މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރު ތޯރިގް އިބްރާހިމެވެ. ޕޮލިޓެކްނިކްގެ ފަރާތުން ސޮއިކުރެއްވީ ސީއީއޯ ޒޫޝާން ކަމާލުއްދީނެވެ.

ތިމާވެއްޓާ ބެހޭ މިނިސްޓްރީން މިއަދު ނެރުނު ނޫސްބަޔަނެއްގައި ބުނީ ތިން އަހަރު ދުވަހަށް އެކުލަވައިލި މި އެއްބަސްވުމުގެ ދަށުން ރެފްރިޖަރޭޝަނާއި އެއާ ކޮންޑިޝަނިން ސާވިސިންގެ ދާއިރާގެ ތަމްރީން ޕްރޮގްރާމްތައް ހިންގުމާއި ތަމްރީނު ޕްރޮގްރާމްތައް ހިންގުމަށް ބޭނުންވާ ތަކެތި ހޯދުމާއި ރެފްރިޖަރެންޓް ރީސައިކަލް އަދި ރިކްލެމޭޝަން މަސައްކަތް ކުރިއަށް ގެންދާނެ ކަމަށެވެ.

އެ ދާއިރާގައި ވަޒީފާގެ ފުރުސަތުތައް އުފައްދާ އަދި މުސްތަގުބަލުގައި، އެ ދާއިރާގައި މަސައްކަތްކުރާ މީހުންނަކީ ހާއްސަ ލައިންސަސްއެއްގެ ދަށުން މަސައްކަތްކުރާ ބަޔަކަށް ހެދުމަށް މަސައްކަތްކުރާނެ ކަމަށް ވެސް އެ ބަޔާނުގައި ބުންޏެވެ.

މިނިސްޓްރީން ބުނީ އާ ޓެކްނޮލޮޖީތަކުގެ ތަމްރީން ފުރުސަތުތައް ޕޮލިޓެކްނިކްގެ ޓްރެއިނަރުނަށް ފޯރުކޮށްދިނުން ވެސް މި އެއްބަސްވުމުގެ ދަށުން ކުރިއަށް ގެންދާނެ ކަމަށެވެ.

"މި އެއްބަސްވުމުގެ އަމާޒަކީ ރާއްޖޭގައި ރެފްރިޖަރޭޝަން އަދި އެއާކޮންޑިޝަނިން ސާވިސިންގެ ދާއިރާގައި މަސައްކަތް ކުރާ މީހުން ބިނާކޮށް، ޓެކްނީޝަނުންގެ ގާބިލުކަން އިތުރުކޮށް، މި ދާއިރާ އިތުރަށް ހަރުދަނާކުރުމެވެ،" މިނިސްޓްރީގެ ބަޔާނުގައި ބުންޏެވެ.

މިނިސްޓްރީން ބުނިގޮތުގައި، ރާއްޖޭގައި ރެފްރިޖަރޭޝަން އެންޑް އެއާ ކޮންޑިޝަނިން ސާވިސް ކުރުމުގައި އެންމެ ގިނައިން ބޭނުންކުރާ އެއް މާއްދާއަކީ ހައިޑްރޯފްލޯރޯކާބަން (އެޗްއެފްސީ) އެވެ. ރާއްޖެއިން ސޮއިކޮށްފައިވާ އދ. ގެ މުއާހަދާއެއް ކަމަށްވާ "މޮންޓްރިއަލް ޕްރޮޓޮކޯލް އޮން ސަބްސްޓެންސަސް ދެޓް ޑިޕްލީޓް ދަ އޯޒޯން ލޭޔާ"ގެ ދަށުން ދުނިޔެ ހޫނުވުމަށް އަސަރު ކުރާ މިންވަރު ބޮޑު މި މާއްދާ މަދުކުރުމުގެ މަސައްކަތް ވަނީ ފަށައިފަ އެވެ.

ރާއްޖޭގައި އެޗްއެފްސީ ބޭނުންކުރާ އަދަދު 2045 ވަނަ އަހަރުގެ ނިޔަލަށް 80 ޕަސެންޓަށް މަދުކުރަން ސަރުކާރުން ވަނީ ނިންމައިފަ އެވެ.

އެޗްއެފްސީ ގޭހުގެ ބަދަލުގައި ބޭނުންކުރާ ބައެއް ގޭސްތަކަކީ އަލިފާން ރޯވާ ގޭސްތަކަށް ވާތީ، އެ މަސައްކަތްކުރާ ޓެކްނީޝަނުންނަށް ތަމްރީން ފޯރުކޮށްދިނުމަކީ މުހިންމު ކަމެއް ކަމަށް މިނިސްޓްރީން ބުންޏެވެ.