ސަފާރީތަކަށް ދޫކުރާ ބަނގުރާ ރަށްރަށަށް އެރުވުން ހުއްޓުވަން ފިޔަވަޅު އަޅަން ފަށައިފި

ހާއްސަ ހުއްދައިގެ ދަށުން ކަސްޓަމްސް އިން ސަފާރީތަކަށް ދޫކުރާ ބަނގުރާ ފުޅިތައް މީހުން ދިރިއުޅޭ ރަށްރަށަށް ބާލައި، ވިޔަފާރިކުރަމުންދާ މައްސަލަ ހުއްޓުވަން ކަމާ ބެހޭ އިދާރާތައް ގުޅިގެން މަސައްކަތް ފަށައިފި އެވެ.

އެ މިނިސްޓްރީން ބޭއްވި ނިއުސް ކޮންފަރެންސްގައި، ކޮމިޝަނާ ޖެނެރަލް އޮފް ކަސްޓަމްސް، ފާތިމަތު ދިޔާނާ ވިދާޅުވީ ބަނގުރާ ދޫކުރާ ސަފާރީތަކުން އަމަލުކުރަނީ ގަވައިދާ އެއްގޮތަށްތޯ ބަލަމުން އަންނަ ކަމަށެވެ. ކަސްޓްމަސް އިން އަންނަނީ ސަފާރީތަކަށް އަރައި ބަލައި ފާސްކުރަމުންނެވެ.

އޭގެ ތެރެއިން، ގަވާއިދާ ހިލާފުވެގެން ހަ ސަފާރީއެއް ޖޫރިމަނާކޮށް، މައްސަލަ ތަހުގީގުކުރަމުން އަންނަ ކަމަށް ދިޔާނާ ވިދާޅުވި އެވެ.

އެ ތަންތަން ޖޫރިމަނާކުރީ، ސަފާރީ އޮންނަން ޖެހޭ ތަން ނޫން އެހެން ތަނެއްގައި އޮތުމާއި ކަސްޓަމްސް އިން ދޫކުރާ ޓްރެކިން ޑިވައިސް ނިއްވާލާފައި ހުރުމާއި ގަވާއިދާ ހިލާފަށް އެ ސަފާރީތަކަށް މީހުން އަރާފައިވާތީ އެވެ.

ސަފާރީތަކުގައި ހިންގާ އޮޕަރޭޝަނުގެ ތަފްސީލު ދެއްވަމުން ހޯމްލޭންޑު ސެކިއުރިޓީ މިނިސްޓަރު އަލީ އިހުސާން ވިދާޅުވީ ކަސްޓަމްސްގެ ގުދަނުން ބަނގުރާ ނަގައިގެން، ސަފާރީތަކަށް ދޫކުރަނީ ޓޫރިޒަމްގެ ވިޔަފާރީގެ ދަށުން އެކަން ކުރަން ކަމަށް ވިއަސް، ސަފާރީތަކުގައި ގެސްޓަކު ނެތަސް ބަރާބަރަށް ބަނގުރާ އަރުވައި ވިއްކަމުންދާ ކަމުގެ މައުލޫމާތު ލިބިފައިވާ ކަމަށެވެ.

"ސްޓެޓިސްޓިކްސް އަށް ބަލާފައި މިހާރު ކަސްޓަމްސް އިން ހިންގާ އޮޕަރޭޝަނަކީ ކަސްޓަމަށް ރާ ނަގަން އަންނަ އުޅަނދެއް ވިއްޔާ އެ އެއްޗެއްގައި ކިހާ މީހުންނެއް ތިބެފައިތޯ އެ ދިޔައީ. އެ ވެސް ބަލާނެ އަޅުގަނޑުމެން. އަދި އެ މުއްދަތު ތެރޭގައި އެ އުޅަނދަށް ހުއްދަ ދީފައިވާ އަދަދަށް މީހުންތޯ ރާ ކޮންސިއުމް ކުރަމުން މި ދަނީ. އެ ވެސް އަޅުގަނޑުމެން ސްޓެޓިކަލީ ވަކި ބައުންޑްރީސްތަކެއް ބަލާފައި، އޭގެ ބޭރުން މިކަން ކުރާ ކަމަށް ވެއްޖިއްޔާ އެ އުޅަނދަކަށް ރަލެއް ދުލެއް ނުކުރާނަން،" މިނިސްޓަރު ވިދާޅުވި އެވެ.

އޭނާ ވިދާޅުވި ގޮތުގައި ސަފާރީތަކަށް ދޭ ހުއްދައިގެ ބޭނުން ހިފައި، ބަނގުރާ ވިއްކާ ނަމަ އެކަން ޖެހޭނީ ހުއްޓާލާށެވެ.

"ދެން އަޅުގަނޑުމެން މި ފުރުސަތެއް ރާއްޖޭގައި މިކަން ކުރުމަކަށް ނުދޭނަން. އަދި މިކަން ކުރަމުންދާ ފަރާތްތަކާ ދޭތެރޭ ގާނޫނުގައި އެޅޭ އެންމެ ހަރުކަށި ފިޔަވަޅު އަޅުގަނޑުމެން އަޅާނަން،" އިހުސާން ވިދާޅުވި އެވެ.

އޭނާ ވިދާޅުވީ ބަނގުރާ ނަގައިގެން ގޮސް ގިނަ ފަހަރަށް އެ ތަކެތި އެކި އެވެނިއުސްތަކުން ރާއްޖޭގެ ރަށްރަށަށް ބާލައި، ދިވެހިންނަށް ވެސް ހިމެނޭހެން ހުއްދަ ނޫން ގޮތުގައި ރަލުގެ ވިޔަފާރި ހިންގާކަމަށެވެ.

"މިކަން މިގޮތަށް ކުރިއަށްދާކަން އަޅުގަނޑުމެންނަށް ސާބިތުވެފައި މި ވަނީ. މިކަންތައް ހުއްޓުވާނެ ކަސްޓަމްސް އާއި ފުލުހުންގެ އިދާރާ މެދުވެރިކޮށް،" މިނިސްޓަރު ވިދާޅުވި އެވެ.

ސަފާރީގެ ހުއްދަ ހުއްޓާލާ ހިސާބުން އެކަން ކޮށްފި ކަމަށް ބުނާ ޝަކުވާތަކަށް މާ ބޮޑު ސަމާލުކަމެއް ނުދޭނެ ކަމަށް ވިދާޅުވެ، އިހުސާން ވަނީ ރާއްޖޭގެ ވިޔަފާރީގައި އޮންނަ ގަވައިދުގެ ތެރެއިން އެކަން ކުރަން ނަސޭހަތްތެރިވެވަޑައިގެންފަ އެވެ.